«Այս իշխանությունը հեռու է ի շահ Հայաստանի գործելու ունակությունից». «Փաստ»

«Փաստ» օրաթերթը գրում է

Ադրբեջանական կողմը նախորդ շաբաթ տևական ժամանակով փակեց Գորիս-Կապան միջպետական ճանապարհը։ Ադրբեջանագետ Գառնիկ Դավթյանից հետաքրքրվում ենք՝ ինչի՞ մասին է վկայում կոնկրետ այս քայլը, և արդյո՞ք ունենք երաշխիքներ, որ նման գործողության կրկին ականատես չենք լինի։ Փորձագետը նշում է՝ հույս ունենալ, որ Ադրբեջանը առաջիկայում կդրսևորի կառուցողական որևէ քայլ, հեռու է իրատեսականությունից:

«Ադրբեջանը մինչև 44-օրյա պատերազմն էր, որ որոշ չափով կառուցողական դիրքորոշում ուներ, այսինքն՝ կար ԵԱՀԿ Մինսկի խումբ, և կային Արցախի հակամարտությունը կարգավորող բանակցություններ, որոնք, ցավոք, մսխվեցին Նիկոլ Փաշինյանի վարած պոպուլիստական քաղաքականության արդյունքում: Սխալ է հույս ունենալ, որ Ադրբեջանը նորից չի փակի Գորիս-Կապան միջպետական ճանապարհը, ասեմ ավելին, այն պահին, երբ հայկական կողմն առաջիկայում չի համաձայնի նոր ստորագրվելիք փաստաթղթի այս կամ այն կետի հետ, Ադրբեջանն անպայման կգործարկի իր ձեռքի տակ եղած ամբողջ քաղաքական և ռազմական ուժի ցուցադրությունը, այդ թվում՝ Գորիս-Կապան միջպետական ճանապարհի փակումը, իր՝ Ադրբեջանի համար ավելի շահեկան փաստաթուղթ ունենալու համար:

Ադրբեջանն այս ճանապարհով 2 խնդիր կատարեց. առաջին՝ ստուգեց Հայաստանի հասարակության ներքաղաքական տրամադրությունները, երկրորդ՝ քաղաքական ապտակ հասցրեց այսօրվա իշխանությանը: Ցույց տվեց, որ ցանկացած ժամանակ կարող է սահմանափակել ՀՀ հյուսիս-հարավ և հակառակ ուղղություններով իրականացվող բեռնափոխադրումները, խաթարել սովորական ՀՀ քաղաքացիների տեղաշարժը, ավելին՝ անգամ Նիկոլ Փաշինյանին սուվերենություն չունեցող իշխանություն անվանեց»,- «Փաստի» հետ զրույցում ասում է Դավթյանը:

Ակնհայտ է, որ ադրբեջանական կողմի վարքագիծն օրեցօր ավելի սանձարձակ է դառնում։ Ճանապարհի փակումը, հայկական դիրքերի ուղղությամբ պարբերական բնույթ կրող սադրանքները Բաքվի հայտնի նկրտումների՞, այդ թվում, այսպես կոչված, «Զանգեզուրի միջանցքը» ստանալու նպատակի՞, թե՞ ավելի լայն՝ անգամ տարածաշրջանային բնույթի մարտահրավերների մասին են վկայում։ «Ադրբեջանն օգտվում է այսօրվա իշխանության պարտված լինելու հանգամանքից և, տեսնելով վերջիններիս վարած անհեռատես և տկարամիտ քաղաքականությունը, մեծացնում է իր ճնշումները, որպեսզի նոր կապիտուլ յացիոն փաստաթղթում Հայաստանին ստիպի հրաժարվել Արցախից և Ադրբեջանին զիջել Սյունիքի մարզը՝ միջանցքի տրամադրմամբ: Եթե ուշադրություն դարձնենք Բաքվի բռնապետ Իլհամ Ալիևի և նրա վարչակարգի հայտարարություններին, ապա ակնհայտ է դառնում, որ Ադրբեջանը Հարավային Կովկասը պատկերացնում է առանց Հայաստանի, առավել ևս առանց հայերի: Այսինքն, հայերին նվաստացնելով, ազգային արժանապատվությունը ոտնահարելով՝ մատնացույց է անում Նիկոլ Փաշինյանին, որ դուք պարտվել եք, և պետք է բոլոր հետպատերազմյա փաստաթղթերը բխեն միայն Ադրբեջանի շահերից»,-նշում է մեր զրուցակիցը:

Ադրբեջանական կողմի գործողություններին զուգահեռ հատկանշական էր Հայաստանի իշխանության արձագանքը։ Իհարկե, մինչ այս բազմիցս արձանագրվել է թշնամու գործողություններին անհամաչափ արձագանքելու խնդիրը։ Կառավարության նախորդ շաբաթվա նիստում Նիկոլ Փաշինյանը, անդրադառնալով Սյունիքի մարզում տեղի ունեցող իրադարձություններին, թեպետ նշել էր, որ ադրբեջանական զինված ուժերի կողմից միջպետական ճանապարհի փակումը հակասում է նախկինում ձեռք բերված պայմանավորվածություններին, միևնույն ժամանակ իր խոսքում օգտագործել էր Էյվազլի և Չայզամի տեղանունները։ Եթե այս հայտարարությունը ևս դիտարկենք մնացած բոլոր հայտարարությունների համատեքստում, գումարենք նաև, ըստ իրենց, «Թուրքիայից եկող դրական ազդակների» մասին հայտարարությունը, ի՞նչ կարող ենք եզրակացնել՝ իշխանության օրակարգի տեսանկյունից։

«Նորություն չէ, որ կապիտուլյացիա ստորագրած անձը մերժում է այն ամենը, ինչը կապված է հայկականի և հայերի դարավոր պատմության հետ: Կառավարության նիստին Նիկոլ Փաշինյանի կողմից թուրքական տեղանունների վկայակոչումը ոչ այլ ինչ է, քան Ադրբեջանի տարածքային ամբողջականության «մասնակի» ճանաչում: Ինչ վերաբերում է «Թուրքիայից եկող դրական ազդակներին», ապա ասեմ, որ այդ ազդակներն են՝ Հայաստանը պետք է հրաժարվի Ցեղասպանության ճանաչման պահանջատիրությունից, մոռանա Արցախի գոյության մասին, ճանաչի Կարսի պայմանագիրը, այսինքն՝ Թուրքիայի տարածքային ամբողջականությունը, Սյունիքի միջով տրամադրի խոստացված «միջանցքը» և փոխի իր քաղաքական վեկտորը Ռուսաստանից դեպի Թուրքիա:

Սրանք ոչ թե դրական, այլ հայերի բնաջնջմանը հավասար ազդակներ են: Ակնհայտ է, որ հայ ժողովրդի մեջքի հետևում ծրագրվում է ևս մեկ ազգադավ փաստաթուղթ, որը վերջնականապես կփակի Հայաստան պետության վերջին էջը: Ցավով պետք է նշեմ, որ Նիկոլ Փաշինյանի իշխանությունը հեռու է պետ ա կ ա ն ա մետությունից, հա յ ա պահ - պանությունից և ի շահ Հայաստանի գործելու ունակությունից: Չունեն տեսլական Հայաստանի անկախ ապագայի մասին, այլ բռնել են Թուրքիայի վիլայեթ դառնալու ճանապարհը: Վերջիններս հանուն ադրբեջանական էժան նավթամթերքի և թուրքական էժան ապրանքների ոտնակոխ են անում հային բնորոշ ամեն տեսակ արժեքները՝ փաստացի վարում են ստամոքսի քաղաքականություն»,-եզրափակում է ադրբեջանագետ Գառնիկ Դավթյանը:

Մանրամասները՝ «Փաստ» օրաթերթի այսօրվա համարում