ՄԱԿ գլխավոր քարտուղարը Covid-19-ի դեմ պատվաստանյութի տարածման գործընթացն անբարոյական եւ հիմար է անվանել

ՄԱԿ գլխավոր քարտուղար Անտոնիո Գուտերեշը դատապարտել է Covid-19 պատվաստանյութի անարդար տարածումն ամբողջ աշխարհում՝ հայտարարելով, որ դա անբարոյական եւ հիմար է, հայտնում է CNBC-ը:

Գուտերեշը ելույթ է ունեցել Առողջապահության համաշխարհային կազմակերպության կազմակերպած ճեպազրույցում, որտեղ պաշտոնատար անձինք հաստատել են յուրաքանչյուր երկրի բնակչության 40%-ին մինչեւ տարեվերջ, իսկ 70%-ին՝ մինչեւ 2022 թվականի կեսերը պատվաստելու իրենց նպատակը:

ԱՀԿ-ի գլխավոր տնօրեն Թեդրոս Ադանոմ Գեբրեեսուսը նշել է, որ Աֆրիկայի բնակչության 5%-ից էլ պակասը լիովին պատվաստված է, մինչդեռ բարձր եւ միջինից բարձր եկամուտ ունեցող երկրներն օգտագործել են արտադրված պատվաստանյութերի 75%-ը: «Պատվաստանյութերի արդար բաշխման բացակայությունը ոչ միայն անբարոյականության, այլեւ հիմարության հարց է»,- ասել է Գուտերեշը:

Առողջապահության պանամերիկյան կազմակերպության տնօրեն, դոկտոր Կարիսա Էթյենն ասել է, որ Լատինական Ամերիկայում եւ Կարիբյան ավազանում է Covid-19-ի դեմ ամբողջությամբ միայն 37%-ն է պատվաստվել, ինչը կրկնակի քիչ է, քան Կանադայում, քանի որ զարգացող տնտեսությունները պայքարում են կենսական կարեւոր պատվաստանյութեր ստանալու համար:

«Եթե մենք թույլ տանք վիրուսին շարունակել աշխարհի հարավում տարածվել անտառային հրդեհների պես, վտանգ կա, որ մի օր, իսկ այդ օրը կարող է շատ շուտ գալ, կհայտնվի մեկ այլ տարբերակ, որը կկարողանա դիմակայել պատվաստանյութերին»,- ասել է Գուտերեշը: «Եւ բոլոր պատվաստման ջանքերը, որոնք կատարվել են զարգացած երկրներում՝ ամբողջ բնակչությանը մեկ, երկու կամ երեք անգամ պատվաստելու համար, կփլվեն, եւ այդ մարդիկ պաշտպանված չեն լինի»: