Ռուսաստանը շահագրգռված է Հայաստանի հետ զարգացնելու փոխադարձ առևտուրը և ներդրումները. ՌԴ փոխվարչապետ

Հայաստանի Հանրապետության փոխվարչապետ Մհեր Գրիգորյանի և Ռուսաստանի Դաշնության փոխվարչապետ Ալեքսեյ Օվերչուկի համանախագահությամբ Երևանում կայացել է Հայ-ռուսական տնտեսական համագործակցության միջկառավարական հանձնաժողովի 20-րդ նիստը։

«Արմենպրես»-ի փոխանցմամբ, նիստի շրջանակներում քննարկվել են առևտրատնտեսական հարաբերությունների զարգացմանը, տրանսպորտի, էներգետիկայի, բարձր տեխնոլոգիաների, առողջապահության, կրթության և փոխադարձ հետաքրքրքություն ներկայացնող այլ ոլորտներում համագործակցությանը վերաբերող հարցեր։

Փոխվարչապետները հանդես են եկել նիստը ամփոփող ելույթներով և նիստի արդյունքում ստորագրել են արձանագրություն։

Փոխվարչապետ Մհեր Գրիգորյանն իր ելույթում, ողջունելով միջկառավարական նիստի մասնակիցներին, ընդգծել է, որ չնայած կորոնավիրուսային համաճարակով պայմանավորված սահմանափակումներին, ինչպես նաև պատերազմի բոլոր ցնցումներին ու տնտեսական հետևանքներին, երկու երկրներին հաջողվել է պահպանել երկկողմ հարաբերությունների զարգացման տեմպերը։ Մհեր Գրիգորյանը նշել է, որ կայացած նիստի արդյունքում հաջողվել է հերթական անգամ խթանել երկու երկրների հարաբերությունների զարգացումը և բացահայտել հայ-ռուսական համագործակցության բոլոր հեռանկարային ուղղությունները։

Ելույթում ՀՀ փոխվարչապետն ընդգծել է, որ 2022 թվականին երկու երկրները նշելու են դիվանագիտական հարաբերությունների հաստատման 30-ամյակը, ինչպես նաև Բարեկամության, համագործակցության և փոխօգնության մասին պայմանագրի ստորագրման 25-ամյակը։ Այս համատեքստում փոխվարչապետը վստահեցրել է, որ հայկական կողմը առավելագույն ջանքեր կգործադրի միջոցառումները պատշաճ կերպով կազմակերպելու նպատակով։

Մհեր Գրիգորյանն ընդգծել է, որ երկու երկրների միջև հարաբերություններն ունեն համընդգրկուն բնույթ և ներառում են միջպետական հարաբերությունների՝ առանց բացառության բոլոր ոլորտները։

Ամփոփելով՝ փոխվարչապետը շնորհակալություն է հայտնել ռուսաստանյան գործընկերներին նիստի շրջանակներում կառուցողական քննարկումների համար և խոսքը փոխանցել Ալեքսեյ Օվերչուկին։

«Ռուսաստանը, ինչպես նախկինում, շարունակում է մնալ Հայաստանի առաջատար առևտրային գործընկերը։ 2021 թվականի հունվար-հոկտեմբեր ամիսներին Ռուսաստանի Դաշնության և Հայաստանի Հանրապետության միջև առևտրաշրջանառությունը կազմել է 2,1 մլրդ ԱՄՆ դոլար՝ 2020 թվականի նույն ժամանակահատվածի համեմատ ավելանալով 9,3 տոկոսով։ Հայաստանը գյուղատնտեսական արտադրանքի և թեթև արդյունաբերության ապրանքների ավանդական մատակարար է։ Ռուսաստանը շարունակել է մեծացնել տրանսպորտային միջոցների, արդյունաբերական սարքավորումների և հանքային ապրանքների մատակարարումը:

Մեր երկիրը շահագրգռված է առավել ակտիվ զարգացնելու փոխադարձ առևտուրը և ներդրումները։ Ռուսական բիզնեսը կարող է արդյունավետ լուծումներ առաջարկել տրանսպորտի, էներգետիկայի, սոցիալական ենթակառուցվածքների, թվային տնտեսության զարգացման համար»,- ասել է ՌԴ փոխվարչապետը։

Նա նշել է, որ տարածաշրջանների միջև կապերն ընդլայնելու, գործարար կապերն ամրապնդելու, համատեղ ձեռնարկություններ ստեղծելու և ներդրումային երկխոսությունն ակտիվացնելու նպատակով ռուսական կողմը հանդես է եկել Ռուս-հայկական գործարար խորհրդի ստեղծման նախաձեռնությամբ:

Նիստի շրջանակներում ստորագրվել են նաև Հայաստանի Հանրապետության կառավարության և Ռուսաստանի Դաշնության կառավարության միջև միջտարածաշրջանային համագործակցության վերաբերյալ 2022-2027 թվականների ծրագիրը, 2022-2023 թվականների համար շրջակա միջավայրի պահպանության ոլորտի համագործակցության ծրագիրը և 2022-2023 թվականներին սպորտի ոլորտում ՀՀ կրթության, գիտության, մշակույթի և սպորտի նախարարության և ՌԴ սպորտի նախարարության միջև փոխըմռնման հուշագրի իրականացման գործողությունների ծրագիրը։