Կրեատիվ ցուցարարներն ու լրագրող-ոստիկանները (լուսանկարներ)

Այսօր Երևանն ամենամարդաշատն է վերջին 4 օրերի ընթացքում: Խոսքը վերաբերում է թե ցուցարարներին, թե ոստիկանական խմբին:

Եթե մինչ այսօր ցուցարարները փակել էին միայն Բաղրամյան պողոտան, ապա այսօր, ժամը 18:00-ից, ցուցարարների մի նոր խումբ երթ սկսեց Մաշտոցի պողոտայի մի ծայրից` Նոյ գործարանի տարածքից, և հասավ Օպերայի տարածք՝ ընթացքում դառնալով ավելի բազմամարդ:

Ինչպես տեղեկացնում է Past.am-ը՝ Օպերայի տարածքում ցուցարարները նստեցին ու սկսեցին նոր նստացույց, փակելով Մաշտոցի պողոտան: Այս պահից սկսած ուժեղացավ ոստիկանական հսկողությունը, սակայն իրավիճակն այս պահին շարունակում է թեժ մնալ: Երևանի կենտրոնական հատվածներում երթևեկությունը կաթվածահար վիճակում է գտնվում:

Հետաքրքիր է, որ ցուցարարների տրամադրությունը որքան մարտական, այնքան էլ թեթև, բարձր և ուրախ է: Նրանցից շատերի ձեռքերում կարելի է նկատել հումորային ու կրեատիվ բովանդակությամբ ցուցապաստառներ:

Ցուցարարներից պակաս հետաքրքրված չէ նաև ոստիկանությունը: Նրանցից ոմանք տեսաձայնագրություններ էին անում: Հետաքրքիր է զուգակցել լրագրողի և ոստիկանի մասնագիտությունը: Գուցե դրա պատճառը ցուցարարների՝ «Ոստիկան միացիր» վանկարկումնե՞րն էին:

Ի դեպ, շոու բիզնեսի ներկայացուցիչները, ինչպես օրեր առաջ, այնպես էլ հիմա եւ' Բաղրամյան պողոտայում, եւ' Մաշտոցի պողոտայում կենդանի պատ են կազմել ոստիկանների եւ ցուցարարների միջեւ: Իսկ նույն ժամանակահատվածում Բաղրամյան պողոտայում տիրում է բարձր տրամադրություն, մարդիկ երգում ու պարում են` վանկարկելով հայրենասիրական բառակապակցություններ: Նկատենք, որ այս պահին ոստիկանական ուժերը գնալով ավելանում են:

Արուսիկ Տիգրանյան