«Մայրիկիս ասել էի՝ չդիտես, ընտանիքիցս կաշկանդվում էի». «Ծաղիկներ ձյան տակ» սերիալից Մայիս Համբարձումյանը՝ անկողնային տեսարանի և ընտանիքի արձագանքի մասին

Երիտասարդ դերասան Մայիս Համբարձումյանի «Արմենիա TV»-ի նոր՝ «Ծաղիկներ ձյան տակ» նախագծում ստացավ իր առաջին առանցքային կերպարը և միանգամից հայտնվեց հանրության ուշադրության կենտրոնում, քանի որ նկարահանվել էր բաց տեսարանում։ Tert.am Life-ը զրուցել է 24-ամյա դերասանի հետ ինչպես մասնագիտական գործունեության, ժամանակին թատրոնում խաղալու, այնպես էլ նոր նախագծի, անկողնային տեսարանների համար քննադատվելու և ծնողների վերաբերմունքի մասին:

Մայիսն ավարտել է Երևանի թատրոնի և կինոյի պետական ինստիտուտը, ժամանակին խաղացել է Կամերային թատրոնում:

«Անձնական խնդիրների պատճառով թատրոնից դուրս եկա: Այդ շրջանում պետք է ընտրեի՝ թատրո՞ն, թե՞ աշխատանք, որի միջոցով կարող եմ գումար վաստակել, երկրորդն ընտրեցի: Համալսարանում սովորելու տարիներին խաղացել եմ նաև Հանրային հեռուստաընկերության «Վերջին ուսուցիչը» հեռուստադրամայում: «Անատոլիական պատմություն» հեռուստադրամայից և ռեժիսոր Մհեր Մկրտչյանի գեղարվեստական ֆիլմից առաջարկներ եմ ստացել, դերերն էպիզոդիկ էին, համաձայնել եմ: Այլ առաջարկներ չեն եղել, ինքս չէի հետաքրքրվում, քանի զբաղվում էի SMM-ով և աշխատում այդ ուղղությամբ»,- ասաց նա:

Երիտասարդ դերասանի խոսքով՝ Ելենա Արշակյանի նոր նախագծի մասին իմացել է նրա էջում հայտարարված քասթինգից:

«Գնացի, ներկայացա, չէի սպասում, որ դուր կգամ Ելենային, բայց տեքստ կարդալիս ասաց, որ ինձ այլ բարդ տեսարան տան, որովհետև ձայնս իրեն դուր է գալիս: Դրանից հետո ասացին՝ կզանգահարեն, բայց չէի մտածում այդ ուղղությամբ, քանի որ նախկինում մասնակցել էի քասթինգների, սրտատրոփ սպասել զանգի, բայց այդպես էլ չէին զանգել: Այս անգամ չսպասեցի, բայց մոտ մեկ շաբաթ անց կեսգիշերին զանգահարեցին և ասացին, որ ուզում են նորից տեսնել ինձ: Հաջորդ օրը գնացի, Ելենան ասաց, որ այդ ուշ ժամին հիշել է ինձ, և ես պետք է լինեմ տվյալ կերպարում: Սերիալում իմ նշանածին՝ Անահիտին մարմնավորող դերասանուհի Մերի Երեմյանը ևս այնտեղ էր, միասին տեսարան անցանք և Ելենան ասաց՝ դու ես: Որոշ ժամանակ անց ստացա երրորդ զանգը, գնացի, որպեսզի տեսնեն՝ մյուս խաղընկերոջս՝ Լիլիի դերակատարի հետ համապատասխա՞ն ենք: Մինչև վերջ չէի հավատում, որ կընտրվեմ, մտածում էի՝ գուցե դերասաններից ավելի լավ տարբերակ լինի, բայց մի օր ինձ ավելացրին դերասանների չատում և ասացին առաջին նկարահանման օրն ու ժամը»,- պատմեց նա:

Ըստ Մայիսի՝ «Ծաղիկներ ձյան տակ» հեռուստասերիալն առաջին նախագիծն է, որտեղ առանցքային կերպարում է: «Անկեղծ ասած, կերպարս ինձնից շատ տարբեր է: Բնավորությամբ հանգիստ եմ, ինձ մարդկանց հանդեպ վատ չեմ պահի, «մաչո» էլ չեմ, Աբուլն իմ հակապատկերն է, բայց սիրում եմ կերպարս: Նա իր նախապատմությունն ունի, փորձությունների միջով է անցել, այդ պատճառով կյանքի արժեքները փոխվել են: Հետաքրքիր է քեզնից շատ տարբեր կերպար մարմնավորելը: Շատ են ասում, որ Աբուլի կերպարն այնքան տարբեր է, որ ինձ չեն ճանաչել, դերասանը պետք է հենց այդպիսին լինի»,- նշեց Մայիսը:

Հեռուստասերիալում Մայիսի մուտքն ազդարարվում է անկողնային տեսարանով: Դերասանն ընդգծեց՝ միշտ մտածել է, որ բաց տեսարաններում չի նկարահանվի, որովհետև հայ իրականության մեջ նման տեսարանները չեն ընկալվում: Միաժամանակ նկատեց, որ իր համար անհասկանալի է նման մոտեցումը, եթե արտերկրում նկարահանված ֆիլմերի նման տեսարանները դիտում են և չեն քննադատում։

«Հումորային տարբերակներով բաց տեսարաններ տեսնելիս բոլորը ժպտում են, բայց երբ հերթը հասնում է ֆիլմին, բացասական են արձագանքում: Շատերը գրում են, որ երեխաներ, ընտանիքի անդամների հետ են դիտում սերիալը, բայց ես դրան կողմ չեմ: Իմ եղբայրն էլ փոքր է, այդ տեսարանի ժամանակ փակել է աչքերն ու ասել մայրիկիս՝ կբացի, երբ տեսարանն ավարտվի: Մեր հասարակությունն ընտանիքով դիտում է բաց տեսարաններով հոլիվուդյան ֆիլմեր, ոչ մի բացասական բան չի ասում, իսկ երբ հերթը հասնում է հայկականին, քննադատում է: Միշտ առանձնացնում ենք մեզ՝ ասելով՝ մենք հայ ենք, իրենք ամերիկացի, բայց բոլորս էլ մարդ ենք: Ժամանակն է փոխվել, միաձուլվել աշխարհին՝ չկորցնելով մեր ազգային արժեքները»,- ասաց նա:

Դերասանը շեշտեց, որ հեռուստասերիալի նկարահանումներից առաջ քննադատվելու վախ չուներ, ընտանիքի անդամներին նախապես ասել էր, որ գուցե իր մասին վատ բաներ խոսեն, բացասական մեկնաբանություններ գրեն ուշադրություն չդարձնեն այդ ամենին։

«Ես այդ ամենը հասկանալով եմ ընտրել մասնագիտությունս: Մայրս չի նեղսրտում քննադատություններից, հարցնում էր՝ ե՞րբ են այդ տեսարանը ցույց տալու, ես էլ ասում էի՝ պետք չէ դիտես: Այդ օրը գլուխս կախ տուն գնացի, ընտանիքիցս ներքին կաշկանդվածություն ունեի: Անկողինը մարդու ներքին խոհանոցն է, որն անձնական է, իսկ ես այդ անձնականը ցույց եմ տալիս: Անկողնային տեսարանից հետո ընտանիքիս անդամներն ասում էին՝ ապրես, շատ լավ էր։),– ծիծաղելով ասաց Մայիսը և հավելեց,–Ես չորս տարի չեմ սովորել, որպեսզի արդյունքներ չքաղեմ, բայց և չեմ կարող մարդկանց համոզել, որ ինձ նման մտածեն»:

Դերասանը նաև նկատեց, որ որպես առաջին մեծ դեր, չընկալվելու վախ ուներ: «Ինչպես թատրոնում առաջին անգամ բեմ բարձրանալիս եթե անհանգստություն չունես, նշանակում է՝ բեմը քոնը չէ, նույն կերպ էլ, երբ նոր ես նկարահանվում, մտածում ես՝ գուցե դա լինի քո վերջին նախագիծը: Նաև անհանգստություն կար կապված գործընկերների հետ, գրեթե, ոչ ոքի չէի ճանաչում, բայց առաջին նկարահանման ժամանակ վախս անցավ, որովհետև շատ լավ թիմ ունենք: Հիմա մեր թիմն ընդունում եմ որպես ընտանիք, իսկ հասարակությանը որպես ինձ մեծ եղբայր եմ ընկալում, ով կարող է ասել՝ որևէ տեսարանում լավ չեմ խաղացել»,- եզրափակեց նա: