Ով­քե՞ր իրա­վունք ունեն ստա­նալ անվ­ճար դեղորայք. «Փաստ»

«Փաստ» օրաթերթը գրում է

«Անվճար կամ արտոնյալ պայմաններով դեղերի հատկացման գործընթացն առավել լիարժեք ու արդյունավետ կազմակերպելու նպատակով անհրաժեշտ է անվճար դեղորայք ստանալու ընթացակարգի վերաբերյալ պարբերաբար իրազեկման աշխատանքներ անցկացնել քաղաքացիների, հատկապես սոցիալապես անապահով, առավել խոցելի խմբերի համար»,-կարծում է «Սպառողների ասոցիացիա» ՀԿ-ի իրավաբան Սյուզաննա Չիլինգարյանը:

Ընդգծում է՝ անվճար կամ արտոնյալ պայմաններով բնակչության սոցիալապես անապահով խմբերին անվճար դեղորայքով ապահովում է սպասարկող պոլիկլինիկան՝ մասնագետի նշանակմամբ: «Կառավարությունը սահմանել է բնակչության սոցիալական կամ հատուկ խմբերի ցանկը, որում ընդգրկված շահառուներին դեղերը հատկացվում են դրանց արժեքի լրիվ կամ մասնակի փոխհատուցմամբ, հիվանդությունների ցանկը, որոնց դեպքում դեղերը շահառուներին հատկացվում են դրանց արժեքի լրիվ փոխհատուցմամբ, բնակչության սոցիալական կամ հատուկ խմբերի և հիվանդությունների ցանկերում ընդգրկված շահառուներին, պետական բյուջեի միջոցների հաշվին Առողջապահության նախարարության, ինչպես նաև առողջության առաջնային պահպանման ծառայություններ մատուցող բժշկական կազմակերպությունների միջոցով դեղերի հատկացման և փոխհատուցման կարգը:

Այս հիվանդությունների դեպքում դեղերը շահառուներին հատկացվում են անվճար. տուբերկուլ յոզ (հակատուբերկուլ յոզային դեղեր), հոգեկան հիվանդություններ (հոգեմետ դեղեր), չարորակ նորագոյացություններ (հակաուռուցքային դեղեր, հեմոֆիլիայի դեղեր, ցավազրկող դեղեր, թմրադեղեր), շաքարային և ոչ շաքարային դիաբետ (հակադիաբետիկ դեղեր), էպիլեպսիա (հակացնցումային դեղեր), սրտամկանի ինֆարկտ (դուրսգրման օրվանից առաջին 2 ամիսը` արյան կորոնար շրջանառությունը բարելավող դեղեր), պարբերական հիվանդություն (կոլխիցին և կամ այլ դեղեր), սրտի փականների արատներ (հակակոագուլ յանտներ` պրոթեզավորումից հետո), մալարիա (հակամալարիային դեղեր), քրոնիկ երիկամային անբավարարություն (երիկամային փոխպատվաստման և (կամ) ծրագրային հեմոդիալիզի դեպքերում (ցիկլոսպորին, էրիթրոպոետին, մոֆետիլի միկոֆենոլատ և (կամ) դրանց համարժեք այլ դեղեր), ֆենիլկետոնուրիա (ֆենիլալանին չպարունակող մանկական կեր), անհաս նորածինների շնչառական խանգարման համախտանիշ (բերակտանտ ակտիվ նյութ պարունակող դեղեր), մարդու իմունային անբավարարության (ՄԻԱՎ) վարակ (դեղեր, թեստեր), հիպոֆիզային գաճաճություն ախտանիշ (հորմոնային դեղեր), վիրուսային հեպատիտ Ց հիվանդություն (հակավիրուսային դեղեր): Բացի դա, հաշմանդամություն ունեցող անձինք ընդգրկված են անվճար և արտոնյալ պայմաններով դեղեր ձեռք բերելու իրավունք ունեցող բնակչության սոցիալական խմբերի ցանկում։ 1-ին և 2-րդ խմբի հաշմանդամություն ունեցող անձինք իրավունք ունեն օգտվել անվճար դեղեր ձեռք բերելու արտոնությունից, իսկ 3-րդ խմբի հաշմանդամություն ունեցող անձինք՝ 50 տոկոս զեղչով, եթե չեն օգտվում ավելի արտոնյալ պայմաններով դեղորայք ստանալու իրավունքից»,-տեղեկացնում է մեր զրուցակիցը:

Նշում է՝ դեղորայքը քաղաքացին կարող է ստանալ համավճարով, եթե այս խմբերից որևէ մեկի ներկայացուցիչ է. «3-րդ խմբի հաշմանդամություն ունեցող անձինք, բռնադատվածներ, Չեռնոբիլի վթարի վերացման աշխատանքների մասնակիցներ, միայնակ մայրերի երեխաներ (միայնակ մայր է համարվում ամուսնության մեջ չգտնվող անձը, որի խնամքին կա մինչև 18 տարեկան երեխա), միայնակ չաշխատող կենսաթոշակառուներ, միայն չաշխատող կենսաթոշակառուներից բաղկացած (այդ թվում՝ իրենց խնամքի տակ անչափահաս երեխա ունեցող) ընտանիքներ: Ո՞ւր պետք է դիմի բուժառուն: Նա անձը հաստատող փաստաթղթով դիմում է բժշկական հաստատություն և հաշվառվում: Բժշկական հաստատությունը նշանակում է դեղորայք և դեղատոմսով ուղղորդում իր կամ մոտակա պոլիկլինիկայի հետ պայմանագիր ունեցող դեղատուն: Դեղատանը դեղատոմսի վրա նշվում է դեղի գինը, զեղչը և վճարման ենթակա գումարը: Դեղատոմսի հակառակ երեսին ստացողը նշում է ստացած դեղի անվանումը, քանակը և վճարած գումարի չափը»,-նշում է «Սպառողների ասոցիացիայի» իրավաբանը:

Տեղեկացնում է՝ Արցախյան վերջին պատերազմի ընթացքում վիրավորում ստացած անձանց՝ զինծառայողների և ոչ զորահավաքային զորակոչով պատերազմի մասնակիցների (կամավորներ) բուժօգնությունն ու հիմնական դեղերի ցանկում առկա դեղերը ևս տրամադրվում են անվճար: «Դեղերը տրամադրվում են տեղամասային պոլիկլինիկաների կողմից: Կամավորների դեպքում անձը պետք է իր տեղամասային պոլիկլինիկա ներկայացնի պահեստազորում հաշվառված զինապարտի զորակոչման վերաբերյալ տեղեկանք»,-եզրափակում է Սյուզաննա Չիլինգարյանը:

Մանրամասները՝ «Փաստ» օրաթերթի այսօրվա համարում