Քայլում էի դեպի հուշահամալիր, չկար մի մարդ, ով չմոտենար ու հարցներ, թե երբ ենք երկիրն ազատելու այս չարիքի իշխանությունից. Արթուր Վանեցյան

Հայրենիքի փրկության շարժումը մի քանի խնդիր էր դրել իր առաջ, դրանցից մի քանիսը կարողացավ լուծել, մի քանիսը՝ ոչ: Այս մասին Ծիծեռնակաբերդում հայտարարեց Արթուր Վանեցյանը:

Վանեցյանը նշեց, որ շարժումը չկարողացավ անել այնպես, որ արտահերթ ընտրությունները լինեն ոչ Նիկոլ Փաշինյանի վարչապետությամբ. «Բայց ես կարծում եմ, որ շարժումը հստակ կատարել է իր առջև դրված խնդիրը՝ հանրության գերակշիռ մասի մոտ կասկած չկա, որ Նիկոլ Փաշինյանը պետք է հեռանա»:

«Ես նոր քայլում էի դեպի հուշահամալիր, չտեսա մեկ մարդու, որը չմոտենա, չասի, թե երբ ենք ազատում երկիրն այս չարիքի իշխանությունից: Ժողովրդի մեջ կա այդ մոտեցումը, այդ համերաշխությունը, որ այս իշխանությունները պետք է հեռանան:

Եթե լինեն արտահերթ ընտրություններ ու Նիկոլ Փաշինյանը շարունակի պաշտոնավարումը, ընդդիմությունը պետք է ունենա մեկ նպատակ, դրան հեռացնել իշխանությունից։ Այս դեպքում դա պետք է անել ընտրությունների միջոցով»,-ասաց նա:

Վանեցյանը ևս մեկ անգամ ասաց, որ իրենք ընտրությունների մասնակցելու են, իսկ թե ինչ ձևաչափով, դա քննարկման հարց է: