«Նիկոլ, ժողովրդի 2/3-ը միանշանակ քո շուտափույթ հեռացումն է կամենում». Պարույր Հայրիկյան

Past.am

Պարույր Հայրիկյանը Ֆեյսբուքի իր էջում գրում է.

Նիկոլ, արժանի չես, որ քեզ դիմեմ։ Միայն այն որ դու ինձ «ամենաչգնահատուած ազգային գործիչն» անուանելով ինքդ էլ փորձեցիր լինել չգնահատող ապերախտների թւում (մասնաւորապէս իմ սահմանադրական նախաձեռնութիւններում), հերիք էր, որ քեզ մարդ չհամարէի, բայց հիմա պարտաւոր եմ վերջին անգամ քեզ սթափուելու կոչ անել։ Օղորմի հայրիկիդ, յիշում եմ որ ի զարմանս քեզ, նա 91-ի ընտրութիւններում իմ օգտին էր քուէարկել, բայց դու չապրեցիր այնպէս, որ ծնողիդ բոլորը բարի յիշեն։

 Սակայն խօսքս այլ բանի մասին է։

Ասում էիր, որ հրաժարական կը տաս միայն ժողովրդի կամքով։ Հիմա ես քեզ ամենայն պատասխանատւութեամբ տեղեկացնում եմ՝ ժողովրդի 2/3-ը միանշանակ քո շուտափոյթ հեռացումն է կամենում։ Միւսներն էլ ոչ թէ քեզ կողմ են, այլ զգուշաւոր են՝ չեն շտապում վճռական լինել։

Գիտե՞ս, գիտութիւն կայ․կոչւում է Հասարակական կարծիքի ուսումնասիրում։ Որպէսզի ամեն առիթով պետութիւնները հանրաքուէի չդիմեն, սակայն հստակ իմանան հանրութեան տեսակէտն այս կամ այն հարցի վերաբերեալ, օգտւում են այդ ծառայութիւններից։ Հայաստանում էլ կան․ուզու՞մ ես տուեալները փոխանցեմ։ Քեզ համար էլ կարծում եմ, բաւական էժան կանեն այդ գործը՝ մօտ 800 000 դրամ։ Սակայն խորհուրդ չեմ տալիս․աւելի խելամիտ կը լինի քեզ համար այս գիշեր չխմել, լուռ հաւաքել իրերդ եւ կէս գիշեր չեղած ազդարարել, որ հեռանում ես պաշտօնից։

Սպառնալ չեմ սիրում, բայց նախազգուշացնում եմ․վաղը, հենց վաղը ես հանրութեանը կը փոխանցեմ, թէ ինչ կարծիքի է քո իշխանաւորումը շարունակելու մասին հանրութեան 79 տոկոսը։

Եւ սա ցուցարարների քանակ չէ, սա տպաւորութիւն չէ, ոչ էլ կեղծուած ընտրութիւն։ Սա գիտութիւն է իր ողջ անողոք անաչառութեամբ։

Այնպէս արա, որ ծնողիդ նաեւ օրհնողներ մնան մեր ազգում։ Մեզ ու մեր ծնողներին յարգել չկարողացար, յարգիր գոնէ քո ծնողներին․․․