Հայաստանն ու Բելառուսը կհամագործակցեն քաղաքաշինության ոլորտում

ԵՐԵՎԱՆ, 18 ԴԵԿՏԵՄԲԵՐԻ, ԱՐՄԵՆՊՐԵՍ: ՀՀ քաղաքաշինության նախարար Նարեկ Սարգսյանը դեկտեմբերի 18-ին ընդունել է Բելառուսի նորանշանակ արտակարգ և լիազոր դեսպան Իգոր Նազարուկին՝ շնորհավորելով նրան Հայաստանում դիվանագիտական առաքելություն ստանձնելու կապակցությամբ:

Ինչպես «Արմենպրես»-ին տեղեկացրին ՀՀ քաղաքաշինության նախարարության տեղեկատվության և հասարակայնության հետ կապերի բաժնից, ներկայացնելով ՀՀ քաղաքաշինության նախարարության ծրագրային առաջնահերթությունները` նախարար Նարեկ Սարգսյանն անդրադարձել է Հայաստան-Բելառուս համագործակցության հնարավորություններին՝ այդ առումով առանձնացնելով ինչպես ներդրումային խոշոր քաղաքաշինական ծրագրերի, այնպես էլ՝ շինարարության ոլորտը՝ սոցիալական բնակարանաշինության, դպրոցաշինական ծրագրերի իրականացման համատեքստում: Նա նշել է, որ Õ �այաստանը հարուստ է ոչ մետաղական հանքանյութերով, բնական քարերի բազմապիսի տեսակներով, որոնց կիրառմամբ կարելի է իրականացնել սեյսմակայուն և էներգախնայողունակ շինարարություն:

Դեսպան Իգոր Նազարուկն անդրադարձել է Բելառուսի հաջողություններին շինարարական տեխնոլոգիաների և վերելակաշինության ոլորտում` անդրադառնալով նաև այդ բնագավառում համագործակցության հնարավորություններին:

Կողմերը պատրաստակամություն են հայտնել քաղաքաշինության բնագավառում գործնական համագործակցություն ծավալելու և գործնական հիմքի ներքո երկու երկրների համար հետաքրքրություն ներկայացնող ծրագրային փաթեթ պատրաստելու վերաբերյալ:

Հանդիպման ավարտին վերստին շեշտելով հայ-բելառուսական երկկողմ հարաբերությունների խորացման ուղղությամբ կատարելիք աշխատանքների կարևորությունը` զրուցակիցները մտքեր են փոխանակել հայ-բելառուսական տնտեսական հարաբերությունների ակտիվացման, առկա ռեսուրսների լիարժեք օգտագործման, ԵՏՄ շրջանակում համագործակցության ընդլայնման հարցերի շուրջ: