«Ուսապարկային ճկունություն». պարոնայք, մի ծիծաղեցրեք իմ հողաթափերին. «Փաստ»

«Փաստ» օրաթերթը գրում է

Հայաստանի փոխվարչապետ Համբարձում Մաթևոսյանը Երևանում անցկացվող Միավորված ազգերի կազմակերպության Զբոսաշրջության համաշխարհային կազմակերպության Եվրոպայի տարածաշրջանային հանձնաժողովի 67-րդ նստաշրջանի բացման իր խոսքում, անդրադառնալով զբոսաշրջության ոլորտում Հայաստանի կողմից իրականացվող քաղաքականությանը, նշել է, որ կառավարությունը զգոնությամբ է հետևում զբոսաշրջության ոլորտում կատարվող իրադարձություններին և իրականացվող ծրագրերին՝ լավագույն փորձը կիրառելով իր ներքին քաղաքականություններում և ռազմավարություններում:

«Հայաստանում զբոսաշրջության ոլորտը, որպես տնտեսության ամենադինամիկ զարգացող ճյուղերից մեկը, անմասն չի մնացել կորոնավիրուսային համաճարակի արհավիրքից, սակայն, նաև շնորհիվ ոլորտում վարվող պետական ճկուն քաղաքականության, երկրում զբոսաշրջության ոլորտը վերականգնման ճանապարհին է»,- ընդգծել է փոխվարչապետը։ Այստեղ արդեն դասական դարձած արձագանքն է գալիս մտքիդ՝ «իյա, իրո՞ք»: Պարզվում է, որ Նիկոլ Փաշինյանի կառավարությունը ճկուն քաղաքականություն է վարում զբոսաշրջության ոլորտում: Ի՞նչ «ճկունություն», պարոնա՛յք, ի՞նչ «քաղաքականություններ ու ռազմավարություններ», կարո՞ղ եք թեկուզ մեկ օրինակ բերել: Հայաստանում զբոսաշրջությունը, ինչպես և ցանկացած այլ ոլորտ, թողնված է ինքնահոսի: Հրեան նման դեպքերում ասում է. «Պարոնայք, մի ծիծաղեցրեք իմ հողաթափերին»:

Հա, մոռացա, կան «ճկուն քաղաքականություններ ու ռազմավարություններ», որոնք նաև «արմատական բարեփոխումներ են», իհարկե, հենց իրենց բնորոշմամբ: Օրինակ՝ ճկուն կերպով ընդունված հանրահայտ «աղամանի օրենքը», կամ էլ անգամ բացօթյա տարածքներում ծխելու արգելքի ճկուն օրենքը, ու ամենակարևորներից՝ ժամանակին ճկուն կերպով հանվել է դիմակների կրման և պարտադիր թեստավորման մասին օրենքը... Կարելի է անգամ զարմանալ նման ճկունության վրա: Չմոռանանք նաև, որ ճկուն կերպով Արցախը որպես զբոսաշրջային խոշոր ուղղություն դուրս է մղվել օրակարգից, ճկուն կերպով դժվարացել է հասնել Սյունիք՝ շրջանցիկ անբարեկարգ ճանապարհների պատճառով, ճկուն կերպով աճել են հանցագործությունները, քանի որ իրավապահները զբաղված են այլ գործով, այն է՝ երկրում առաջացած քաղաքական ճգնաժամի հետևանքով տեղի ունեցող անհնազանդության ակցիաները ճկուն կերպով ճնշելը և ձեռքի հետ էլ փակվող փողոցները ճկուն կերպով բացելը: Երևի թե կարելի է մեր ճկուն ուսապարկային կառավարության ակտիվին գրանցել նաև Ուկրաինայում Ռուսաստանի հատուկ գործողությունը, որի հետևանքով աճել է ռուսների հոսքը Հայաստան... Զբոսաշրջության աճ է, չէ՞:

Կառավարության ակտիվին է նաև մեր սփյուռքի հայրենակիցների ակտիվացած այցերը հայրենիք, քանի որ մարդիկ կորոնավիրուսային համաճարակի պատճառով երկու տարի նման հնարավորություն չեն ունեցել... Ճկունություն է, խոսք չկա: Չմոռանանք նաև, որ զբոսաշրջության ոլորտը զարգացնելու՝ Նիկոլ Փաշինյանի կառավարության ծրագրերը շատ են: Օրինակ՝ հանրապետության մուտքերում գտնվող անկլավների ճկուն կերպով հանձնումը Ադրբեջանին: Ցուցանիշներ ապահովելու, այսինքն՝ զբոսաշրջիկների թիվը ավելացնելու առումով մի խորհուրդ էլ կառավարությանը իմ կողմից. Հայաստանի տարածքում գտնվող ադրբեջանցի զինվորականներին գրանցեք որպես զբոսաշրջիկ, ահագին աճ կունենաք... Ի դեպ, «կառուցողական և բարեկիրթ» Ալիևը դրան դեմ չի լինի, չի բարկանա, անգամ կաջակցի՝ նրանց թիվն ավելացնելով:

ԿԱՄՈ ԽԱՉԻԿՅԱՆ

Մանրամասները՝ «Փաստ» օրաթերթի այսօրվա համարում