«Անբարոյականության վրա չարժե զարմանալ. հետևություններ են պետք». «Փաստ»

«Փաստ» օրաթերթը գրում է

Երեկ Ազգային ժողովում Նիկոլ Փաշինյանը մի քանի դրվագով պատերազմի արդյունքների մեղքը բարդեց 44-օրյա պատերազմի ժամանակ պատասխանատու դերակատարում ունեցող բարձրաստիճան զինվորականների վրա: Նշենք, որ նախկին բարձրաստիճան զինվորականների կողմից երեկվա ընթացքում արդեն արձագանքներ եղել են՝ նրանք վերահաստատել են իրենց հայտարարությունները՝ իշխանության ղեկավարին մեղադրելով սուտ ու կեղծիք տարածելու և բարոյազուրկ լինելու մեջ: Խնդրի շուրջ խոսել ենք ռազմական փորձագետ Դավիթ Ջամալ յանի հետ, որը «Փաստի» հետ զրույցում նշեց, որ ամբողջ զինվորականությունը պետք է անպայման խոսի:

«Ժամանակն է, որ հանրահայտ փաստերը վերահաստատվեն զինվորականության կողմից: Զինվորականները պետք է ողջ իրականությունը ներկայացնեն հանրությանը, որովհետև մենք տեսնում ենք, որ առանց որևէ ամոթի նշույլի, վարչապետի աթոռին կառչածը ողջ աղետի պատասխանատվությունը փորձում է բարդել բանակի ու զինվորականության վրա: Եթե հիմա զինվորականությունը լռի ու իր խոսքը չասի, նշանակում է, որ իրենք համակերպվել են այն հեռանկարի հետ, որ այս աղետի ողջ մեղքը բարդվելու է իրենց վրա: Կարծում եմ՝ դետալիզացված խոսելն ու իրերն իրենց անունով կոչելը պարզապես արժանապատվության հարց է: Զինվորականությունն իր խոսքը պետք է ասի այս իրավիճակում»,-շեշտեց մեր զրուցակիցը:

Իսկ թե ինչն է պատճառը, որ բանակը վարկաբեկելու գործընթացը ոչ միայն շարունակվում է, այլև նշված անձը դեռ հնարավորություն ունի բանակին մեղադրել ամենաբարձր ամբիոնից, Դ. Ջամալ յանը նշեց. «Այո, պատերազմում աղետի մատնած այդ պատուհասի ողջ գործունեության վերաբերյալ իրականությունը մեր զինվորականությունը դեռ վաղուց պետք է բացահայտ ասեր: Կարծում եմ՝ դա պետք է աներ հենց պատերազմի ընթացքում: Ես մեծ հարգանքով եմ վերաբերվում մեր վաստակ ունեցող զինվորականներին և միշտ ենթադրել եմ, որ, գուցե, ինչ-որ զսպող հանգամանքներ են եղել: Որ, մասնավորապես, երկիրը ցնցումներից հետ պահելու նկատառում կա: Գուցեև այդ պատճառով իրենք զուսպ են արձագանքել մինչ այս տեղի ունեցածին՝ ակնկալելով, որ այս իշխանությունն ինքն այնքան հասուն կգտնվի, որ կթողնի և կհեռանա: Բայց հիմա բանը բանից անցնում է: Մենք տեսնում ենք, որ զինվորականությունն ու բանակը քավության նոխազ են դառնում: Կարծում եմ՝ երբեք ուշ չէ սխալն ուղղելու համար: Հիմա պետք է զինվորականությունը կոնկրետ փաստերով իր խոսքն ասի: Ես նկատի ունեմ տարբեր աղբյուրներից ունեցած այն բազմաթիվ հանգամանքները, որոնք առնվազն մի բանի մասին են վկայում. այն է՝ բանակը պարտության մատնելով՝ խաղարկվել էր հայրենիքը հանձնելու սցենարը: Այդ տեղեկությունները հիմա պետք է վերահաստատվեն լիովին, փաստարկված ու հիմնավորված: Հիմա զինվորականների խոսելու ժամանակն է»:

Անդրադառնալով պատերազմի արդյունքների մեջ որևէ կերպ իրենց մեղքի բաժինը չտեսնելու՝ իշխանությունների հռետորաբանությանը, կապիտուլ յանտ չլինելու պնդումներին՝ Դավիթ Ջամալ յանը հավելեց. «Այդ մարդիկ, եթե, իհարկե իրենց կարելի է այդպես կոչել, ծանրաբեռնված չեն որևէ բարոյական տաբուներով: Եվ չի կարելի զարմանալ հերթական ցինիզմի վրա: Պարզապես պետք է սթափվել: Մասնավորապես, պետք է սթափվեն մեր այն հայրենակիցները, որոնք համառորեն բարոյականություն, հայրենասիրություն են որոնում այս թրքացածների, այս խունտայի մեջ: Պետք է սթափվեն ու հասկանան, որ եթե առաջիկայում՝ լինի ընտրություններով կամ առանց ընտրությունների, հստակ քաղաքացիական կեցվածք չցուցաբերեն ու չհեռացնեն այս թրքացածների զանգվածին իշխանության բուրգից, ապա մեր երկրին սպառնում է թրքացում, կատարյալ աղետ, արտագաղթ:

Այդ դեպքում սպասվում է ամենասարսափելին՝ թրքացած Հայաստան, ինչն անգամ մղձավանջային երազում տեսնել հնարավոր չէր: Այնպես որ, կարծում եմ, չարժե զարմանալ անբարոյականության վրա: Այս դեպքում դա օրինաչափ է: Զարմանալ պետք չէ, բայց հետևություններ անել պետք է: Այդ համատեքստում կրկին եմ շեշտում զինվորականության մասին, որը փաստերով ու առարկայական խոսքերով պետք է հանդես գա, ցույց տա այս իշխանության կապիտուլ յանտ լինելու հանգամանքը, իսկ մեր հայրենակիցները պետք է վերջապես սթափվեն ու հասկանան, որ այս պատուհասից ազատվելու ժամանակն է»:

Աննա Բադալյան

Մանրամասները՝ «Փաստ» օրաթերթի այսօրվա համարում