Մեր շփոթահար հասարակությունը հեռացել է իր արմատներից». «Փաստ»

«Փաստ» օրաթերթը գրում է

Վերականգնել ենք լեգենդար «Հայրենիքի ձայն» թերթի հրատարակումը, որը 1965 թ.-ին սկսեց Վահագն Դավթյանը՝ դառնալով դրա գլխավոր խմբագիրը: «Կարևոր է, որ արժանավորապես շարունակենք այդ լույս, մշակույթ տարածող հրաշալի թերթի ավանդույթները: Մեր բոլոր ընթերցողները բարձր են գնահատում այս նախաձեռնությունը, և հուսամ, որ մեր ամսաթերթը կկատարի իր ֆունկցիան: Հաջորդ տարի կլրանա թերթի գլխավոր խմբագիր Վահագն Դավթյանի 100-ամյակը, «Հայրենիքի ձայնը» պատրաստվում է այդ նշանավոր հոբել յանին:

Մեր առաջին համարը, որը լույս կտեսնի այս ամիս, նվիրված է Ռաֆայել Քոթանջյանին, որի ծննդյան ամիսն է սեպտեմբերը: Մենք ցանկանում ենք նախ և առաջ մեր մեծերի պայծառ պատկերը դնել մեր հասարակության առջև, որովհետև Ռաֆայել Քոթանջյանը, Սոս Սարգսյանը, Հովհաննես Շիրազը, Մարո Մարգարյանը, Պարույր Սևակը, Հովհաննես Թումանյանը և այլք կերտեցին հայ հոգին: Բարեբախտություն է, որ Ռաֆայել Քոթանջյանը մեզ հետ ու մեր կողքին է, ցանկանում ենք մեր վարպետին արժանի պատիվը տալ: Այդպես էլ պետք է շարունակենք, յուրաքանչյուր ամիս ընթերցողներին կներկայացնենք մեր մշակույթի լավագույն դեմքերին:

Կտրականապես դեմ եմ միջակությանը, քանի որ ամեն մի միջակ մակարդակ, վատ բովանդակություն ունեցող գիրք, ամեն մի անհաջող ներկայացում նշանակում է մեկ դիրք հանձնել թշնամուն: Սա ռազմական վիճակ է հայ մշակույթի մեջ, և մենք պարտավոր ենք բարձր գագաթներին ուշադրություն դարձնել: Սա մեր նպատակն է, թերթը պետք է կատարի այս խնդիրը: Այն ժամանակ, երբ Վահագն Դավթյանը խմբագրում էր թերթը, «Սովետական (ապա՝ Վերածնված) Հայաստան» ամսագիրը, առանձնակի ուշադրություն է դարձրել հայ մշակույթի գագաթներին»,-«Փաստի» հետ զրույցում ասում է Համահայկական գրողների միության նախագահ, գրականագետ Աբգար Ափինյանը:

Ընդգծում է՝ ամսաթերթը շարունակել է Վահագն Դավթյանի ավանդույթները, բայց նորովի: «Պատահական չէ, որ մեր խորհրդի որոշմամբ թերթի գլխավոր խմբագիր է նշանակվել տաղանդավոր բանաստեղծուհի Սուսաննա Ղազարյանը: Նա ցանկանում է շարունակել և՛ դասական ավանդույթները, և՛ նոր շունչ հաղորդել «Հայրենիքի ձայն»-ին»: Երիտասարդությանը հրավիրում ենք պայքարի՝ մտնենք ասպարեզ և վերականգնենք Հայաստանը: Մեր երկիրը վտանգված է, թշնամին իր առաջին հարվածն ուղղել էր հայ հոգուն և հայ մշակույթին: Ի պատասխան՝ պետք է նորից բարձրացնենք մեր մշակույթը»,-հավելում է գրականագետը:

Փաստորեն, մեր երկրի համար այս ծանր ժամանակաշրջանում թերթի հրատարակումը չի կարող պատահական լինել:

«Այո, սա ունի կոնկրետ նպատակ: Վստահ ուզում եմ ասել, որ այն ողբերգությունը, որը տեղի ունեցավ Հայաստանում, մեր ժողովրդի հետ, սկսվել էր մշակույթից: Տարիներ շարունակ մեր մշակույթի ազնվական դեմքն աղավաղեցին, օտար հոսանքներ, օտար ազդեցություններ, Հայաստանում վխտացող աղանդավորական կազմակերպություններ և օտար հովերով տարված հայաստանցի գործիչներ, մոռացան հայրենի մշակույթը: Օտարամոլությունն այսօր դարձել է հայ մշակույթի դեմքը: Ահա թե ինչու մեզանում պակասեցին ազնիվ հոգիներ, առողջ դատող մարդիկ, իր ոգին կորցրած հայը պատերազմում այդ ողբերգության մեջ պետք է դներ մեր ժողովրդին ու մեր երկիրը: Մշակույթը համարվում է ամենակարևոր մարտադաշտը, պետք է վերականգնենք մեր ազգային ավանդույթները և երկրի նկարագիրը պետք է փոխվի:«Հայրենիքի ձայնն» ունի այդ առաքելությունը»,-նշում է մեր զրուցակիցը:

Գրականագետն ընդգծում է՝ ակնհայտ է, որ այսօր գործ ունենք փլուզված հիմքերով պետականության հետ: «Բոլոր ոլորտներում քանդել են հիմքերը: Մեր խնդիրն է այսօր վերականգնել ազգային կրթության, մշակույթի հիմքերը: Աստիճանաբար ժողովուրդը ուշքի կգա, կհասկանա, թե ինչ ավանդույթների ժառանգորդ է: Այսօր մեր շփոթահար հասարակությունը հեռացել է իր արմատներից»,եզրափակում է Համահայկական գրողների միության նախագահ Աբգար Ափինյանը:

Մանրամասները՝ «Փաստ» օրաթերթի այսօրվա համարում