Թուրքիայում տարեկան ինֆլյացիան վերջին 19 տարվա առավելագույնին է հասել

Թուրքիայում տարեկան ինֆլյացիան վերջին 19 տարվա առավելագույնին է հասել՝ դեկտեմբերին աճելով մինչեւ 36,08%, հայտնում է Associated Press-ը https://apnews.com/՝ հղում անելով երկուշաբթի օրվա պաշտոնական տվյալներին։

Թուրքիայի վիճակագրական ինստիտուտը հայտնել է, որ դեկտեմբերին սպառողական գների ինդեքսը, նախորդ ամսվա համեմատ, աճել է 13,58%-ով, ինչն ավելի է խաթարել բնակչության գնողունակությունը։

Միաժամանակ պարենային ապրանքների գների տարեկան աճը կազմել է 43,8%։

Ինֆլյացիայի տարեկան մակարդակն ամենաբարձրն է եղել 2002 թվականի սեպտեմբերից։

Երկրում ինֆլյացիան աճում է, քանի որ թուրքական լիրան ռեկորդային նվազագույն մակարդակի է իջել այն բանից հետո, երբ երկրի կենտրոնական բանկը, նախագահ Ռեջեփ Թայիփ Էրդողանի ճնշման ներքո, սեպտեմբերին 5 տոկոսային կետով նվազեցրել է հիմնական տոկոսադրույքը:

«Լիրայի թուլացումը հանգեցրել է ներմուծման, վառելիքի եւ սպառողական ապրանքների թանկացման, ինչի հետեւանքով մոտ 84 միլիոն բնակչություն ունեցող երկրում շատերը դժվարանում են սննդամթերք եւ առաջին անհրաժեշտության այլ ապրանքներ գնել: Շատերն իրենց խնայողությունները պաշտպանելու համար արտարժույթ եւ ոսկի են գնում»,- նշում է գործակալությունը։

Դեկտեմբերին Էրդողանը հայտարարել է լիրայով ավանդները տատանումներից պաշտպանելու միջոցների մասին այն բանից հետո, երբ թուրքական արժույթը դոլարի նկատմամբ հասել է 18,36 պատմական նվազագույնին: Այս հայտարարությունից հետո լիրայի փոխարժեքը բարձրացել է, սակայն դրանից հետո կորցրել է ձեռք բերված արդյունքների մի մասը։ Անցած տարի լիրան դոլարի նկատմամբ արժեզրկվել էր մոտ 44%-ով։

Էրդողանը ձգտում է նվազեցնել փոխառությունների արժեքը՝ աճը խթանելու համար, թեեւ տնտեսագետները պնդում են, որ տոկոսադրույքների բարձրացումը գների թռիչքաձեւ աճը զսպելու միջոց է:

Միեւնույն ժամանակ, ինֆլյացիայի հետազոտման անկախ խումբը, որը կազմված է գիտնականներից եւ նախկին պետական պաշտոնյաներից, ինֆլյացիայի տարեկան մակարդակը 83% է գնահատել: Ըստ նրա՝ նոյեմբերի համեմատ դեկտեմբերին սպառողական գներն աճել են 19,35%-ով։