Միքայել Պողոսյանն ու Աննա Հարությունյանը (Աննա Մաքսիմ) առաջին անգամ համատեղ աշխատանք են ներկայացրել

«Հայ հայը»․ այսպես է կոչվում ֆիլմը, որը համառեժիսորությամբ ներկայացրել են Միքայել Պողոսյանն ու դերասանուհի Աննա Հարությունյանը, ով այսուհետև ներկայանում է Աննա Մաքսիմ բեմական անունով։ Երեկ կայացավ ֆիլմի պրեմիերան, որի հետաքրքիր դրվագները ֆիքսել է Tert.am Life–ը։

Ֆիլմի սցենարի հեղինակը Միքայել Պողոսյանն է: Այստեղ խաղում են Միքայել Պողոսյանը, Սերգեյ Դանիելյանը, Ժիրայր Բաբազյանը, Տրդատ Մակարյանը, Իրինա Դանիելյանը, Մարիամ Դավթյանը, Նարինե Ալեքսանյանը, Գեորգի Հովակիմյանը, Տիգրան Գյուլումյանը:

Խոսելով ֆիլմի ստեղծման մասին՝ Աննան ասաց․ «Գաղափարը ոչ միայն ֆիլմ ստեղծելն էր, այլև մեր այսօրվա իրականության խտացումն ու պոռթկումն էր մեր մեջ՝ որպես արվեստագետներ: Ամենակարևոր հարցը, որ մեզ հետաքրքրում էր՝ ինչպիսի՞ն է այսօրվա հայը, ի՞նչ անելքներ ունի, ինչո՞ւ ենք մենք պարբերաբար նույն խնդրի առաջ ենք կանգնում, ինչո՞ւ է պատմությունը կրկնվում և ինչո՞ւ մենք դասեր չենք քաղում այս պատմությունից: Այս բոլոր հարցադրումները թույլ տվեցին, որպեսզի ստեղծվի այս ֆիլմը, որն այլևս չի փառաբանում հայ ազգին՝ որպես բացառիկ ազգի, և մեր հերոսը՝ Հայը, վերջում ասում է՝ ես այլևս չեմ ուզում լինել բացառիկ իմ մշակույթով, պատմությամբ, թագավորությամբ, անցյալով: Ես ուզում եմ լինել այնպիսին, ինչպիսին՝ կամ, և լինել երջանիկ: Ամեն հայ պետք է միաբանվի, ոչ թե բոլոր հայերն իրար հետ, այլ ամե հայ հենց ինքն իր հետ պետք է միաբանվի՝ իր ցանկությունների, հնարավորությունների ու իրականության հետ: Ես այս բանն ուզում եմ, բայց արդյոք պատրաստ եմ դրան։ Ֆիլմի հերոսը տարբեր ցանկություններ ունի, բայց պետք է հասկանա՝ արդյոք համապատասխանո՞ւմ է այդ կերպարին: Մենք՝ բոլորս, այսօր մեզ համարում ենք մի կարևոր օղակ, բայց արդյոք մենք պատրաստվե՞լ ենք, այդ կրթությունն ու դաստիարակությունն ունե՞նք այդ օղակը լինելու համար: Կարծում եմ՝ ֆիլմն իր մեջ ներառում է մեր ժամանակվա արդիական խնդիրներ, բայց պատասխաններ չի տալիս, որովհետև արվեստը չի կարող պատասխաններ տալ, բայց կարող է ճիշտ հարցադրումներ անել»։

Աննան նշեց, որ նախ և առաջ ինքը գնացել է Միքայել Պողոսյանի նպատակի հետևից, քանի որ ֆիլմի հեղինակը նա է։ Միքայել  Պողոսյանը հիմնականում եղել է կադրում, Աննան Կադրից դուրս։ Որպես ռեժիսոր՝ Աննան դիտարկել է Միքայել Պողոսյան արտիստին։

«Միքայել Պողոսյանի հետ մենք ընկերական հարաբերություններ ունենք։ Առաջին անգամ էր, որ իր հետ աշխատում էի որպես ռեժիսոր: Ինձ համար արտիստական լայնամասշտաբ մտածողությունը շատ հետաքրքիր էր։ Ինձ համար շատ կարևոր էր այդ ճանապարհով անցնելը, քանի որ ես պատրաստվում եմ իմ դեբյուտը նկարահանել։ Սա ինձ համար հիանալի դպրոց եմ համարում։ Եթե ֆիլմը հաջողվի հանդիսատեսի համար, մեծ բավականություն կստանամ ու արդեն կանցնեմ իմ ապագա քայլերին»,– ասաց նա։

Միքայել Պողոսյանն էլ նկատեց, որ իր ֆիլմերը, սովորաբար, նկարահանվում են 26-30 օրվա ընթացքում, «Հայ Հայը» նկարահանվել է ընդամենը  11 օրում: «Վերջին իրադարձություններից ելնելով՝ ամեն մեկս մեր տեղում պետք է արձագանքեինք, ես էլ այսպես արձագանքեցի։ Սա ինձ համար շատ կարևոր ֆիլմ է. այսպիսի հուզմունք երբեք չեմ ապրել ոչ մի ֆիլմի պրեմիերայից առաջ, որովհետև սա, հուսով եմ, բոլորիս մասին է»,- ասաց  նա։

Միքայել Պողոսյանը նշեց, որ այստեղ նույն հագուստով է, ինչ ներկայացել է «Խաթաբալադայում»։

Լուսանկարները՝ Գրիգոր Հովսեփյանի