Կալաշնիկովի ինքնաձիգը դարձել է ահաբեկիչների հիմնական զենքը. Guardian

2015թ. ահաբեկչական ակտերի ճնշող մեծամասնությունը իրագործվել է Կալաշնիկով տեսակի ինքնաձիգերով, գրում է The Guardian-ը։

Այդ կապակցությամբ եվրոպական երկրների ոստիկանները փորձում են պարզել, թե որտեղից է ներկրվում զենքը, եւ ով է այն վաճառում ջիհադականներին։ Պարբերականը նշում է, որ այսօրվա դրությամբ աշխարհում արտադրվում է Կալաշնիկովի ինքնաձիգի 200 մոդել։ Դրանց հիմնական արտադրողը Չինաստանն է։ Ընդ որում աշխարհամասում եւս 30 երկիր օրինական ճանապարհով նման զենք է արտադրում։

Այդուհանդերձ օրինական արտադրությունը կարող է արագ վերածվել ապօրինի մաքսանենգության, ընդգծում է հոդվածագիրը։ Չինաստանը հիմնականում Կալաշնիկովի ինքնաձիգ է արտահանում աֆրիկյան երկրներ, որտեղից էլ զինվորները ցածր գներով այն վաճառում են սեւ շուկայում։  Հաղորդվում է, որ քաղաքացիական պատերազմի մեջ ներքաշված Լիբիան նույնպես զենքի «կուտակման վայր է» դառնում։ ՄԱԿ տվյալների համաձայն՝ Լիբիան Կալաշնիկովի ինքնաձիգներ է արտահանում 14 ուրիշ երկիր, փոխանցում էGazeta-ն։

Չնայած այն հանգամանքին, որ Կալաշնիկովի ինքնաձիգների մեծ մասը արտադրվել է ավելի քան 35 տարի առաջ, Բալկանյան երկրներում նախկին ԽՍՀՄ տարածքում եւ Հյուսիսային Աֆրիկայում մնում են տասնյակ միլիոնավոր հրացաններ, որոնք պատրաստ են գործածության։ Հեղինակի կարծիքով հենց դրանց մատչելիությունն է հանգեցրել նրան, որ Կալաշնիկովի ինքնաձիգները դարձել են Եվրոպայում ահաբեկիչների հիմնական զենքը։