Սահմանամերձ Սոթք համայնքում բնակիչների թիվն ավելացել է 26-ով

Գեղարքունիքի մարզի Սոթք գյուղում նախորդ տարվա համեմատ բնակչության թիվն ավելացել է 26 մարդով` ի հաշիվ ծնունդների աճի, մահերի պակասելու եւ երկու ընտանիքների վերաբնակության: Ինչպես«Արմենպրես»-ին տեղեկացրեց Սոթքի գյուղապետ Կոլիկ Շահսուվարյանը, այս տարվա դեկտեմբերի առաջին կեսի դրությամբ Սոթքի առկա բնակչությոնը կազմել է 938 մարդ` նախորդ տարվա 912-ի դիմաց: Նախորդ տարվա 17-ի համեմատ այս տարի Սոթքում գրանցվել է 19 ծնունդ, մահվան 7 դեպքի դիմաց` 4 դեպք: Վերաբնակության արդյունքում Սոթքում հաստատվել են 2 ընտանիք` 11 շնչով: Եվս 9 հոգի գրանցվել եւ բնակության են տեղափոխվել Սոթք:

«Մեզ մոտ նկատելի է նաեւ բնակչության եկամուտների որոշակի աճ: Այս տարի հիմնանորոգում եւ կից կառույց է կատարվել 10 բնակարաններում, հիմքից կառուցվել է մեկ առանձնատուն, 12 ընտանիք գնել են մարդատար նոր ավտոմեքենաներ: Ավելանում է մանր եւ խոշոր եղջերավոր անասունների թիվը, մշակվող վարելահողերի մակերեսը: Իսկ հիմնական ձեռքբերումը, անշուշտ, բնակչության թվի ավելացումն է սահմանամերձ մեր համայնքում, ինչը տարեցտարի նոր թափ է առնում: Մեզ մոտ արտագաղթի փոխարեն ներգաղթ է նկատվում»,-նշեց համայնքի ղեկավարը: Կոլիկ Շահսուվարյանի անձնական նախ աձեռնությամբ եւ միջոցներով Սուրբ Աստվածածին եկեղեցում Ձեռամբ Տեր- Տարոն քահանա Հունանյանի կատարվեց այս տարվա ընթացքում ծնված 19 սոթքեցի երեխաների մկրտության եւ դրոշմման արարողություն: 

«17 երեխաների հոգու, արյան մեջ ներարկվեց այն ավանդական, ազգապաշտպան ոգին, որը կոչվում է քրիստոնեություն: Այդ հավատքը մեր բնակիչներին կմղի ամենավեհ զգացմունքների: 5-6 տարի հետո նրանք մուտք կգործեն մեր դպրոց, կսովորեն մեսրոպյան տառերով, եւ այդ հայեցի դաստիարակությունը նրանց կներշնչի հետագայում իրենց կյանքը զորավիգ դնելու մեր հայրենիքին, մեր ժողովրդին», -նշեց  Սոթքի միջնակարգ դպրոցի ուսուցչուհի Ռիտա Պետրոսյանը:

«Ես էնքան էի սպասում էս օրվան, անընդհատ ասում էի` էսօր-վաղը կստացվի: Վերջապես մեր հարգարժան գյուղապետի շնորհիվ մեր էրեխեն կնքվեց: Սա իմ կյանքի ամենասուրբ, ամենաուրախ օրն է»-նշեց սոթքեցի Լյուդմիլա Կարապետյանը:Սոթք համայնքում մկրտության եւ դրոշմման այսօրինակ արարողությունն արդեն ավանդույթ է դարձել: Այն կազմակերպվում է գյուղապետարանի եւ անձամբ գյուղապետ Կոլիկ Շահսուվարյանի միջոցներով: Նոր մկրտված 17 երեխաները որպես նվեր ստացան օրհված ոսկե խաչեր: «Ամենագլխավորը, ժողովրդին համախմբում ենք սրանով, նրանց մոտեցնում ենք կրոնին եւ ին չ-որ չափով փորձում ենք օգտակար լինել մարդկանց: Թող Աստված օրհնի հայ ազգին, մեր սոթքեցիների բոլոր ընտանիքներին, թող մեր գյուղերը շեն մնան, եւ մարդիկ չլքեն հայրենիքը»,-նշեց համայնքի ղեկավարը:Սոթքում կնունքն ընթացել է բերքի տոնով  եւ մատաղի արարողությամբ: Առատ սեղանների շուրջ հավաքված սոթքեցիները բաժակ են բարձրացրել  իրենց գյուղի հարատեւության, ընտանիքների շենացման եւ բարեկեցության համար:

«27 տարի առաջ Ադրբեջանից ես բռնագաղթվեցի  միակ տղայիս հետ: Այսօր ընտանիքով 7 հոգի ենք: Աստված ինձ պարգեւեց եւս 4 թոռնիկ: Մաղթում եմ ամբողջ հայ ազգին հարատևություն»,-մաղթեց Սոթքի միջնակարգ դպրոցի ուսուցչուհի Ռիտա Պետրոսյանը:

Խոսրով Խլղաթյան