«Մեկ ուրիշի խնդիրը լուծելու համար մեզ զրկում են շենքից. մինչև վերջ պայքարելու ենք». «Փաստ»

«Փաստ» օրաթերթը գրում է

Պետական երաժշտական կամերային թատրոնի անձնակազմին ԿԳՄՍ նախարարությունից առաջարկել են տեղափոխվել Հակոբ Պարոնյանի անվան երաժշտական կոմեդիայի թատրոնի շենք, ինչին Պետական երաժշտական կամերային թատրոնի ամբողջ անձնակազմը դեմ է:

«Իրենց բացատրությունը հետևյալն է. ասում են՝ ձեզ չենք զրկում աշխատավարձից, աշխատանքից, ուզում ենք օպտիմալացնել ու միավորել Պարոնյանի անվան թատրոնի հետ: Իրենց պատճառաբանությամբ, ուզում են, որ մենք գնանք Պարոնյանի անվան թատրոն, և մեզ տալիս են լայն հնարավորություն, բեմ, երգչախումբ, պարախումբ: Բայց երկու թատրոններն անհամատեղելի են թե՛ ֆունկցիոնալ, թե՛ նաև կատարողական տեսանկյունից: Բացի երաժշտական բառից՝ թատրոններին ուրիշ ոչ մի բան չի կապում: Մեր թատրոնի գործառույթն ուրիշ է, մյուս թատրոնինը՝ ուրիշ, մեր ճանապարհն ուրիշ է, իրենցը՝ ուրիշ: Մեր խաղացանկն ուրիշ է, իրենց խաղացանկը՝ ուրիշ: Մենք բոլորս մտածում ենք, որ դա անհնարին տարբերակ է, և իրենց առաջարկը չի կարող կյանքի կոչվել»,-«Փաստի» հետ զրույցում նշեց Պետական երաժշտական կամերային թատրոնի դերասան Արթուր Պետրոսյանը:

Դերասանը մեզ հետ զրույցում նշեց, որ այդ դեպքում անհայտ է մնում նաև անձնակազմի ճակատագիրը: «Ասում են՝ մեզ չեն զրկում աշխատանքից, բայց ամեն ինչ դրան է տանում, որովհետև ինչպե՞ս կարելի է գնալ ու համատեղվել մեկ այլ թատրոնի անձնակազմի հետ: Մի ամբողջ 60 հոգանոց կոլեկտիվ ինչպե՞ս կարող է գնալ ու արդեն իրենց վրա բեռ լինել: Միտումն այլ է, կարծում եմ: Խնդիրը մեր ստեղծագործական շենքն է: Երկու կառույցների՝ Պետական երաժշտական կամերային ու Հ. Պարոնյանի անվան երաժշտական կոմեդիայի թատրոններին անհարմարության մեջ դնելով՝ փորձում են լուծել մեկ ուրիշ՝ երրորդ կառույցի խնդիր: Ինչ-որ ՊՈԱԿ-ի կամ կազմակերպության լավություն են ուզում անել, շենք տրամադրել՝ մեզ զրկելով մեր շենքից ու միավորելով Հակոբ Պարոնյանի անվան երաժշտական կոմեդիայի թատրոնի հետ»,-ասաց նա՝ չհստակեցնելով, թե ում են ուզում շենքը տալ:

Արթուր Պետրոսյանը նշեց, որ առաջարկը դեռ փաստաթղթի կամ որոշման տեսք չի ստացել:«Պարզապես մեր տնօրենի միջոցով մեզ այդ մասին տեղեկացրել են: Դրա համար մենք ոտքի ենք կանգնել, քանի որ գիտենք՝ գործընթացը կարող են շատ արագ կազմակերպել: Մենք մինչև վերջ ենք գնալու, հետ չենք կանգնելու մեր քայլերից: Գնալու ենք քաղաքակիրթ բոլոր ճանապարհներով, եթե դա էլ չփրկեց, չգիտեմ, թե ինչ քայլերի կարող ենք դիմել: Մեր ամբողջ անձնակազմը նույն դիրքորոշումն ունի: Այստեղ արդեն կարևոր է այն թատրոնի դիրքորոշումը, որի հետ մեր թատրոնն ուզում են միավորել: Կարևոր է նաև մեր կոլեգաների, դերասանների ու թատրոնների գնահատականն այս ամենի վերաբերյալ»,-ասաց նա:

Դերասանի խոսքով, թեպետ բացարձակ պատկերացում չկա, թե այդ առաջարկի իրագործման դեպքում ինչ է լինելու, բայց ինքն այլ միտում էլ է տեսնում: «Սա տանում է նրան, որ մեր թատրոնը կամաց-կամաց լուծարվի: Դե, պարզ է՝ չեն բարձրաձայնի այդ մասին, կասեն՝ լավ բան ենք ձեզ համար անում, բայց այդ միտումը ևս կա, չէ՞: Օրինակ՝ ես, որպես դերասան, չեմ գնա այնտեղ, այսինքն, ստիպված պետք է թողնեմ աշխատանքս: Բացի այդ, ենթադրենք, դերասանական խմբի խնդիրը լուծվեց, բայց չէ՞ որ մեր թատրոնը վարչակազմ, տեխնիկական կազմ ունի: Իրենց ճակատագիրն ընդհանրապես անհասկանալի է մնում, որովհետև Պարոնյանի թատրոնում իրենց աշխատակազմին չեն հեռացնի, որ մեր աշխատակազմին ընդունեն: Օրինակ՝ ինչպե՞ս է հնարավոր երկու հաշվապահ ունենալ: Ամեն ինչ անհասկանալի է: Այսինքն, գործը վերջից են սկսել, ասել են՝ արդյունքն այսպիսին է լինելու, բայց սկզբի ճանապարհը չկա, ոնց որ, սովորաբար, լինում է»,-ընդգծեց Ա. Պետրոսյանը: Թատրոնի անձնակազմի համար թատրոնի շենքը երրորդ կողմին տրամադրելու միտումը ևս անհասկանալի է:

«Շենքը ուզում են տրամադրել մեկ ուրիշի և Պետական կամերային երաժշտական թատրոնից մեզ ուզում են հանել: Բայց շատ ազատ շենքեր կան, պետական աջակցություններ կան, որով կարելի է լուծել այդ հարցը: Ինչո՞ւ եք մեր հաշվին լուծում այդ հարցը: Խնդիրը հենց սա է՝ մեր հաշվին մեկ այլ խմբի հարց են լուծում, ինչն անընդունելի է: Դուք ձեր հարևանի տանը մեկ- երկու օր կապրեք, բայց երկար չեք կարող մնալ այնտեղ: Ստացվում է՝ ասում են՝ գնա ու հարևանիդ տանն ապրիր: Այստեղ տաղանդն ու կարողությունները կապ չունեն, այստեղ քաղաքականությունը լրիվ ուրիշ կողմ է գնում: Իրենց միտումը շենքի խնդիրն է ու հենց մեզնից են սկսել: Սա, ի վերջո, շատ-շատ այլ թատրոնների է վերաբերելու, դրա համար բոլոր թատրոնները պետք է իրենց գնահատականները տան: Մեր թատրոնը գործող է, մենք ունենք կայացած խաղացանկ, կայացած կազմ ու նաև հանդիսատես: 32 տարի է՝ թատրոնը կա, ու ստացվում է՝ գործող թատրոնը փակում են մեկ ուրիշի խնդիրը լուծելու համար: Մենք ձեռքներս ծալած չենք նստելու և մինչև վերջ պայքարելու ենք»,-եզրափակեց մեր զրուցակիցը:

ԱՆՆԱ ԲԱԴԱԼՅԱՆ

Մանրամասները՝ «Փաստ» օրաթերթի այսօրվա համարում