Դարպասում թեժ մրցակցություն է

Լոռու մարզի Դարպաս գյուղում, տոները հազիվ ավարտված, գյուղապետ կընտրեն: Հունվարի 3-ին այստեղ համայնքի ղեկավարի ընտրություններ են նշանակված:

Կենտրոնական ընտրական հանձնաժողովի կայքից տեղեկանում ենք, որ Դարպասի համայնքի ղեկավարի պաշտոնի համար կպայքարեն 4 թեկնածուներ, որոնցից երեքը հանրապետական են, մեկը՝ անկուսակցական: ՀՀԿ-ից են Արմեն Ալոյանը, Անուշավան Ավետյանը, Աղասի Թովմասյանը, անկուսակցական՝ Կարեն Դոդոռյանը:

Նրանցից երկուսն ունեն մշտական աշխատանք: Անուշավան Ավետյանը համայնքի աշխատակազմի ղեկավարն է, Աղասի Թովմասյանը՝ Դարպասի միջնակարգ դպրոցի փոխտնօրենը: Չորս թեկնածուներն էլ հանդես են եկել ինքնառաջադրմամբ: Երեկ՝ ժամը 18.00-ին, ավարտվել է ինքնաբացարկի ժամկետը եւ թեկնածուների թիվն այլեւս չի կարող նվազել:

Թե ամանորյա խումհարից հետո ում կընտրեն դարպասցիները, պարզ կդառնա քվեարկությունից հետո:

Դարպասում բնակչության թիվը 1992 է: Գյուղը հին է, ինչի մասին վկայում են գյուղի գերեզմանատան սեւ տուֆից կերտված սալաքարերի վրայի փորագրությունները: Գյուղը գտնվում է հանրապետության հյուսիսարեւմտյան մասում՝ Մայմեխ լեռան (3081մ) արեւմտյան կողմում, մարզկենտրոն Վանաձորից 4 կմ դեպի արեւմուտք: Կլիման բարեխառն է.ամռանը մեղմ` առավելագույն ջերմաստիճանը +33C, ձմեռը տեւում է 5 ամիս՝ մինչեւ -20C ցուրտ: Համայնքի կենտրոնի բարձրությունը ծովի մակարդակից 1370 մ է: Համայնքում զբաղվում են ցորենի, գարու, կարտոֆիլի, կաղամբի եւ այլ բանջարա-բոստանային կուլտուրաների արտադրությամբ եւ այգեգործությամբ: Այս արտադրությունը կախված է բնության քմահաճույքից: Առանձին տարիներ գարնան ցրտահարությունից եւ ամռան կարկտահարումից տուժում են այգիները եւ ցանքատարածությունները, որի պատճառով լինում է 60-70%-անոց բերքի կորուստ:

Անասնապահությամբ զբաղվողներն արտադրում են կաթ, պանիր, միս, բուրդ, մեղր: Երաշտի տարիներին անասնապահության բնագավառում նույնպես մեծ դժվարություններ են առաջանում: Խոտի եւ խտացված կերի անբավարարվածության պատճառով դժվարանում է անասունների մսուրային շրջանի կազմակերպումը: Գյուղն ունի 1 միջնակարգ դպրոց՝ վերջին տարիներին վերանորոգված, բարվոք վիճակում, ուր սովորում է 270 աշակերտ: Դպրոցն ունի 33 աշխատատեղ, որից` 22 ուսուցիչ, 1 ուսուցչին բաժին է ընկնում 12 աշակերտ: Անմխիթար վիճակում է դպրոցի խմելու ջրի ցանցը, որն անհապաղ վերանորոգման կարիք ունի: Համայնքն ունի 1 մշակույթի տուն, որը գործում է ժամանակավոր տնակային պայմաններում, չնայած դրան, համայնքը միշտ էլ կազմակերպում է հասարակական միջոցառումներ: Գործող գրադարանը, որը գործում է տնակային ոչ բավարար պայմաններում, ունի 3016 անուն գիրք: Մարզահրապարակ չունենալու պատճառով երիտասարդությունը զրկված է սպորտային խաղերից: Գյուղում գործում է մեկ բուժկետ, որը գտնվում է տնակում` անմխիթար վիճակում: Չկա համապատասխան գույք եւ սարքավորում: Բուժկետն ունի երկու աշխատող:

Գագիկ Աղբալյան