«Ունեմ մի հրաշք աղջիկ, որի պատճառով շտապում եմ վայրկյան առաջ տուն»

Ամանորի առթիվ Past.am-ը զրուցել է Ազգային ժողովի ՀՀԿ խմբակցության պատգամավոր Նաիրա Կարապետյանի հետ:

Գնահատելով 2015-ը՝ նա ասաց. «Խիստ դրական էր անձնական առումով, քանի որ աղջիկ ունեցա, ընտանիքը համալրվեց: Ես ունեմ մի հրաշք աղջիկ, որի պատճառով շտապում եմ վայրկյան առաջ տուն գնալ: Բայց, ամենայն պատասխանատվությամբ, հայտարարում եմ, որ դրանից գործը չի տուժում, որովհետև տանն էլ եմ աշխատում»:

Տիկին Կարապետյանը նաև խոսեց քաղաքական հաջողություններից: Ըստ նրա՝ ունենք մի իրավիճակ, երբ այսօրվա բարեփոխումները ժողովուրդն իր վրա զգում է որոշակի ժամանակ հետո: «Ինչքան էլ ժողովրդի կողմից չի քննարկվել սահմանադրական փոփոխությունների բուն բովանդակությունը, բայց այն երևույթը, որ մենք անցնում ենք դեպի կոլեգիալ կառավարում, ամենալուրջ քայլն էր: Մենք բալանսավորեցինք իշխանության ձևավորման հարցում տարբեր ուժերի դերակատարումը»,- նշեց մեր զրուցակիցը՝ հույս հայտնելով, որ մի քանի տարի անց դա հասանելի և ընկալելի կլինի ժողովրդի համար:

Հարցին՝ ինչպե՞ք եք դիմավորելու Նոր տարին, Նաիրա Կարապետյանը պատասխանեց. «Քանի որ աղջկաս առաջին Նոր տարին է, կուզենամ նրան պարգևել հեքիաթ: Կտանեմ ձմեռային հեքիաթային վայր՝ Ջերմուկ: Դիմավորելու ենք ընտանիքով: Ինչպես տարին դիմավորում ես, այնպես էլ այն անցնում է: Ես մաղթում եմ բոլորին, որպեսզի լինի խաղաղություն, ջերմություն, բարեկեցություն և այնպիսի իրավիճակ, որ ցանկացած մարդ աշխատանքից հետո ուրախությամբ շտապի տուն»:

Լևոն Փանոսյան