«Մեր մշակած ծրագիրը դեռևս ընթացքում է». «Փաստ»

«Փաստ» օրաթերթը գրում է

Երեկ ՀՖՖ նախագահ Արմեն Մելիքբեկյանը տարեվերջյան մամուլի ասուլիսի ժամանակ անդրադարձավ մի շարք կարևոր հարցերի՝ Ազգային հավաքականի մրցելույթներ և Ազգերի լիգայի հետ կապված ակնկալիքներ, մի շարք ակումբների հետ կապված հարցեր, ֆուտբոլի մասսայականացման խնդիր, «VAR» համակարգի ներդրում և այլն:

Ազգային հավաքական

Մելիքբեկյանը նշում է՝ բոլորիս համար տարին երկու մասի բաժանվեց: «Մեկը գարնանային հատվածն էր, երբ եղան փայլուն հաղթանակներ, ընկերական խաղերից մեկում աշխարհի փոխչեմպիոնի հետ ոչ-ոքի խաղաց մեր թիմը: Եվ աշնանային հատվածը, որտեղ եղան պարտություններ և ոչ-ոքիներ: Ակնհայտ է, որ հաղթանակները բարձրացրեցին նշաձողը, և սկսեցինք ավելին սպասել հավաքականից, բայց աշնանային մրցելույթներից հետո որոշակի հիասթափություն կար, որը ևս բնական էր: Փորձենք գնահատել հավաքականի ամբողջական ելույթը և փաստենք, որ հավաքած միավորներով սա աշխարհի առաջնության ընտրական փուլերում երկրորդ արդյունքն էր: Ե՛վ մարզիչը, և՛ ես բազմիցս ասել ենք, որ մեր խնդիրն էր յուրաքանչյուր խաղում միավորների համար պայքարելը, միավորներ վաստակելը, որը խաղերից յոթում ստացվեց, մեկում պայքար եղավ, բայց միավորներ չվաստակեցինք, երեքում, այո, չստացվեց: Բայց կարևոր ձեռքբերում է այն, որ հավաքականում ներգրավվել են բավականին մեծ թվով ֆուտբոլիստներ, հավաքականը դադարել է նմանվել փակ ակումբի, որտեղ միշտ, գրեթե 80-90 տոկոսով հրավիրվում էին նույն ֆուտբոլիստները: Այժմ ունենք մոտ հինգ տասնյակ ֆուտբոլիստ, որոնց շրջանում ընտրություն է կատարում գլխավոր մարզիչը: Երբ հրավիրում էինք Խոակին Կապառոսին, հստակ ձևակերպել էինք խնդիրը՝ պայքարել հաղթանակի համար Ազգերի լիգայում, պայքարել միավորների համար, ներգրավել նոր ֆուտբոլիստներ Աշխարհի առաջնության ընտրական փուլում, հետագայում էլ պայքարել «Եվրո 2024»-ի ուղեգրի համար: Մեր մշակած ծրագիրը դեռևս ընթացքում է»,-ասում է ՀՖՖ նախագահը:

Ազգերի լիգայի վիճակահանություն

«Փաստը» ՀՖՖ նախագահին հարց ուղղեց Ազգերի լիգայի առաջիկա խաղարկության ֆորմատի, մրցաշարից ակնկալիքների և Ազգային հավաքականի առջև դրված նպատակների վերաբերյալ: «Իմ դիտարկմամբ՝ բավականին բարդ խմբում ենք հայտնվել: Ֆեդերացիայի համար կազմակերպչական առումով բարդ մրցաշար է սպասվում: Հունիսին շատ կարճ ժամանակահատվածում ունենալու ենք չորս խաղ բավականին բարդ մրցակիցների հետ: Նման փորձ երբեք չի եղել: Աշխարհի առաջնությունը տեղափոխվել է նոյեմբեր, և այդ պատճառով Ազգերի լիգայի ֆորմատն այսպիսին է: Պետք է շատ ճիշտ կազմակերպենք ընթացքը: Այս պահին մեր նվազագույն խնդիրն է B խմբից դուրս չմնալը: Կարծում եմ՝ կշտկենք մեր խնդիրները նրանից հետո, երբ նաև ընկերական խաղեր կխաղանք: Շատ բարդ խմբում ենք, բայց կարծում եմ, որ կարող ենք մրցունակ լինել»,-արձագանքեց ՀՖՖ նախագահը:

Հայկական ակումբներ և նրանց շուրջ ստեղծված իրավիճակ

Մելիքբեկյանն առանձնացրեց մի քանի ակումբ: ««Հայասա» ակումբից դեռ պաշտոնական գրություն չենք ստացել, հուսով եմ՝ այն կշարունակի խաղալ, մեզ համար դա կարևոր է: Մյուս ակումբների մասով: Կան մանիպուլյացիաներ, որ փակվում են մարզային ակումբներ: Դիտարկենք «Գանձասար-Կապան», «Սևան» և «Լոռի» թիմերի օրինակները: ՀՖՖ-ն ամեն ինչ չի ասում դեպքերից հետո, որովհետև հարգում է անմեղության կանխավարկածը, այսինքն՝ ամեն ինչի մասին չենք հայտարարում միանգամից, որպեսզի ճնշում չգործադրենք Կարգապահական, հետո արդեն Բողոքարկման կոմիտեների վրա, որոնք անկախ մարմիններ են: 2020 թ.-ի հոկտեմբերի վերջին «Գանձասար-Կապանը» խաղում տեղի ունեցած միջադեպից հետո հայտարարեց, որ փակում է թիմը և գումարը տալիս է բանակին: Իրական պատճառն այն էր, որ մրցավարական անձնակազմի հետ վիճաբանել էին, ծեծի ենթարկել, հարվածել գլխավոր մրցավարին: Դրա համար սպասվում էր երկարաժամկետ որակազրկում: Մարտին «Լոռի» ֆուտբոլային ակումբը հայտարարեց, որ դուրս է գալիս առաջնությունից: Հետագայում ՖԻՖԱ-ից նամակներ ստացանք, որ մոտավորապես 450 հազար եվրոյի չափով պարտք կար: «Սևանի» հայտարարությունը մեծ մանիպուլյացիա է: ՆՈԱ-Սևան հանդիպումից հետո «Սևանի» փաստացի ղեկավարները հանդերձարանում ծեծի են ենթարկել մրցավարին, կան փաստող ապացույցներ, նրանց ևս երկարաժամկետ որակազրկում էր սպասվում: Բոլոր այս միջադեպերը քննվում են: Հետաքրքիր է, որ նման իրավիճակների շիկացում միշտ տեղի է ունենում Ազգային հավաքականի խաղերից առաջ, չգիտեմ՝ պատահականություն է, թե ոչ»,-ասում է Մելիքբեկյանը:

Ֆուտզալ

«Ֆուտզալի հավաքականն առաջին անգամ նման տեղ՝ էլիտում, միավոր վաստակեց: Ընդգրկված էր ամենաբարդ խմբում, արժանապատիվ ֆուտբոլ խաղացին Ռուսաստանի և Վրաստանի հավաքականների դեմ, Ֆրանսիայի դեմ խաղում հաղթում էինք, ցավալիորեն ոչ ոքի խաղացինք: Շատ շուտով կտեսնենք, որ ֆուտզալի հավաքականի հաջողությունները պատահականություններ չեն, այլ շարունակական ընթացք է ունենալու: Հիմա ևս ընդգրկվել ենք ոչ հեշտ խմբում, բայց կարծում եմ՝ պետք է հաղթահարենք այդ արգելքը և դուրս գանք հաջորդ փուլ»,- անդրադառնալով ֆուտզալի հավաքականին՝ նշեց Մելիքբեկյանը:

Մրցավարներ և «VAR» համակարգ

Մեկ մրցավար պատրաստելու համար պետք է բավականին երկար ժամանակ: «Հիմա մեզ մոտ հիմնականում երիտասարդ մրցավարներ են: Մրցավարական կորպուսի աշխատանքը հիմնականում դրական եմ գնահատում: Նախ՝ չեմ տեսնում միտում սխալների մեջ, և երկրորդը՝ ՖԻՖԱ-ի վերաբերմունքը մրցավարական մեր կորպուսին վառ ապացույցն է նրա, որ մեզ մոտ աճ կա: Մեր թե՛ կին, թե՛ տղամարդ մրցավարները սկսեցին մեծ քանակությամբ խաղեր ստանալ Եվրոպայում, ինչը վերջին տարիների համար աննախադեպ էր: Բացի դա, բազմաթիվ հարցերի պատասխաններ կտա «VAR» համակարգի ներմուծումը, հուսամ՝ հաջորդ մրցաշրջանում Հայաստանի առաջնության բոլոր հանդիպումներում կունենանք «VAR» համակարգ»,-ընդգծում է Մելիքբեկյանը:

Ծրագրերի մասին

ՀՖՖ նախագահը նշում է՝ ենթակառուցվածքների զարգացումը կարևորագույն ոլորտ է: «Աշխատում ենք հիմնականում դա անել մարզերում: Արդեն ավարտել ենք փոքր դաշտերի կառուցման առաջին փուլը, ունենք 90 խաղադաշտ 7 մարզում: Երկրորդը խոշոր ենթակառուցվածքների զարգացումն է, անցնող տարում այս առումով ակտիվ ծրագրեր են իրականացվել: Արմավիրում բացվեց ստադիոն, ավարտին են մոտենում Աբովյանի և Վանաձորի ստադիոնների շինարարությունները, գալիք տարվա առաջին կիսամյակում երկուսն էլ կհանձնվեն շահագործման: 2022 թ.-ի առաջին կեսին լուսավորություն կտեղադրվի Գյումրիի քաղաքային ստադիոնում, նույնը կարվի Աբովյանի, ինչպես նաև Երևանի Շենգավիթի ֆուտբոլի դպրոցի խաղադաշտերում: Այս խաղադաշտերում նախատեսում ենք անցկացնել տարբեր տարիքային հավաքականների հանդիպումներ: Բացի դա, արդեն իսկ սկսել ենք նախագծային աշխատանքները և հաջորդ տարվա առաջին կիսամյակում Երևանի կենտրոնում շահագործման կհանձնենք Խորեն Հովհաննիսյանի անվան ֆուտբոլի դպրոցը, որտեղ հնարավորություն կունենա մարզվել 200 երեխա»,-նշում է Մելիքբեկյանը: Նա կարևորում է ֆուտբոլի մասսայականացումը՝ համարելով դա ֆեդերացիայի հիմնական առաքելություններից մեկը: «Սիրողական առաջնության մեկնարկը հաջող ընթացք ունի: Հաջորդը դպրոցական առաջնությունն է, որը մի շարք խնդիրներ է լուծում: Այս երկու նախաձեռնություններին ֆեդերացիան մեծ կարևորություն է տալիս»,-եզրափակում է ՀՖՖ նախագահ Արմեն Մելիքբեկյանը:

Լուսինե Առաքելյան

Մանրամասները՝ «Փաստ» օրաթերթի այսօրվա համարում