Հանրակրթության պետական չափորոշիչը փորձարկվելու է Տավուշի մարզում, այնուհետև ներդրվելու է Հայաստանի մյուս դպրոցներում․ «Փաստ»

«Փաստ» օրաթերթը գրում է

Կրթության, գիտության, մշակույթի և սպորտի նախարարությունը հիշեցնում է, որ 2021 թվականի փետրվարի 4-ին կառավարությունը հաստատել է Հանրակրթության պետական չափորոշիչը: Այն 2021-2022 ուստարում փորձարկվելու է Տավուշի մարզում և ամփոփվելուց ու լրամշակվելուց հետո նախատեսվում է ներդնել Հայաստանի բոլոր դպրոցներում: Միաժամանակ ներկայացված են 2021-2022 և 2022-2023 ուսումնական տարիների օրինակելի ուսումնական պլանները: Նախատեսվել է ներկայացնել պլաններ միաժամանակ 2 ուստարիների համար՝ հաշվի առնելով, որ 2022-2023 ուստարվա համար փոփոխության ենթակա են միայն ժամկետների հետ կապված կարգավորումները: Այս մասին «Փաստը» տեղեկանում է հանրային քննարկման ներկայացված նախագծի հակիրճ բնութագրից:

Նախագծի հիմնավորման մեջ նշվում է, որ նախկինում «Հանրակրթական հիմնական (ընդհանուր, մասնագիտացված, հատուկ) պետական ծրագրեր իրականացնող ուսումնական հաստատությունների օրինակելի ուսումնական պլանների ընդհանրական պարզաբանումներ» հավելվածը տրված էր ընդհանուր, մասնագիտացված և հատուկ պետական ծրագրերի համար առանձինառանձին, մինչդեռ դրանք իրարից տարբերվում էին մի քանի մասնավոր դեպքերում, որոնք առաջարկվող նախագծում ներառված են նույն հավելվածի մեջ։ Այսպիսով՝ ուսումնական պլանի պարզաբանումների առաջարկվող նախագծում կատարվել են փոփոխություններ: Մասնավորապես՝ փոփոխություններ կլինեն թեմատիկ գրավոր աշխատանքներ կազմակերպելու ձևի մեջ, որով նախատեսվում է թեմատիկ աշխատանքը գրավոր եղանակով իրականացնելու անհնարինության դեպքում (օրինակ՝ համավարակի պայմաններում) կազմակերպել այն բանավոր՝ աշխատանքի ամբողջ ընթացքը որակյալ տեսաձայնագրելու պայմանով։

Այս եղանակով աշխատանքը կազմակերպելու տեխնիկական հնարավորություն ունեն բոլոր դպրոցները։ Այնուհետև գնահատման վերաբերյալ փոփոխություն էառաջարկվում, որը վերաբերում է գնահատման հաճախականությունը որոշելուն: Այս հարցում դպրոցներին տրվում է ինքնուրույնություն՝ հանրակրթության պետական նոր չափորոշչի տրամաբանությամբ։ Փոփոխությամբ բանավոր հարցումների, գործնական աշխատանքների, թեմատիկ աշխատանքների նվազագույն թիվը կիսամյակի ընթացքում սահմանում է ուսումնական հաստատությունը՝ մանկավարժական խորհրդի որոշմամբ, առաջնորդվելով ԿԳՄՍ նախարարության կողմից հաստատված առարկայի ծրագրով, գնահատման մեթոդաբանությամբ և մեթոդական ցուցումներով։ «Տեխնոլոգիա» առարկայի (5-7-րդ դասարաններ) պարապմունքներին դասարանը բաժանվում է ոչ թե տղաների և աղջիկների խմբերի, այլ սովորողների ընտրությամբ՝ անկախ սովորողների թվից։

Ըստ նախարարության՝ սա հնարավորություն է տալիս սովորողներին ընտրել այն ուսումնական նյութը, կարողությունները, որը նրանք ցանկանում են զարգացնել։ Բացի դա, հնարավորություն է տրվում «Կերպարվեստ», «Երաժշտություն» և «Ֆիզկուլտուրա» առարկաների ժամերը դասացուցակում բաշխել շաբաթվա նույն օրը այնպես, որ այդ առարկաների ուսումնական պլանով սահմանված շաբաթական կամ ամսական ժամերը իրականացվեն այդ օրվա ընթացքում։ Այս փոփոխությունը հնարավորություն է տալիս բեռնաթափել ուսումնական շաբաթվա օրերից մեկը, ինչպես նաև վերը նշված առարկաների ուսուցման համար զույգ ժամերի շնորհիվ ավելացնել ուսումնական գործընթացի արդյունավետությունը։ Նախարարությունը նշում է, որ հանրակրթական հիմնական ընդհանուր պետական ծրագրեր իրականացնող միջնակարգ դպրոցի 10-12-րդ դասարաններում ֆինանսական միջոցների առկայութան դեպքում հնարավորություն է տրվում առաջնորդվել «Հանրակրթական հիմնական ընդհանուր պետական ծրագրեր իրականացնող առանձին գործող ավագ դպրոցի օրինակելի ուսումնական պլանների ընդհանրական պարզաբանումների» 34-րդ կետի պահանջներով:

Այս պարզաբանման 34-րդ կետը սահմանում է ավագ դպրոցի 10-12-րդ դասարանների ուսպլանները՝ ըստ հոսքերի, իսկ հոսքերը չորսն են՝ ընդհանուր, հումանիտար, բնագիտամաթեմատիկական և արհեստագործական: Արդյունքում՝ դպրոցում նախամասնագիտական ուսուցումն ավելի արդյունավետ է դարձնում միջնակարգ դպրոցում սովորողների ուսումնառությունը բարձրագույն ուսումնական հաստատություն ընդունվելու և սովորելու համար։ Հաշվի առնելով այն հանգամանքը, որ գյուղական դպրոցների մեծ մասը միջնակարգ դպրոցներ են, այս կարգավորումը կմեծացնի այդ բնակավայրերի սովորողների՝ համալսարաններ ընդունվելու և այնտեղ արդյունավետ սովորելու հնարավորությունը։

Մանրամասները՝ «Փաստ» օրաթերթի այսօրվա համարում