Սոմալացին ծովում ավելի քան 30 մարդու է փրկել, այնուհետեւ՝ 142 տարվա ազատազրկման դատապարտվել

Հունաստանի Հիոս կղզու բանտում է գտնվում Սոմալիից մի երիտասարդ տղամարդ, ով 142 տարվա ազատազրկման է դատապարտվել մարդկանց մաքսանենգության համար, գրում է The New York Times-ը:

Թերթում հրապարակված Լեսբոսի քրեական դատարանի մայիսի 13-ի որոշման պատճենում ասվում է, որ Մոհամմադը դատապարտվել է, ընդհանուր առմամբ, 142 տարվա եւ 10 օրվա ազատազրկման՝ միգրանտներին Հունաստան ապօրինի տեղափոխելու համար: Սակայն դատապարտվածը ստիպված կլինի ընդհանուր առմամբ 20 տարի նստել՝ սա Հունաստանի քրեական օրենսգրքով թույլատրված առավելագույն ժամկետն է:

Սոմալացին փորձել է վերահսկողության տակ առնել Էգեյան ծովի Լեսբոս կղզու ափին խորտակվող նավի կառավարումը եւ փրկել իրեն ու նավում գտնվող մնացած 33 անձանց: Երկու ուղեւոր զոհվել է, մնացածին հաջողվել է փրկել:

Խանադ Աբդի Մոհամմադը մեկն է այն ապաստան հայցողներից, ովքեր վերջին ամիսներին երկարաժամկետ ազատազրկման են դատապարտվել մարդկանց առեւտրի կամ անօրինական միգրացիային նպաստելու համար, չնայած այն բանին, որ նրանք, ըստ իրավապաշտպան խմբերի, պարզապես ապահով ապաստան են փնտրել:

Հունաստանն, իր հերթին, պաշտպանում է իրեն՝ պնդելով, որ իր դատարաններն արդար են, եւ որ ինքը պարտավոր է պահպանել իր սահմանները: «Հունաստանում, ինչպես Միացյալ Նահանգներում եւ ամբողջ Արեւմտյան աշխարհում, արդարությունը ուժեղ է եւ անկախ: Հունաստանը կշարունակի պահպանել իր ցամաքային եւ ծովային սահմանները, որոնք նաեւ Եվրոպայի սահմաններն են, որպես պարտավորություն՝ հարգելով միջազգային եւ եվրոպական իրավունքը»,- ասվում է Միգրացիայի նախարար Նոտիս Միտարաչիի գրավոր հայտարարության մեջ: