ՌԴ ՊՆ-ն հաղորդագրություն է տարածել

Ռուսական խաղաղապահ զորակազմի հումանիտար արձագանքման կենտրոնի մասնագետները «Մերսի» բարեգործական հիմնադրամի ներկայացուցչի հետ միասին հումանիտար օգնություն են տրամադրել Լեռնային Ղարաբաղի հեռավոր շրջաններում բնակվող բազմազավակ ընտանիքներին և տեղահանված անձանց:

«Ռուսաստանի խաղաղապահ զորակազմի ուժերով այսօր ակցիա է իրականացվել Գիշի համայնքում: Ակցիան անցկացվել է միջնակարգ դպրոցում, որտեղ 150 աշակերտ է սովորում: Առաջին, երկրորդ, երրորդ և չորրորդ դասարանների աշակերտներին ավելի քան 50 նվեր է հանձնվել՝ պայուսակ, գրչատուփ, գրիչներ, տետրեր, մատիտներ, ֆլոմաստերներ, այն ամենն ինչ կարող է պետք գալ դասերի ժամանակ: Տվյալ բնակավայրում ավելի քան 1000 մարդ է ապրում, որոնցից յուրաքանչյուրին անհատական նվերներ են հանձնվել՝ բաճկոններ, ջինսեր, վերնազգեստներ, հագուստ՝ փոքրերիկ և մեծահասակների համար»,- ասել է խաղաղապահ զորակազմի ներկայացուցիչ Դմիտրի Տուսիդին:

Ինչպես հայտնում է ՌԴ ՊՆ մամուլի ծառայությունը, հումանիտար ակցիա է իրականացվել նաև Մարտունիի շրջանի Գիշի համայնքի մանկապարտեզում: Գյուղի բնակիչներին ավելի 2 տոննա օգնություն են փոխանցել՝ կազմված դպրոցական պարագաների, մանկական և մեծահասակների կոշիկներից, հագուստից:

Նշվում է, որ հումանիտար օգնություն է տրամադրվել նաև Շուշիից տեղահանված բնակիչներին:

Հիշեցնենք, որ նոյեմբերի 9-ին Ռուսաստանի, Հայաստանի և Ադրբեջանի ղեկավարները Լեռնային Ղարաբաղում ռուս խաղաղապահների տեղակայման շուրջ պայմանավորվածություն են ձեռք բերել, ստորագրվել է հայտարարություն, որով Ադրբեջանին են անցնում Արցախի յոթ շրջանները, Շուշին ու Հադրութը` բացառությամբ մի գյուղի, գյուղեր Ասկերանի ու Մարտունու շրջանից, ինչպես նաև Մարտակերտի շրջանի Թալիշ և Մատաղիս գյուղերը։