«Մեր մտքերը, մեր աղոթքներն ու աջակցությունը ձեզ հետ են». բազմահազարանոց ավտոերթ՝ Կիպրոսում (լուսանկարներ)

Past.am

Կիպրոսում բազմահազարանոց  ավտոերթ է տեղի ունեցել, որի մասնակիցներն իրենց աջակցությունն են հայտնել հայրենիքում գտնվող իրենց հայրենակիցներին, առաջնագծում կանգնած զինվորներին: Այս մասին Past.am-ին հայտնեցԿիպրոսի հայ համայնքի ներկայացուցիչ Անժելիկա Ազադյանցը:

«Պաֆոսում և Լիմասոլում ապրող մեր հայրենակիցները նշված քաղաքներից ավտոերթով ու դրոշներով հասել են Կիպրոսի մայրաքաղաք Նիկոսիա: Այստեղ կրկին երթի մասնակիցների թիվը մեծացել է: Երթի մասնակիցներն անցել են ՌԴ-ի, Ֆրանսիայի և ԱՄՆ-ի դեսպանատների մոտով, այնուհետև ի նշան բողոքի՝ կանգ առել Իսրայելի դեսպանատան մոտ: Նրանք իրենց բողոքի ձայնն են բարձրացրել Իսրայելի՝ Ադրբեջանին ու Թուրքիային զինելու շարունակական քաղաքականության համար:  Հաջորդ կանգառը հայկական եկեղեցիներն են եղել, որտեղ խաղաղ ցույցն ավարտվել է»,-ասաց համայնքի ներկայացուցիչը:

Նրա փոխանցմամբ, հայկական համայնքի ներկայացուցիչները հայտարարել են, որ նման ակցիաները շարունակվելու են այնքան, մինչև Ադրբեջանը չդադարեցնի իր ագրեսիան:

«Լուսանկարները չեն փոխանցում այն միասնականությունը, այն համերաշխությունը,  որն ուզում ենք հասնի առաջնագծում կանգնած մեր զինվորներին, զինվորականներին,  որոնք այս պահին շարունակոում են պահել Արցախի հողը: Մեր մտքերը, մեր աղոթքներն ու մեր աջակցությունը ձեզ հետ են, սիրելինե՛ր»,-եզրափակեց Ա. Ազադյանցը: