Մենք ունենք մշակված, քննարկված բազմաթիվ տարբերակներ՝ ապաշրջափակման

Հարցազրույց ՀՀ փոխվարչապետ Մհեր Գրիգորյանի հետ

- Պարոն Գրիգորյան, ծանո՞թ եք առաջիկայում ստորագրվելիք փաստաթղթի բովանդակությանը:

- Այս պահին փաստաթուղթ ստորագրելու վերաբերյալ որեւէ պայմանավորվածություն չկա։

- Այդ դեպքում ի՞նչ նպատակ է հետապնդում  Փաշինյան-Ալիեւ բրյուսելյան հանդիպումը։

- Էդ մասով ես կարծում եմ՝ ավելի ճիշտ կլինի, որպեսզի Դուք գրավոր հարցնեք, եւ գրավոր պատասխան լինի, բայց այն մասով, որ պետք է փաստաթուղթ ստորագրվի, այդ մասով ես որեւէ նման տեղեկություն չեմ կարող հաստատել։

- Իսկ դեմարկացիայի եւ դելիմիտացիայի փաստաթուղթը, ինչի մասին Նիկոլ Փաշինյանն ասում, թե ռուսներից առաջարկ է ստացել, ստորագրվելո՞ւ է առաջիկայում։

- Էդ գործընթացի հետ կապված որեւէ այց կամ որեւէ հանդիպում նշանակություն չունի։ Դա, ամեն դեպքում, գործընթաց է, որը պետք է իրականացվի, եւ որեւէ հանդիպում լինել կամ չլինելու հարցը դրա վրա ուղղակի ազդեցություն չունի։

- Բրյուսելյան հանդիպման ձեւաչափի, օրակարգի վերաբերյալ որեւէ տեղեկության չե՞ք տիրապետում։

- Քանի որ դա իմ հանդիպումը չէ, ես կոռեկտ եմ համարում, որ էդ հարցերով գրավոր դիմեք ու ստանաք պատասխան, որովհետեւ կոռեկտ չի լինի, որ ես մեկնաբանեմ հանդիպման օրակարգը։

- Երեկվանից մարդիկ կառավարության շենքի դիմաց միտինգ են անում՝ պահանջելով հրապարակել ստորագրվելիք փաստաթղթի բովանդակությունը, ուրեմն չեղած կամ գոյություն չունեցո՞ղ փաստաթղթի մասին են խոսում։

- Ես չգիտեմ՝ ով է միտինգ անում, ինչի համար են միտինգ անում, բայց ես նորից ասում եմ՝ էս պահին էդ հանդիպման հետ կապված փաստաթուղթ չկա։

- Դուք մշտապես պնդել եք, որ միջանցքային տրամաբանությամբ որեւէ քննարկում չկա։ Եթե «տրամաբանությամբ» բառը հանենք, կստացվի՝ միջանցք տրամադրելու հարց չի բանակցվում։

- Հիմա էլ եմ հաստատում եւ վերահաստատում, դա ոչ միայն ես եմ ասել, էլի կողմեր կան, որոնք դրա մասին խոսում են։

- Տեսնում ենք, որ Ադրբեջանի գերնպատակն այս պահին Սյունիքով միջանցք ստանալն է։ Ձեզ նման բան պարտադրո՞ւմ են։

- Ի՞նչ է նշանակում՝ ձեզ պարտադրում են։

- Օրինակ՝ վերջնագիր ներկայացնեն, շանտաժով ճնշեն կամ գուցե գործընկերային մակարդակում առաջարկեն, որ «Խաղաղության համաձայնագրին» եւ ապաշրջափակմանը հասնելու համար պետք է անպայման միջանցք տրամադրել։

- Ես առաջին օրվանից՝ եռակողմ հանդիպման, եւ հիմա էլ ասում եմ եւ վերահաստատում եմ՝ եռակողմ աշխատանքային խումբը գործում է 2020 թ․ նոյեմբերի 9-ի եւ 2021 թ․ հունվարի 11-ի մանդատի շրջանակներում, որոնցում որեւէ խոսք միջանցքի կամ միջանցքային տրամաբանության մասին չկա եւ գոյություն չունի։ Ըստ այդմ՝ որեւէ պարտադրանքի մասին խոսել այն հարթակում, որի մասին Դուք հարց եք տալիս, իմաստ չունի, որովհետեւ չկա նման բան։

- Բայց Ալիեւը, նաեւ Թուրքիայի նախագահը քանիցս ասել են, որ իրենց նպատակը Սյունիքով միջանցք ունենալն է։

- Դե, Դուք հարցնում եք՝ իմ վրա ճնշում կա՞, ես ասում եմ՝ ոչ, չկա։

- Այդ դեպքում ինչպե՞ս հասկանանք Փաշինյանին, երբ ասում է՝ Գորիս-Կապան, հետո էլ՝ Կապան-Ճակատեն ճանապարհը տվեցինք, որպեսզի միջանցք չտանք։ Այսինքն՝ ճանապարհները չտալու այլընտրանքը միջա՞նցքն էր լինելու։

- Ես կարծում եմ, որ էդ տիպի հարցերը, քանի որ պատասխանը պետք է ամբողջական եւ բազմաբաղադրիչ լինի, ես կնախընտրեի, որ գրավոր հարցնեք, որովհետեւ կոնտեքստից դուրս էպիզոդի վերաբերյալ պատասխաններ տալը սխալ կընկալվի, նաեւ՝ Ձեր կողմից։

- Բայց իշխանությունը, հատկապես՝ Նիկոլ Փաշինյանը, բաց, թափանցիկ եւ ազնիվ չի խոսում հանրության հետ։ Էպիզոդիկ ասում է բաներ, որոնք բազմաթիվ հարցեր են առաջացնում։ Եթե միջանցքի հարց չի քննարկվում, ապա ինչո՞ւ եք միջանցք չտալու դիմաց ճանապարհ տալիս։

- Ես չեմ կիսում Ձեր պնդումը։ Դուք ասում եք՝ միջանցքի դիմաց տալ ճանապարհ, մի հատ բացատրեք՝ ի՞նչ եք ասում։

- Չեմ ասում՝ Փաշինյանն է ասում։ Նա կառավարության նիստին հայտարարեց, որ այդ ճանապարհը չտալու գինը լինելու էր միջանցքային տրամաբանությունը, որը, ըստ նրա, անընդունելի է ձեզ համար։

- Ես խնդրում եմ՝ ինձ տվեք հարցեր, որոնք իմ տիրույթում են եւ վերաբերում են իմ անելիքներին ու գործունեությանը։ Մնացած բոլոր դեպքերում դիմեք գրավոր եւ ստացեք պատասխանները։

- Տարօրինակ է, որ այս թեմային ամենամոտ կանգնած պաշտոնյաներն անգամ խուսափում են մեկնաբանել բաներ, որոնք ասել է կառավարության ղեկավարը, եւ կարծես թե չեն ցանկանում պատասխանատվություն ստանձնել նրա ասածների համար․․․

- Ձեր նախորդ եզրահանգումն էլ էր սխալ, որովհետեւ ես նման բան չասացի։ Ես Ձեզ ասացի, որ ես գործում եմ նոյեմբերի 9-ի եւ հունվարի 11-ի մանդատի շրջանակներում։

- Լավ, Նիկոլ Փաշինյանը հայտարարեց, որ դեմարկացիայի եւ դելիմիտացիայի վերաբերյալ Ռուսաստանից երեք առաջարկ է ստացել, եւ երեքն էլ ընդունելի է ձեզ համար։ Ծանո՞թ եք այդ առաջարկների բովանդակությանը։

- Էդ մանրամասնությամբ ես հիմա չեմ կարող մեկնաբանել։

- Դուք նաեւ ապաշրջափակման հարցերով ձեւավորված եռակողմ հանձնաժողովի անդամ եք, կասե՞ք, թե ուր եք հասել այդ քննարկումներում եւ կարողանո՞ւմ եք ընդհանուր հայտարարի գալ։

- Էս պահին ես չեմ կարող ասել, որ մենք ունենք ընդհանուր հայտարարի եկած իրավիճակ, բայց մենք ունենք մշակված, քննարկված բազմաթիվ տարբերակներ ապաշրջափակման տեխնիկական եւ փորձագիտական մակարդակում՝ ըստ տեխնիկական հնարավորությունների, բայց դեռեւս վերջնական պայմանավորվածություն, թե որոնք են գործելու, այս պահին չունենք։

ՀԳ․ Երեկ ոչ պաշտոնապես տեղեկություն տարածվեց, որ մինչեւ դեկտեմբերի 15-ին Բրյուսել մեկնելը՝ Փաշինյանը նոյեմբերի 26-ին կմեկնի Սոչի եւ այնտեղ Պուտինի ներկայությամբ հանդիպում կունենա Ալիեւի հետ։ Այս տեղեկությունը դեռեւս չեն հաստատել, բայց եթե ճիշտ է, կստացվի՝ Սոչիում կորոշեն, թե Բրյուսելում ինչ կստորագրվի, կամ կստորագրվի՞ որեւէ բան, թե՞ ոչ։ Ինչ վերաբերում է Սյունիքով միջանցքին, ապա, հիշեցնենք, մեկ շաբաթ առաջ ԱԽ քարտուղար Արմեն Գրիգորյանն իրանական «Tasnim» լրատվական գործակալությանը տված հարցազրույցում չէր հերքել Սյունիքով միջանցք տրամադրելու հավանականությունը՝ նշելով, որ Հայաստանը պատրաստ է գոյություն ունեցող բոլոր ճանապարհները տրամադրել, որպեսզի ե՛ւ Ադրբեջանը, ե՛ւ Թուրքիան երթեւեկելու համար օգտվեն այդ ճանապարհներից: Այսինքն՝ միջանցք չեն տա, բայց ճանապարհ կտրամադրեն։ Նույն բանն ասել էր նաեւ Մհեր Գրիգորյանը՝ հուլիսի 13-ին «Հրապարակին» տված հարցազրույցում, որ միջանցքի հարց՝ ոչ, բայց ճանապարհի հարց քննարկվում է, չի բացառվում՝ հենց Մեղրիով։ Ըստ էության, նույն միջանցքն է լինելու, բայց իրենք անունը դրել են «ճանապարհ», որ մեղմեն «միջանցքային տրամաբանության» վնասակարությունը։