Տեղափոխվելով Հայաստան՝ սկիզբ դրվեց իմ կյանքի նոր փուլին․ երաժիշտ Էմանուել Հակոբյանը՝ հայ հայտնիների հետ համագործակցելու և դժվարություններ հաղթահարելու մասին

Երաժիշտ, գործիքավորող Էմանուել Հակոբյանն արդեն երկար տարիներ է, ինչ հիմնելով իր «Eman» ստուդիան, համագործակցում է հայկական շոու բիզնեսի ամենահայտնի երգիչ, երգչուհիների հետ։

Էմանուելի հետ զրուցել ենք Վրաստանից Հայաստան տեղափոխվելու, երաժշտական գործունեություն սկսելու և հայտնիների հետ համագործակցությունների մասին։

«Ծնվել եմ Վրաստանի Նաուխրեբի գյուղում։ Դպրոցն ավարտելուց հետո 17 տարեկանում տեղափոխվեցի Հայաստան, ինչից հետո սկիզբ դրվեց իմ կյանքի նոր փուլին»,- պատմեց Eman-ը և շարունակեց․

«Դեռ վաղ տարիքից սկսեցի հետաքրքրվել երաժշտությամբ և ժամանակի ընթացքում այդ հետաքրքրությունը վերածվեց մեծ սիրո,  ինչի արդյունքում ինքնուս սովորեցի նվագել երաժշտական գործքիներ, մասնավորապես՝ սինթեզատոր, իսկ 13 տարեկանում հաճախեցի ակորդեոնի դասընթացների, ինչից հետո սովորեցի գործիքային կատարողականություն»,- նշեց Էմանուելը։

Ինչպես վերջինս նշում է՝ որպես երաժիշտ իր կայացման փուլում շատ դժվարություններ և հիասթափություններ է ունեցել․

«Ամենամեծ դժվարությունը, թերևս, սկզբնական փուլում գումար չունենալն էր, իսկ ինձ անհրաժեշտ էին երաժշտական գործիքներ։ Երբ սկսեցի աշխատել, ինձ համար որպես ստուդիա ծառայեց տան պատշգամբը, որտեղ փորձել էի հնարավորինս հարմար պայմաններ ստեղծել։ Ունեի ընդամենը մեկ երաժշտական գործիք՝ սինթեզ և շատ հին համակարգիչ։ Սկզբնական փուլում սկսեցի ձայնագրություններ անել, որոնցից ստացված գումարը ծախսում էի և ընտանիքիս վրա, և փորձում ինչ-որ կերպ նոր գործիք ձեռք բերել։ Սա իմ մեծ երազանքին հասնելու առաջին քայլերն էին։ Եվ այսպես աշխատելով՝ 2012 թ․ հիմնեցի իմ ստուդիան, որը կոչվեց «Eman»»,- ասաց Էմանուելը։

Տվյալ ժամանակահատվածից սկսած՝ Էմանուել Հակոբյանը սկսեց համագործակցել հայ հայտնիների հետ։ Առաջինը ռեփեր Նարեկ Մեծ Հայքն էր՝ «Շոգ ա» երգի շրջանակներում․

«Շատ ուրախ եմ, որ Նարեկի հետ առաջին համագործակցությունս եղավ հենց այս երգի շրջանակում, քանի որ այն իսկապես մեծ հաջողություն գրանցեց և մինչ այսօր համարվում է հայկական երգարվեստի ամառվա գլխավոր հիթերից մեկը։ Ի դեպ՝ կարծում եմ, որ արդեն շատերն են հասցրել լսել նաև «Շոգ ա 2»-ը, որի պրեմիերան կայացավ այս ամռան սկզբին։ Կրկին ռիթմիկ երաժշտություն, ամռան շունչ և բարձր տրամադրություն հաղորդող աշխատանք»,- պատմեց Էմանուելը։

Երաժիշտը տարիների ընթացքում համագործակցել է այնպիսի հայտնիների հետ, ինչպիսիք են Ռազմիկ Ամյանը, Մարտին Մկրտչյանը, Սիրուշոն, Իվետա Մուկուչյանը, Արմենչիկը, Գայա Արզումանյանը, Արամ MP3-ը, Գևորգ Սիրեկանյանը, Ռաֆայել Երանոսյանը, Հակոբ Հակոբյանը և Արմեն Հովհաննիսյանը, Նարե Գևորգյանը և այլք։