«Այսօր կանգնած ենք ջրբաժանին, երբ պետք է որոշում կայացնենք». «Փաստ»

«Փաստ» օրաթերթը գրում է

Մեր պետությունը հայտնվել է իր գոյության կարևորագույն խաչմերուկներից մեկում: Հիմա, ինչպես մեր պատմության տարբեր փուլերում, մեր անկախությունը և Արցախը կորցնելու ջրբաժանին ենք կանգնած:

Անհատներն ահազանգում են վտանգների մասին, հանրության մի մասը, կարծես թե, այդպես էլ չի հաղթահարում հետհեղափոխական թմբիրը և չի համակերպվում այն մտքի հետ, որ խաբվել է, ժամանակին սխալ ընտրություն է կատարել: Ազատության հրապարակում, Երևանի փողոցներում ու հանրապետության ճանապարհներին այս օրերին մեր երկրի ապագայով մտահոգ քաղաքացիներն են` լինեն մտավորական, զինվորական, ուսանող, թե քաղաքական գործիչ, նրանք բոլորը նախ և առաջ ՀՀ քաղաքացիներ են, որոնք վախեր ունեն Հայաստանի և Արցախի վաղվա օրվա վերաբերյալ:

Դերասան, ՀՀ ժողովրդական արտիստ Հրանտ Թոխատյանն ասում է` իհարկե, ցանկալի կլիներ, որ այս ամենն ավելի շուտ լիներ, բայց կարծում է, որ հասարակությունը դեռ չէր հասունացել, համենայն դեպս, գոնե այն մասը, որն ընտրել էր Նիկոլ Փաշինյանին:

«Նրանք դեռ գտնվում էին իր ամեն ասածի տպավորության տակ: Հիմա շատ վատ բան պիտի ասեմ, բայց երևի պետք էր այս ամեն ինչի միջով անցնել, որպեսզի մարդիկ ամեն ինչ վերլուծեին, հասկանային, թե ինչ կատարվեց, ինչ եկավ բոլորիս գլխին: Մեծամասնության կողմից ընտրված իշխանությունն ամբողջովին ձախողեց այն ամենը, ինչ խոստացել էր, մինչդեռ շատերը նրանց հետ հույսեր էին կապել: Հիմա էլ հասարակությունն ամբողջովին չի արթնացել, հրապարակում մարդկանց քանակը և երկրի դրությունը չեն համապատասխանում իրար: Մենք շատ ավելի վատ վիճակում ենք, քան մեզանից շատերը դա պատկերացնում են»,-«Փաստի» հետ զրույցում ասում է դերասանը:

Ասում է` այս օրերին պետք է հստակ խնդիր ձևակերպել և առաջ շարժվել` դրան հասնելու համար: «Չպետք է գլխավոր խնդիրը մասնատել տարբեր մասերի, այսօր կա խնդիր համար մեկ: Կորցնում ենք երկիր, կորցնում ենք Արցախը: Աստված չանի, բայց կարող ենք կորցնել Հայաստանի մի մասը, եթե ոչ ամբողջ Հայաստանը: Դրա համար այսօր պետք է միաբանվել մեկ խնդրի շուրջ` այս իշխանությունը պետք է հեռանա: Բնականաբար, բոլորի մոտ հարց է առաջանալու` լավ, սրանք գնացին, դուք ի՞նչ եք անելու, ո՞վ է գալու: Այդ «դուք»-ը օդ նետած ֆրազա է, որովհետև այդ «դուք»-ն այսօր «դուքեր» է: Պետք է միավորվել մեկ խնդրի շուրջ ու կարողանալ իսկապես ձևակերպել այն միտքը, թե ինչու այս իշխանությունը պետք է գնա և մտածել երկրի զարգացման մասին, այդ դեպքում կհաջողենք: Առաջարկներ կան, որոնց կյանքի կոչման պարագայում հնարավոր կլինի ապահովել երկրի անվտանգությունը, վերականգնել ու հզորացնել տնտեսությունը, առաջընթաց գրանցել բոլոր ոլորտներում: Նաև այս պատճառով ինձ համար անհասկանալի է այն միտքը, երբ ասում են` «չենք գնա հրապարակ, քանի որ այնտեղ հներն են»:

Այսինքն, եթե հներն են Ազատության հրապարակում, դրա համար ես այնտեղ չեմ գնում, ստացվում է` ինձ համար մեկ է, որ երկիրը կկորցնենք, կարևորը հները հետ չգա՞ն: Դա ամենացավալի մտածելակերպն է: Դրա փոխարեն պետք է գտնել ճանապարհներ ու այլընտրանք հարցերը լուծելու համար»,-ասում է ՀՀ ժողովրդական արտիստը:

Նա համակարծիք է, որ այս օրերին Ազատության հրապարակում և այլուր մեկնարկած ակցիաները յուրահատուկ աջակցություն են Արցախին ու արցախցուն, որ նա մենակ չէ, որ մայր Հայաստանը նրա կողքին է: «Դեռևս 1990-ականներից մի այլ ցավալի գործընթացի ականատես եղանք, երբ ոմանց խոսքերով, գնահատականներով Արցախը քիչ-քիչ դարձավ շատերի աչքի փուշը: Արցախի համար շատերը, հատկապես Հայաստանից, արյուն թափեցին, ավաղ, շատերն էլ հետո մեկ ծաղիկ անգամ չփորձեցին տնկել այդ հողի վրա` մոռանալով, որ Արցախն այն սիմվոլն է, որի շուրջը պետք է համախմբվենք, հակառակ դեպքում` կկորցնենք Հայաստանը: Սրա մասին մեր շատ հերոսներ են ասել, որոնք իրենց կյանքն են տվել Արցախի ու Հայաստանի համար: Այսօր կանգնած ենք ջրբաժանին, երբ պետք է որոշում կայացնենք: Արցախը մերն է, և դրանով պետք է ամեն ինչ եզրափակվի: Պետք է պահենք մեր երկիրը, ինչ գնով էլ որ լինի: Եթե կորցնենք Արցախը, մաս առ մաս կորցնելու ենք Հայաստանը»,-եզրափակում է Հրանտ Թոխատյանը:

ԼՈՒՍԻՆԵ ԱՌԱՔԵԼՅԱՆ

Մանրամասները՝ «Փաստ» օրաթերթի այսօրվա համարում