Սաակաշվիլին Վրաստանում Ուկրաինայի դեսպանին «կաշառակեր և կոռումպացված» է անվանել

Վրաստանի նախկին նախագահ, Օդեսայի նախկին նահանգապետ Միխեիլ Սաակաշվիլին Թբիլիսիում Ուկրաինայի դեսպան Իգոր Դոլգովին «կաշառակեր և կոռումպացված» է անվանել: Այս մասին  նա գրել է իր ֆեյսբուքյան էջում:

«Ես խորապես համոզված եմ, որ այս դեսպանը կաշառակեր  և կոռումպացված է և ոչ մի կապ չունի ուկրաինական շահերի պաշտպանության հետ», -գրել է Սաակաշվիլին, որն այժմ գլխավորում է Ուկրաինայի բարեփոխումների ազգային խորհրդի գործադիր կոմիտեն:

Նրա խոսքերով՝ Դոլգովը «վաղուց կապված է վրացի պաշտոնյաների տեղական բազմաթիվ կոռումպացված շահերի հետ»:

«Սա վերաբերում է ոչ միայն Ուկրաինայի այս  դեսպանին, այլև ամբողջ աշխարհում ուկրաինացի դիվանագետների բավականին մեծ թվին, ինչը ուղղակիորեն համամասնական է ուկրաինական դիվանագիտության արդյունավետության նվազմանը, վարկաբեկմանը և միջազգային հանրության շրջանակներում Ուկրաինայի դիրքերի թուլացմանը,-նշել է Սաակաշվիլին:

Ավելի վաղ Դոլգովը հայտարարել էր, որ Սաակաշվիլիի հայտարարությունները չեն նպաստում Կիևի ու Թբիլիսիի միջև հարաբերությունների զարգացմանը: Դեսպանին կանչել են Վրաստանի արտաքին գործերի նախարարություն այն բանից հետո, երբ նախկին նախագահը հայրենիքում իր համախոհներին կոչ էր արել չհնազանդվել իշխանություններին և չենթարկվել կորոնավիրուսային սահմանափակումներին:

«Ցավոք, ես կրկին ստիպված եմ մեկնաբանել այն անձանց հայտարարությունները, որոնք անմիջական մասնակցություն չունեն Վրաստանի և Ուկրաինայի միջև երկկողմ հարաբերություններում», -ասել է Դոլգովը:

Ավելի վաղ Կիևը ստիպված եղել է հրապարակավ բացատրություն տալ Սաակաշվիլիի հայտարարությունների պատճառով: Նախկին նախագահը, որը մեղադրվում է հայրենիքում մի շարք հանցագործությունների համար, պարբերաբար կոշտ քննադատում է Վրաստանի իշխանություններին: