Երևանի ևս տասը ավտոբուս կսպասարկի հենաշարժողական խնդիրներ ունեցող մարդկանց

Մայրաքաղաքի  ևս 10 ավտոբուս կկարողանա սպասարկել հենաշարժողական խնդիրներ ունեցող մարդկանց: «Արմենպրես»-ի հաղորդմամբ՝ դեկտեմբերի 17-ից շահագործման մեջ ներգրավված վերազինված ավտոբուսները կգործեն 3, 13, 22, 28 երթուղիներիում:

«Շատ ուրախ եմ, որ այսպիսով հաշմանդամություն ունեցող մարդկանց տեղափոխման համար ևս տասը ավտոբուս կավելանա մայրաքաղաքի ավտոբուսների շարքում: Կոչ եմ անում հաշմանդամություն ունեցող մարդկանց ավելի հաճախ օգտվել հասարակական տրանսպորտից: Սկզբում դա մի փոքր տարօրինակ կթվա, սակայն ավելի ուշ արդեն կդառնա սովորական երևույթ», - ասաց «Ունիսոն» հասարակական կազմակերպության հենաշարժողական խնդիրներ ունեցող անդամ Շուշան Նահապետյանը:

«Ունիսոն» հասարակական կազմակերպության ներկայացուցիչը նշեց, որ քաղաքապետարանի հետ փորձում են հասկանալ, թե քաղաքի որ հատվածում կա հենաշարժողական խնդիրներ ունեցող մարդկանց համար ավտոբուսների պահանջարկ, որպեսզի հետագա աշխատանքներում ուղղորդեն նման վերազինված ավտոբուսների ներդրումը նոր երթուղիներում:

ՀՀ կառավարության համապատասխան որոշման պահանջների համաձայն՝ 2014թ. Երևանի քաղաքապետը հանձնարարական էր տվել քաղաքային ավտոբուսները համապատասխան սարքավորումներով զինելու վերաբերյալ, որպեսզի հենաշարժողական խնդիրներ ունեցող մարդիկ կարողանան մատչելի ձևով օգտվել քաղաքային տրանսպորտից: Արդյունքում 2015թ. սկզբին մայրաքաղաքի տասը ավտոբուս վերազինվեց անհրաժեշտ սարքավորումներով:

«Քանի որ եղած տասը բավարար չէ, ևս 10 ավտոբուսների համար ներկրվել են անհրաժեշտ սարքավորումներ: Հիմնականում վերելակները տեղադրելիս երթուղիները քննարկել էին ՀԿ-ների հետ և ընտրվել են այնպիսի երթուղիներ, որոնք Երանի գրեթե բոլոր վարչական շրջանները կապում են Կենտրոնի հետ՝ հատկապես ԲՈՒՀ-երի   և Կարմիր խաչի առողջապահական կենտրոնի հետ: Տարեսկզբին վերազինված ավտոբուսների փոքրաթիվ լինելու պատճառով մարդիկ չէին կարողանում երկար սպասել անհրաժեշտ ավտոբուսին, սակայն այսուհետ այդ հարցը համեմատաբար ավելի հեշտ է լուծվելու», -ասաց Երևանի քաղաքապետարանի աշխատակազմի տրանսպորտի վարչության պետ Հենրիկ Նավասարդյանը:

Եվս տասը երթուղիներով համալրումը թույլ կտա 3, 13, 22, 28 երթուղիներից օգտվող  հաշմանդամություն ունեցող մարդկանց 20-25 րոպեն մեկ օգտվել հաշմանդամություն ունեցող մարդկանց համար վերազինված ավտոբուսից: