«Այս տարվա ամենամեծ երազանքս գերիների վերադարձն է». Ծովինար Մարտիրոսյանը՝ 36-ամյակը չնշելու, ամուսնու անակնկալի և նպատակների մասին

Դերասանուհի Ծովինար Մարտիրոսյանն այսօր տոնում է 36-ամյակը: Tert.am Life-ի հետ զրույցում դերասանուհին ասաց, որ ծննդյան օրը, սովորաբար, մի փոքր ավելի ժպիտ է ունենում, հուսառատ լինում:

«Իմ ծննդյան օրը սիրում եմ, միշտ բարձր տրամադրությամբ եմ լինում՝ բացառությամբ այս տարվա. մելանխոլիկ տրամադրության մեջ եմ, կորուստները շատ էին: Ամանորը չեմ նշել, այս օրն էլ չեմ նշելու: Ավելորդ ճոխությունների, ուրախության իմաստ չեմ տեսնում: Երբ գիտեմ՝ ունենք կորցրած զինվորներ, չվերադարձված գերիներ, վտանգված հայրենիք, ինչպե՞ս կարող եմ ուրախ լինել: Մայրս՝ ՀՀ վաստակավոր արտիստ Գրետա Մեջլումյանը, սեպտեմբերի 27-ից մազերը չի ներկել մինչև այսօր: Երբ նայում եմ ճերմակած մորս, հասկանում եմ հայ կնոջ ուժը, կարեկցանքը: Գուցե երեկոյան ծնողներս ինձ այցելեն, բայց հատուկ ոչինչ հաստատ չեմ անելու» ,- ասաց նա:

Չնայած տխուր տրամադրությանը՝ Ծովինարի ամուսինը՝ դերասան Նարեկ Հայկազյանը,որդիների՝ Անրիի ու Արշակի հետ ուրախացրել են հոբելյարին: «Նարեկն իր ոճի մեջ է, արդեն բոլորն էլ գիտեն: Կեսգիշերին երեխաների հետ տորթով շնորհավորեցին ինձ, Նարեկն անակնկալ նվեր էր պատրաստել ինձ համար, բայց չեմ ուզում ասել, թե ինչ: Նաև ընկերուհիս էր եկել կեսգիշերին, երկու տորթ եմ ունեցել և մոմեր փչել: Այս տարի իմ ամենամեծ երազանքս գերիների վերադարձն է, մաղթանքները՝ հայրենիքիս: Այս տարի կարծես ինքս ինձ նման չլինեմ» ,- նշեց նա:

Դերասանուհու խոսքով՝ իրատես մարդ է, իր նպատակներն արագ չեն կատարվում: «Չեմ կարող ասել, որ նպատակներս արագ են կատարվում, բայց շնորհակալ եմ Աստծուն, որ դրանք կատարվում են ինչ-որ ճանապարհ անցնելուց հետո: Այդ ճանապարհին դու հղկվում ես, ավելի շատ ես արժևորում ունեցածդ: Առհասարակ, բարդություններ շատ են լինում, ուղղակի պետք է ճիշտ, խորակերտ կերպով անցնես դրանց միջով: Իմ կյանքում ոչինչ հեշտ կերպով չի տրվել,- ասաց նա և հավելեց, որ 36 տարվա ընթացքում շատ նպատակներ են կատարվել, շատ ձեռքբերումներ է ունեցել,- Իմ ամենամեծ ձեռքբերումն ընտանիքս է: Չեմ կարծում՝ մասնագիտական ձեռքբերումները կարելի է համեմատել ընտանիքի հետ, բայց դրանք էլ են եղել և կարևոր են»:

Ծովինարը նկատեց, որ սիրում է վերլուծել անցածը, թե ի՞նչ է կորցրել, գտել: «Փորձում եմ լավ հիշողություններս պահել ու լավատես լինել: Իմ ծննդյան օրերը միշտ ուրախ են անցել, կարծում եմ՝ միջավայրից է եղել: 35-ամյակիս Նարեկի անակնկալները շատ հուզիչ էին, տեսանյութ էր պատրաստել գեղեցիկ, Նարեկը չի թողնում, որ տխրեմ: Ամեն տարիք, տարի իր գեղեցկությունն ունի, ամեն կնճիռ իր պատմությունն ունի, չես կարող միշտ երիտասարդ մնալ: Ես տարիքից չեմ վախենում, հոգով 18 տարեկան եմ զգում և ինձ երջանիկ մարդ եմ համարում»,- եզրափակեց նա: