Սփյուռքի նախարարը PR դպրոցի երկրորդ հոսքի շրջանավարտներին է հանձնել ավարտական դիպլոմները

ՀԱՍԱՐԱԿՈՒԹՅՈՒՆ 22 Դեկտեմբեր, 2015 20:41

ՀՀ սփյուռքի նախարար Հրանուշ Հակոբյանը դեկտեմբերի 22-ին ընդունել է Հայաստանի PR դպրոցի ուսանողներին: «Հայկական Փի Ար ասոցիացիա» գիտատեղեկատվական հասարակական կազմակերպության նախաձեռնությամբ ստեղծված PR դպրոցում մասնագիտանում են տարբեր գերատեսչությունների, կառույցների հանրային կապերի մասնագետներ և լրագրողներ:

Եռամսյա դասընթացների ավարտին ամփոփիչ խոսքով հանդես է եկել ՀՀ սփյուռքի նախարար Հրանուշ Հակոբյանը: Ողջունելով շրջանավարտներին՝ նախարարը նշել է.«21-րդ դարը գաղափարի և գիտելիքի դար է, և ձեզանից յուրաքանչյուրը պետք է ձգտի լինել մրցունակ, ստեղծագործաբար ու նվիրումով մոտենա իր աշխատանքին: Իսկ լրագրողի աշխատանքը նախևառաջ ենթադրում է օբյեկտիվություն, ազնվություն և արդարություն»:

Հանդիպման ընթացքում նախարարը երկար տարիների իր մասնագիտական փորձը, իր նկատառումները եւ դիտարկումներն է ներկայացրել պետական համակարգում հանրային կերպարի ձևավորման առանձնահատկությունների և պաշտոնյա կանանց պատշաճ տեսքի, հրապարակային ելույթների առանձնահատկությունների մասին: Հրանուշ Հակոբյանն իր խոսքում կարևորել է հանրային կապերի գրագետ մասնագետների դերը Հայաստանի ապագայի կերտման և Հայաստան-Սփյուռք կապի ամրապնդման գործում:

Հանդիպման ընթացքում մասնակիցներն, ամփոփելով անցած ամիսների ընթացքում կուտակած փորձն ու գիտելիքները, ներկայացրել են կատարված ավարտական աշխատանքները, որից հետո նախարարը PR դպրոցի երկրորդ հոսքի շրջանավարտներին հանձնել է ավարտական դիպլոմները:

«Հայկական Փի Ար ասոցիացիա» գիտատեղեկատվական ՀԿ նախագահ Աստղիկ Ավետիսյանը նշել է. «Անցած մեկ տարվա ընթացքում PR դպրոցը հնարավորություն է ընձեռել ունկնդիրներին ծանոթանալու հանրային կապերի մասնագետին անհրաժեշտ գործիքներին, ձեռք բերել կիրառական գիտելիքներ: Նրանց են փոխանցվել Հայաստանում առավել հայտնի մասնագետների փորձն ու հմտությունները: 128 դիմորդներից 17-ն է ընդունվել PR դպրոց, որոնցից միայն 13-ն այսօր ստացան դիպլոմներ: Մեզ համար կարևորվում է կրթության որակը, իսկ վերջին դասին նախատեսված է Հայաստանում հայտնի հանրային կերպարի հետ հանդիպում: Այս անգամ ընտրվեց ՀՀ սփյուռքի նախարար Հրանուշ Հակոբյանը, ով հետաքրքիր ճանապարհ է անցել և հաղթահարել է բազմաթիվ խոչընդոտներ»:

Հանդիպման ավարտին ՀՀ սփյուռքի նախարարը հանրային կապի մասնագետներին ու լրագրողներին կոչ է արեց քրտնաջան աշխատանքով ձգտել հաջողությունների.«Կուզեմ, որ լավ լրագրողներ դառնաք և որ ձեր նյութերի ներքո դրված ստորագրությունները ձեր իմացության եւ ուժի վկայությունը դառնան»: