Մենք քաղաքական ակցիաներ չենք մեկնաբանում. Բի-2 խմբի տնօրենը՝ Բաղրամյան պողոտայում ցույցի մասին

Մենք քաղաքական ակցիաներ չենք մեկնաբանում։ Այս մասին Բի-2 ռոք խմբի մամլո-ասուլիսի ժամանակ հայտարարեց խմբի տնօրեն Իգոր Դանիլկինը։ Մենակատարներ Լյովան եւ Շուրան ներկա չէին ասուլիսին, քանի որ պատրաստվում էին այսօր երեկոյան ժամը 19։00-ին Կ. Դեմիրճյանի անվան մարզահամերգային համալիրում կայանալիք համերգին։

Մամլո-ասուլիսն ներկա էր նաեւ Եգոր Գլումովը, որը զրուցի սկզբում նշեց, որ էլեկտրաէներգիայի սակագնի թանկացման դեմ ցույցը դեռ շարունակվում է եւ կատակեց՝ առաջարկելով անջատել սրահի լույսերը։

Նշենք, որ Բի-2 խմբի երեւանյան համերգը կազմակերպել են One Production-ը, Radio Van-ը եւ Ucome-ը։ Վերջին երկուսը իրականացրել են նաեւ բարեգործական նախագիծ՝ «Հանձնիր արյուն եւ ստացիր Բի-2-ի տոմս» խորագրով։  

Գլումովի խոսքով՝ նա վստահ էր, որ ակցիան նման մեծ արձագանք է ունենալու, քանի որ խումբը բավականին հանրահայտ է, եւ նախագիծը բոլորի ուշադրությունը հրավիրեց արյան դոնորության խնդրին։ Ի դեպ, արյունաբանական կենտրոնի տնօրեն Սմբատ Դաղբաշյանը տեղեկացրեց, որ  ակցիայի շրջանակներում 192 դոնոր արյուն է հաձնել։

«Արյունը ներարկվել է օնկոլոգիական հիվանդություններով՝ հատկապես արյան լեյկիմիայով, տառապող 80 երեխաներին»,- ասեց Դաղբաշյանը։

«Կարող եմ միայն շնորհակալություն հայտնել այս բարեգործական նախագիծը կազմակերպելու համար։ Մոսկվայում մենք նաեւ մասնակցում ենք «Նվիրիր կյանք» բարեգործական ծրագրին»,- իր հերթին նշեց խմբի տնօրենը։

Լրագրողների հարցին՝ թե ինչ են նրանք մտածում Հայաստանում էլեկտրաէներգիայի սակագնի թանկացման դեմ կազմակերպված ցույցի մասին, Իգոր Դանիլկինը նշեց, որ խմբի գործունեությունը քաղաքականությունից դուրս է։ Իսկ այն տեսակետին, թե ռոք երաժշտությունն ինքնին բողոք է, տնօրենը պատասխանեց, որ նրանք սկզբունքորեն չեն մեկնաբանում քաղաքական հարցերը։