«Չկա որևէ բարոյական հիմք, չկա որևէ հետևություն. այս իշխանությունը հետ չի կանգնելու». «Փաստ»

«Փաստ» օրաթերթը գրում է

 

«Ընդդեմ իրավական կամայականությունների» ՀԿ նախագահ, ՀՀ մարդու իրավունքների նախկին պաշտպան Լարիսա Ալավերդյանի կարծիքով, Հայաստանում մարդու իրավունքները ոչ թե պարզապես ոտնահարվում, այլ ոտնակոխ են արվում:

«Եթե ուշադրություն դարձնենք, թե ինչ «տրամաբանությամբ» է ղեկավարվում իշխանության եկած այս խունտան, կտեսնենք, որ այն, ինչ կատարվում է այսօր, խիստ օրինաչափ է: Արմեն Գրիգորյանի մահը, որը քաղաքական սպանություն էր, նշվածի հերթական ցուցիչն է: Պրոդյուսեր Արմեն Գրիգորյանն ու բոլոր այն մարդիկ, ովքեր տեսնում են այս իշխանության՝ թուրք-ադրբեջանական ցեղասպանական քաղաքականությունը սպասարկելու գիծը, այս իշխանության կողմից որպես վտանգավոր թշնամիներ են ընկալվում: Առողջ դատողությամբ հասկանալի է, որ Արմեն Գրիգորյանը ոչ մի վտանգ չէր ներկայացնում Հայաստանի համար, ինչը խափանման միջոց կալանքի փոփոխության հիմք պետք է դառնար, մինչդեռ այս իշխանությունները նրա նկատմամբ որպես թշնամի էին կալանք կիրառել: Հաշվի առնելով Ա. Գրիգորյանի մահվանից հետո դատավորի հայտարարությունը՝ կարող եմ ասել, որ այս իշխանության մոտ չկա որևէ բարոյական հիմք, չկա որևէ հետևություն»,-«Փաստի» հետ զրույցում նկատեց Լ. Ալավերդյանը՝ նշելով, որ անգամ չեն արդարանում:

«Կա նպատակային նսեմացում, նպատակային ձերբակալում, նպատակային կալանք, նպատակային մարդուն մահվան հասցնելու ցանկություն: Այն, ինչը մենք բոլորս հիմա որպես ողբերգություն ենք ընկալում, իրենց մոտ այդ ընկալումը չկա: Եվ յուրաքանչյուր նման ողբերգության հետևում հանցագործներ են կանգնած: Հանցագործություն է տեղի ունեցել: Հայաստանում պատժելիության սկզբունքի ոտնահարումը այս իշխանությունների օրոք պարզապես նորմ է դարձել, ու ցավով, բայց պետք է ասել, որ նման պայմաններում ողբերգական դեպքերն օրինաչափ են: Այս իշխանությունը ողբերգությունների հանգեցնող հանցավոր գործողություններից հետ չի կանգնելու: Սա վերջակետ չի լինելու իրենց համար»,-ասաց նա՝ շեշտելով, որ անգամ հետևություններ անելու նշույլ չկա:

