«Ոչ թալանին» նախաձեռնությունը նահանջել է իր պահանջից. Ակտիվիստ

«Ոչ թալանին» նախաձեռնությունը նահանջել է իր պահանջից: Այս մասին այսօր՝ հունիսի 29-ին, Ազատության հրապարակում ընթացող հանրային քննարկման ժամանակ ասաց նստացույցի բոլոր օրերին Բաղրամյան պողոտայում գիշերած տարեց քաղաքացին:

«Դուք նահանջել եք Ձեր սկզբունքից, սկզբից ասում էիք «ոչ մի լումա», իսկ հիմա ընդունում եք, որ կառավարութունը վճարի: Ինչո՞ւ պետք է մեր գրպանից վճարենք, իզուր տեղը մի հավաքեք էս ժողովրդին, ոչինչ փոխել չեք կարող»,-ասաց նա:

«Ոչ թալանին» նախաձեռնության անդամներն ասացին, որ իրենք չեն նահանջել իրենց պահանջից եւ շարունակելու են ավելի մեծ թափով մինչեւ իրենց պահանջը լիարժեք բավարարվի: Հանրային քննարկման ժամանակ առաջարկվեց ստեղծել մասնագիտական խումբ՝ իրավաբաններից, էներգետիկներից կազմված, որպեսզի  խնդիրը իրավական հարթությունում լուծեն:

Հունիսի 22-ի երեկոյան ժամը 19:00-ից քաղաքացիները հավաքվել են Բաղրամյան պողոտայում, փակել այն եւ պահանջում են կասեցնել հունիսի 17-ին կայացրած որոշումը: Հունիսի 28-ին ցուցարարների մի մասը հեռացել էր Ազատության հրապարակ, իսկ մեծ մասը մնացել էր Բաղրամյան պողոտայում։

Նախաձեռնության անդամները համոզված են, որ աուդիտ պետք է անցկացվի ոչ միայն ՀԷՑ-ում, այլեւ ամբողջ էներգետիկ համակագում, քանի որ վստահ են՝ չարաշահումներ ամբողջ համակարգում են եղել:

Հիշեցնենք, որ չնայած էլեկտրաէներգիայի սակագնի բարձրացման դեմ ուղղված բազմաթիվ բողոք-ակցիաներին հունիսի 17-ին, ՀԾԿՀ հանձնաժողովի նիստում հաստատվել է էլեկտրաէներգիայի նոր սակագինը։ էլեկտրաէներգիան թանկացել է 6.93 դրամով՝ մեկ կՎտ/ժ-ի դիմաց 41.85 դրամից դառնալով 48.78 դրամ։ «Հայաստանի էլեկտրական ցանցեր» (ՀԷՑ) ընկերությունը առաջարկել էր էլեկտրաէներգիայի մեկ կիլովատտ/ժամը թանկացնել 17 դրամով: