Այն ինչ տեղի է ունենում Բաղրամյանում գեղեցիկ է, բայց հավատ չի ներշնչում, որովհետև ոստիկանության փաղաքշանքն արհեստական է. փորձագետ

Այն ինչ այսօր տեղի է ունենում Բաղրամյան պողոտայում գեղեցիկ է, բայց հավատ չի ներշնչում, որովհետև ոստիկանության փաղաքշանքը կարծես արհեստական է։ Այսօր լրագրողների հետ հանդիպմանը նման կարծիք հայտնեց քաղաքական փորձագետ Վիգեն Խաչատրյանը՝ նշելով, որ մինչև հասարակությունը չձևավորի այլընտրանքային քաղաքական ուժ, որը կփորձի իրավիճակը փոխել, ամեն ինչ կմնա նույնը։

«Այսօր չկան այլընտրանքային արդյունավետ կառավարողներ, որովհետև Հայաստանն ընտրել է փակուղային ուղին։ Ակտիվիստներին ես հարգանքով եմ վերաբերվում, բայց չեմ հասկանում։ Ես ինձ համարելով փորձառու մարդ, մտահոգված եմ, որ մարդիկ, չհավատալով իշխանություններին հեռանում են, ու միակ պահողը այսօր հավատն է ակտիվիստների նկատմամբ։ Չեմ կարող ասել, գուցե շինծու է այս ամենը, բայց հասարակությունը հասկանում է, որ ընդվզումը կարող է բերել փոփոխությունների»,- ասաց նա։

Հասարակական գործիչ, ՀՀ մարդու իրավունքների առաջին պաշտպան Լարիսա Ալավերդյանը նշեց, որ ինքն իր համերաշխությունն է հայտնել սկսված շարժմանը հենց առաջին պահից։ Նա ընդգծեց, որ Հայաստանում սկսվել են ուսյալ երիտասարդների շարժումները, ինչը ոգևորիչ է։

«Տարիներ առաջ ես միշտ ասում էի, որ գալու է նոր սերնդի ժամանակը և այդպես էլ կատարվում է։ Այս սերունդը թաթախված չի եղել այն բացասական երևույթների մեջ, որոնք իմ սերնդակիցներն են տեսել։ Սա առաջին շարժումը չէ, որը գալիս է սոցիալական խնդիրներից։ Հիշենք տրանսպորտի թանկացման դեմ և կուտակային կենսաթոշակների դեմ պայքարը։ Սա գրագետ, ուսյալ խավ է, որի համար կարևոր է արժանապատվության խնդիրը»,- ասաց նա։

Լարիսա Ալավերդյանը նշեց, որ ինքն ուղղակի պահանջում ու հորդորում է  իշխանություններին հետ կանգնել հիմք չունեցող որոշումից. «Սա բոմժական շարժում չի, սա ուսյալ սերնդի շարժում է։ Կոչ եմ անում, որ իշխանությունը գա ընդառաջ ժողովրդին»:

Աղբյուրը՝ Tert.am