Տարաբնույթ գաղափարների շուրջ միավորվում են համայնքներն ու մարզերի երիտասարդները. «Փաստ»

«Փաստ» օրաթերթը գրում է

«Awesome Nature Armenia»-ն իր շուրջ է միավորել վաթսունից ավելի տարբեր մասնագետների, գիտնականների, բնապահպանների, որոնց միավորում է հայրենի բնաշխարհն առավել «awesome» (հիանալի) դարձնելու գաղափարը։ Այս դրամաշնորհը «Awesome Foundation» միջազգային հիմնադրամի ճյուղերից մեկն է: «Awesome Nature Armenia»-ի համակարգող Անի Զաքոյանը նշում է՝ Հայաստանի տարածքում գործում են նաև «Awesome Yerevan»-ը և «Awesome Artsakh»-ը:

««Awesome Nature Armenia»-ն հիմնականում բնապահպանական է և նախատեսված է մարզերի համար: Գաղափարն առաջացավ այն ժամանակ, երբ հասկացանք, որ Երևանում բնապահպանական ուղղություններով շատ նախաձեռնություններ կան, բայց մարզերը հետ են մնացել, կար նաև ընդհանուր զարգացման խնդիր: 

Ոչ թե նպատակ ենք դրել ինքներս նախաձեռնել ու իրականացնել նախագծեր, այլ որպեսզի մարզերի բնակիչներն ակտիվանան, քանի որ լրիվ այլ բան է, եթե նախագծերը մարզերի համար այլ մարդիկ են անում, լրիվ այլ է, երբ հենց տեղի բնակիչներն են իրենց նախաձեռնությունները ներկայացնում և կյանքի կոչում:

Մենք 50-60 հոգանոց թիմ ենք՝ հոգաբարձուներ և համակարգողներ: Ամեն ամիս մեզ ներկայացնում են ծրագրերը, այնուհետև դրանք անցնում են երկրորդ փուլ: Հետո արդեն ունենում ենք ներկայացման օր: Եզրափակիչ փուլ հիմնականում անցնում է 3-4 նախագիծ, այնուհետև ընտրվում է լավագույն նախագիծը: Լինում են դեպքեր, երբ ամսական ունենում ենք ոչ թե մեկ, այլ երկու հաղթող նախագիծ: Դեպքեր են եղել, երբ մեկն ամբողջական, երկրորդը՝ մասնակի, կամ երկուսն էլ ամբողջական ֆինանսավորում են ստացել՝ կախված բյուջեից: Հատկապես վերջին փուլում, երբ արդեն պիտի ընտրենք հաղթող նախագիծը, մեր հիմնական նպատակն է բացատրել, որ դիմորդները մրցակիցներ չեն, բոլորս ունենք մեկ նպատակ՝ ինչ-որ լավ բան անել շրջակա միջավայրի համար: Մասնակիցներն սկսում են համագործակցել, ընկերանում են, անհրաժեշտ իրեր են իրար փոխանցում են»,-«Փաստի» հետ զրույցում ասում է Անին՝ նշելով, որ ներկայացվող նախագծերը պետք է ունենան բնապահպանական ուղղվածություն և նորարարական բնույթ։

Ասում է՝ նախագծերը պատրաստելիս մասնակիցները հիմնականում ընտրում են աղբահավաքության և ծառատունկի թեմաները: Նմանատիպ նախագծերը, սակայն, չեն համապատասխանում դրամաշնորհի պայմաններին, քանի որ խնդրի լուծում չեն հանդիսանում։ «Տարիքային սահմանափակում չունենք: Իրենց գաղափարներն են ներկայացնում նաև մարզաբնակ դպրոցականները, օրինակ՝ դիմակների վերամշակում, համայնքի համար պլաստիկ կամ չվերամշակվող իրերից խաղահրապարակի ստեղծում և թանգարան թափոններից»,-ընդգծում է մեր զրուցակիցը: Շեշտում է՝ իրենց հիմնական ու վերջնական նպատակը բնապահպանական որևէ խնդրի լուծում տալն է:

«Հնարավոր է՝ ամենասկզբում մի փոքր գաղափար լինի, որը հետագայում ծավալվի մեծ տեմպերով, մի համայնքն օրինակ դառնա հարևան համայնքների համար: Այժմ բոլոր մարզերից էլ ունենք մասնակիցներ, ակտիվությունը նկատելի է: Փնտրում ենք նախագծեր, որտեղ դրամաշնորհը կարող է խթան հանդիսանալ փոփոխության համար։ Միևնույն ժամանակ նախագիծը պետք է լինի իրատեսական ու խթանի համայնքի զարգացմանը»,-եզրափակում է Անի Զաքոյանը՝ ընդգծելով, որ այս նախագծերի կյանքի կոչման ընթացքում տարաբնույթ գաղափարների շուրջ միավորվում են համայնքներն ու մարզերի երիտասարդները:

 

ԼՈՒՍԻՆԵ ԱՌԱՔԵԼՅԱՆ

Մանրամասները՝ «Փաստ» օրաթերթի այսօրվա համարում