Մեղավորը եղել է գեներալի որդին. Նիկոլ Փաշինյանը ներկայացրեց մեզ համար սարսափելի ելքով օպերացիայի իր մանրամասները

Այդ դրվագի հետ Լելեթեփե բարձունքը կապ չունի: Այս մասին խորհրդարանում հայտարարեց Նիկոլ Փաշինյանը՝ խոսելով հայտնի օպերացիայի մասին, որի տապալումից հետո, տարածված տեղեկությունների համաձայն, մեր զորքերը սկսել են նահանջել: Ընդ որում, նշվում է, որ այդ օպերացիայի ժամանակ մենք մեծ մարդկային ու տեխնիկայի կորուստներ ենք ունեցել:

Փաշինյանը, մանրամասնելով դեպքերը, հայտարարեց, որ X պահի հակառակորդը հարավային ճակատում ճեղքում է իրականացրել ու առաջխաղացում է իրականացվել մինչև Ջաբրայիլ՝ ուղղություն վերցնելով դեպի Հադրութ. «Մենք Թալիշում էլ ենք ճեղքում ունեցել, բայց կանգնեցվել է: Հարց հնչեց, թե ինչ պետք է անել: Արցախյան հերոսամարտի ամենաակատիվ դեմքերից մեկն արել է առաջարկ, որ պետք է հյուսիսից կտրել այդ հատվածն ու հակառակորդի ուժերն անջատել իրարից: Ես ասել եմ, որ պետք է քննարկել գործող զինվորական պաշտոնյաների հետ: ՊԲ հրամանատարական կետում՝ Ստեփանակերտում ես հրավիրել եմ քննարկում, ՀՀ ԶՈւ ԳՇ պետն էլ միացել է սելեկտրով: Ես ասել եմ, որ նման առաջարկ կա: Քննարկվել է, արդյունքում ՀՀ ԶՈՒ ԳՇ պետն ասել է, որ հետաքրքիր գաղափար է, բայց պետք է տեղում գնահատել իրադրությունն ու տեսնել, թե ինչքանով է դա իրականանալի։ Իրադրության գնահատումը պետք է իրականացնի ՊԲ հրամանատարությունը:

Դրանից հեոտ ՊԲ հրամանատարությունը գնահատել է ու զեկուցել ԳՇ պետին, որ իրականանալի է, կարելի է իրականացնել: ԳՇ պետն էլ ինձ է զեկուցել դա, ես ասել եմ՝ շատ լավ: Դրանից հետո օպերացիան սկսվել է, ինձ զեկուցել են, որ մի քանի ժամ հաջող իրագործվել է: Չի իրագործվել այն պատճառով, որ տանկային միավորումներից մեկը նախատեսված ձևով չի մասնակցել օպերացիային ու չի արել իր անելիքը:

Քննության առարկա չպետք է լինի, թե ինչու չեն արել: Եթե այդ օպերացիան ստացվեր, մենք մեծ հավանականությամբ այլ իրադրություն կունենայինք: Այդ միավորումը, որի հրամանատարը եղել է այսօր ընդդիմադիր գործունեություն ծավալող գեներալներից մեկի որդին, չի կատարել իր պարտականությունները: Այս խառը ժամանակները կանցնի, կքննենք»:

Փաշինյանը ենթադրեց, որ ինչ-որ մեկը զանգել է ու ասել է, որ հակառակորդը Երևանում է. «Կարող ա նորահայտ ընդդիմադիր գործիչն ինքն է զանգել որդուն, իրեն էլ զանգել է իր քաղաքական առաջնորդը: Կպարզենք»: