Արթուր Դավթյան․ Լավ մարզավիճակում ենք մոտենում Եվրոպայի առաջնությանը եւ մեծ հույսեր ունենք

Իմ առջեւ ոսկե մեդալի խնդիր եմ դրել հենացատկում: Տոկիոյի Օլիմպիական խաղերից հետո մարմնամարզությունում կանոնների փոփոխությունն ինձ թույլ է տալիս կատարել իմ այն երկու ցատկերը, որոնք ես շատ լավ եմ տիրապետում: Ես եւ ամբողջ թիմը շատ լավ մարզավիճակում ենք մոտենում Եվրոպայի առաջնությանը եւ մեծ հույսեր ունենք, որ ամեն ինչ շատ լավ է լինելու Մյունխենում:

Այս մասին NEWS.am Sport-ի թղթակցի հետ զրույցում ասաց օլիմպիական բրոնզե մեդալակիր, Եվրոպայի չեմպիոն, Եվրոպական խաղերի չեմպիոն, սպորտային մարմնամարզության Հայաստանի հավաքականի առաջատար Արթուր Դավթյանը:

Հակոբ Սերոբյանի գլխավորած հավաքականը պատրաստվում է Գերմանիայի Մյունխեն քաղաքաղում անցկացվելիք սպորտային մարմնամարզության Եվրոպայի առաջնությանը, որին Հայաստանը մասնակցելու է ներկայանալի կազմով՝ Արթուր Դավթյան, Վահագն Դավթյան, Հարություն Մերդինյան, Արթուր Ավետիսյանը: Եւս երեք մարմնամարզիկ կմասնակցի երիտասարդների Եվրոպայի առաջնությանը:

Մարմնամարզիկները Եվրոպայի առաջնության նախապատրաստական վերջին փուլն անցան Վրաստանի մայրաքաղաք Թբիլիսում: Օգոստոսի 13-ին երկու հավաքականների վերջին մարզումային օրն էր Վրաստանում, որտեղից թիմը մեկնում է Մյունխեն:

Օլիմպիական բրոնզե մեդալակիրը մրցավայր մեկնելուց առաջ NEWS.am Sport-ի թղթակցի հետ զրուցել է Եվրոպայի առաջնության նախապատրաստական փուլի, նոր կանոնների, Փարիզ-2024-ի ծրագրերի եւ իր անունով տարր ունենալու կարեւորության մասին:

Արթուր, մոտ մեկ ամիս տեւած մարզումներից, երկու մեծ հավաքներից հետո ի՞նչ մարզավիճակում ես այժմ:

Արդեն ավարտեցինք Վրաստանի հավաքը եւ մեկ օրից մեկնում ենք Մյունխեն անմիջապես այստեղից: Եվրոպայի առաջնության նախապատրաստական փուլն անցանք երկու հավաքով, որոնք շատ լավ անցան: Ես, ամբողջ թիմը շատ լավ մարզավիճակում ենք այժմ: Եթե մրցահարթակում անենք այն, ինչ մարզումների ընթացքում, շատ լավ կլինի: Օգոստոսի 13-ին Թբիլիսիի վերջին մարզումն արեցինք, որի ընթացքում այսպես ասած՝ ստուգարք էր մրցավայր մեկնելուց առաջ: Բոլորս լավ հանձնեցինք:

Վրաստան մեկնելուց առաջ ծնկի վնասվածք ունեիր: Ի՞նչ վիճակում է այժմ վնասվածքդ:

Վաղուց ունեի այս վնասվածքը, որը պարբերաբար իր մասին հիշեցնում է չնայած տարատեսակ բուժումների, ներարկումների: Ժամանակ առ ժամանակ ցավ է առաջանում, մարզումներին է խանգարում, հրման ժամանակ ցավ է տալիս, հատկապես երբ մի օր ծանրաբեռնված ենք աշխատում, հաջորդ օրը դժվարությամբ եմ ցատկում:

Վրաստանում ծանրաբեռնված մարզումներ ունեցանք, բայց ծունկս, կարծես, չխանգարեց: Լիարժեք չի անցել, դեղերով պահում եմ ցավը, ցատկերի ժամանակ այդքան չի ցավում: Այս պահին ինձ չի անհանգստացնում, համապատասխան դեղեր եմ օգտագործում, որպեսզի առաջին ցատկից հետո երկրորդի ժամանակ ինձ չզգամ: Ամեն ինչ շատ լավ է:

Արթուր, նախորդ տարի ապրիլի 24-ին անակնկալ մատուցեցիր բոլորիս քո չեմպիոնությամբ: Այս Եվրոպայի առաջնությունում բոլորը կսպասեն հերթական ոսկե մեդալիդ, արդեն հենացատկում: Լրացուցիչ լարվածություն կա՞ այս առումով: Կկարողանա՞ս կրկնել նախորդ տարվա հաջողությունդ:

Իսկապես ինձանից ոսկե մեդալ է ակնկալվում եւ, բնական է, հենց հենացատկից: Ես նույնպես սպասելիքներ ունեմ, նույնպես իմ առջեւ չեմպիոնության խնդիր եմ դրել: Ինձ շատ են հարցնում նժույգ թափեր վարժության համար՝ կկարողանա՞մ կրկնել ոսկե մեդալը, ի՞նչ սպասելիքներ կան այդ գործիքի վրա: Օլիմպիական տարուց հետո մարմնամարզությունում կանոնները փոխվում են: Նժույգ թափերում այն վարժությունը, որով դարձա Եվրոպայի չեմպիոն, արդեն լավ էի տիրապետում: Հիմա քանի որ օլիմպիական մրցաշրջանն ավարտվեց եւ կանոնները փոխվեցին, երկու էլեմենտ կա, որը ես չեմ կարողանում անել իմ վարժության մեջ: Այստեղ ինձ համար վնաս է, այսինքն՝ կանոնների փոփոխությունը բացասական ազդեց ինձ վրա նժույգ թափերում:

Հենացատկում ամեն ինչ հակառակն է՝ կանոնները փոխվեցին ի օգուտ ինձ. այստեղ կա ցատկ, որին ես շատ լավ էի տիրապետում, բայց իրավունք չունեի կատարել: Հիմա՝ ունեմ: 2016 թվականին Օլիմպիական խաղերից հետո, երբ կանոնները փոխվեցին, ես իրավունք չունեի այդ ցատկը մյուսի հետ անել, անում էի ավելի բարդ ցատկ, որին այդքան էլ լավ չէի տիրապետում: Հիմա արդեն իրավունք ունեմ եւ դրանք այն ցատկերն են, որոնց ես լավ եմ տիրապետում, երկուսն էլ լավ եմ ցատկում: Երկուսն էլ նույն միավորներով է գնահատվում՝ 15.6-ից: Աշխարհի գավաթի խաղարկության փուլերում ես այդ ցատկերով մասնակցեցի եւ արդյունքը բոլորը տեսան՝ երեքում էլ ամենաբարձր միավորները վաստակեցի:

Ստացվում է՝ հիմնական սպասելիքդ քո գործիքի՞ց է:

Նժույգ թափերում ինձ համար վատ եղավ կանոնների փոփոխությունը, բայց իմ գործիքը հենացատկն է: Ավելի լավ է այստեղ փոփոխություններն ի օգուտ ինձ լինեն, որովհետեւ սա իմ գործիքն է: Այս փոփոխված կանոնները կմնան մինչեւ Փարիզ-2024, եւ ես այնտեղ հանդես կգամ իմ այս ցատկերով: Իմ ուժեղ ցատկը, որով ես մեդալ նվաճեցի Օլիմպիական խաղերում եւ այս նոր փոխարինված ցատկով արդեն մեծ հույսեր ունեմ Եվրոպայի առաջնությունում: Ես այն ժամանակ շատ էի մտածում, որ պետք է կարողանամ շատ մաքուր կատարել այն ցատկը, որին լավ չէի տիրապետում: Հիմա այդքան չեմ մտածում, այլ ամեն մրցումից առաջ կենտրոնանում եմ լավ պատրաստվելուս վրա, գիտեմ, որ շատ լավ եմ կատարում, միայն թե լավ մարզավիճակում լինեմ, մի փոքր էլ սպորտային բախտ ունենամ:

Արթուր, նժույգ թափերում վերջերս քո անունով տարր ունեցար, ինչի առիթով շնորհավորում եմ: Ինչպե՞ս ծնվեց քո անունով տարր ունենալու միտքը եւ ինչո՞ւ նժույգ թափերում:

Ուրախ եմ, որ ես էլ իմ անունը կթողնեմ սպորտային մարմնամարզությունում: Հավերժ գնալու է, ինչպես «ազարյանական խաչը», մյուսներինը, ով իր անունով տարր ունի: Սա պատմություն է: Շատ լավ է, որ հայ մարզիկների անուններով էլեմենտներ կան. այդպես՝ Վահագն Դավթյանի անունով կա, Վահագն Ստեփանյանի, Հուռի Գեբեշյանի: Թող աշխարհում ճանաչեն հայ մարզիկներին, իմանան, որ եղել են ուժեղ հայ մարմնամարզիկներ, որոնք պատմություն են կերտել:

Կորոնավիրուսի ժամանակ միտքը եկավ, երբ մրցումներ չկար, ամեն ինչ փակ էր, ազատ էինք, ոչինչ չունեինք անելու: Ես եւ ընկեր Հակոբը որոշեցինք մի էլեմենտ անել, որը կլինի իմ անունով: Հենացատկ էինք ուզում, բայց իմ գործիքի վրա մի քիչ բարդ է: Որոշեցինք նժույգի վրա անել: Ինչ վերաբերում է հենացատկին. կա մի տարր, որը ես պետք է աշխատեմ անել: Սա իմ հետագա ծրագրերի մեջ է մտնում, քանի որ ցանկանում եմ իմ գործիքի վրա անպայման ունենալ իմ անունով տարր: Շատ բարդ տարր է լինելու, որը նաեւ շատ բարձր է գնահատվելու, եթե այն անեն: Օրինակ՝ նժույգի վրա իմ անունով տարրն այդքան բարդ չէ եւ բարձր չի գնահատվել: Այս շրջանում Եվրոպայի առաջնությանն ենք պատրաստվում, բացի այդ ծնկի խնդիր ունեմ: Եվրոպայից հետո, երբ ծունկս նաեւ լիարժեք բուժեմ, արդեն կսկսեմ աշխատել այդ նոր տարրի վրա:

Լուսինե Շահբազյան