Մանկավարժ-պատգամավոր Ռուզաննա Մուրադյանի անցյալ տարվա «դասը»

Խոսելով 2015 թվականի դասերի մասին՝ ԱԺ ՀՀԿ խմբակցության պատգամավոր Ռուզաննա Մուրադյանը Past.am-ի և a1plus-ի հետ զրույցում նշեց.

«Շատ ուրախ եմ, որ դասի թեմայով ինձ հետ եք զրուցում: Սովորաբար ես եմ սիրում դասեր տալ: Յուրաքանչյուր անցած օր մի յուրահատուկ դաս է թողնում: Երբ անցնում է օրդ, փորձում ես վերլուծել՝ որտե՞ղ սխալվեցիր, որտե՞ղ թերացար կամ ունեցար հաջողություններ: Մեկ օրվա պես էլ անցավ այս մեկ տարին: Այդ արագության մեջ ինքս փորձեցի վերլուծել թե՛ քաղաքական, թե՛ հասարակական դաշտում անցած ճանապարհը:

Արդեն նախանշեցի եկող տարվա անելիքներս, իսկ ցանկացած նոր անելիք ձևակերպվում է դասերի հիման վրա: Ուզում եմ, որ 2016-ին մոտենանք այն երաշխիքով, հույսով ու հավատով, որի հիմքը դրվեց 2015 թվականին: Ես մեծ հույսեր եմ կապում նոր Սահմանադրության հետ, այն երաշխիքների հետ, որոնք տրվեցին դրանով: Այն տարբեր ոլորտներ կարգավորող հիմնարար փաստաթուղթն է, որի համար շատ պայքարեցինք և ունեցանք կոնսենսուս: Հավաքվեցին մարդիկ, ովքեր հասկացան, որ պայքար է պետք տանել ոչ թե անձերի դեմ, այլ գաղափարների համար»:

ՀՀԿ պատգամավորը նաև հավելեց. «Կարծում եմ՝ ամենալավ դասը Նարեկացին էր, որ փորձեցի հնչեցնել ԱԺ-ում: Այդ դասը վերաբերում էր մեզանից յուրաքանչյուրին»: Մանկավարժ-պատգամավորն ասաց, որ իր ակտիվությունը պակաս չի եղել սահմանադրական բարեփոխումների նախագծի հետ կապված աշխատանքներում: «Իմ ներկայացրած առաջարկներից 9-ը անցել են, որն ամենաշատն թվով է կին պատգամավորների մեջ: Այդ առումով ես գտնում եմ, որ քաղաքականության մեջ պետք չէ առանձնացնել ոլորտներ: Այդ ոլորտները պետք է ծառայեցնել ընդհանուր քաղաքականությանը: Պատրաստ եմ պայքարի և պատրաստ եմ ընդունել դիմացինի պայքարը, որովհետև հակասությունը շարժիչ ուժ է»:

Անդրադառնալով մարտահրավերներին՝ վերջինս նշեց, որ դրանք շատ էին: Մուրադյանի խոսքով՝ ներքին քաղաքականության մեջ համախմբվելու անհրաժեշտություն էր զգացվում անդադար: Ըստ նրա՝ այդ համախմբումը որոշ առումով եղավ: Ռուզաննա Մուրադյանն ակնկալում է, որ գգալիք տարում կլինի միայն գաղափարական պայքար:

Լևոն Փանոսյան