«Իշխանությունները շարունակելու են նույն գիծը, այն է՝ հնարավորինս շատ ոչնչացնել ինտելեկտուալ անձանց՝ սկզբից ձերբակալելով, հետո կալանավորելով, իսկ հետո էլ հասցնելով ծայրաստիճան վատ վիճակի. եթե ոչ մահվան, ապա բավականին մեծ վնաս են հասցնում առողջությանը: Սա հատվածական բնույթ չի կրում, սա քաղաքական հստակ մոտեցում է: Ես ստիպված եմ համեմատական անցկացնել երիտթուրքերի հետ, որոնց թիրախը եկեղեցականներն էին, նաև մտավորականությունը: Հիշենք, թե 2018-ին ինչպիսին էր այս իշխանության մուտքը, ինչից են սկսել: Իրենք եկեղեցու դեմ լկտի հարձակումներով սկսեցին: Իսկ հետո բավականին հետևողական պատժվում են բոլոր նրանք, ովքեր ոչ միայն հայրենասեր, այլև ինտելեկտի կրող են: Բոլոր նրանք, ովքեր Արցախյան շարժման, Արցախյան հաղթական, ազգային ազատագրական պատերազմում հաղթող են եղել, մեղավոր են համարվում այս իշխանությունների կողմից: Անկախ խավից ու խմբից, բոլոր նրանք, ովքեր եղել ու մնում են Արցախի ազատագրական պայքարի ջատագովներ, ովքեր կողմ են Հայաստանի սուբյեկտայնության պահպանմանը, ովքեր դեմ են Հայաստանը Թուրքիայի կցորդ սարքելուն, այս իշխանության կողմից ոչ թե որպես քաղաքական ընդդիմախոսներ, այլ թշնամիներ են ընկալվում»,-ասաց Լ. Ալավերդյանը:

Նրա խոսքով, 2018-ից հետո Հայաստանում մարդու իրավունքները ոչ միայն ոտնահարվում են, այլև այս իշխանությունները ամբողջապես հակադրվում են մարդու միջազգային իրավունքներին: «Նրանք ոչ թե ոտնահարում են մարդու իրավունքները և պատրաստ են ընդունել սխալները, այլ հակադրվում են թե՛ տեսությանը, թե՛ իրավակիրառական պրակտիկային: Ես որևէ կերպ չեմ զարմացել թե՛ դատական իշխանության դեմ հարձակումներից, թե՛ մարդու իրավունքների կոպտագույն խախտումներից: Մենք չպետք է ակնկալիքներ ունենանք, որ խաբեությամբ իշխանությունը զավթածների խունտան այս կամ այն բացահայտումից, ողբերգությունից հետո որևէ կերպ հետ է կանգնելու: Հակառակը՝ ավելի ու ավելի են կոշտացնելու քայլերը. շարունակելու են ոտնակոխ անել մարդու իրավունքների, ժողովրդավարության, իրավական պետության առումով մեր ունեցած համեստ նվաճումները ու այդպես առաջ են շարժվելու»,-ընդգծեց մեր զրուցակիցը:

Լարիսա Ալավերդյանն այս պայմաններում պատահական չի համարում նաև այն մթնոլորտը, որը ձևավորվել է հասարակության մեջ: Խոսքը հատկապես մարդու մահը խրախճանք դարձնելու այն անընդունելի վարքագծի մասին է, որին առաջին անգամ չէ, որ ականատես ենք լինում: «Մահվան շուրջ խրախճանքը հատուկ է սատանիստներին: Այդ աղանդը քայքայիչ աղանդների թվին է պատկանում: Այս իշխանության նպատակներից մեկը հասարակության վրա նաև որպես քայքայիչ աղանդ գործելն է: Հայաստանում այս առումով խորքային աշխատանք է կատարվել: Քայքայել՝ այլափոխելով, այլասերելով ազգային ինքնությունը: Արժեհամակարգի քայքայման վրա են աշխատում: Սա է պատճառը, որ հիմա ցանկացած գաղափար, ինչպիսին, օրինակ՝ թուրք- ադրբեջանական ցեղասպանական քաղաքականությունը սպասարակելու իրողությունն է, տոլեռանդ է ընդունվում շատերի կողմից: Ինչո՞ւ, որովհետև քայքայվում են հոգևոր արժեքները, նաև հայի հոգեկերտվածքի վրա են աշխատում: Այս ամենը մեր բոլորի աչքի առջև է կատարվել, ու չի եղել հասարակության հետ այն համապատասխան աշխատանքը, ինչն այսօր կբացառեր նման վիճակը: Մենք բոլորս ժամանակին թերացել ենք շատ հարցերում»,-եզրափակեց մեր զրուցակիցը:

ԱՆՆԱ ԲԱԴԱԼՅԱՆ

Մանրամասները՝ «Փաստ» օրաթերթի այսօրվա համարում