Զբո­սաշր­ջու­թյան զար­գաց­ման նոր ռազ­մա­վա­րու­թյուն. կստեղծ­վեն աշ­խա­տա­տե­ղեր և կա­վե­լա­նան ֆի­նան­սա­կան հոս­քե­րը.«Փաստ»

«Փաստ» օրաթերթը գրում է

Կորոնավիրուսային համաճարակը մեծ հարվածներ հասցրեց բոլոր երկրներին: Տարբեր երկրների տնտեսական բլոկները փորձում են հաշվարկել կրած վնասները և որոշակի քայլեր կատարել կարճ ժամանակում խնդիրները լուծելու համար: Գաղտնիք չէ, որ Հայաստանում ամենաշատը տուժած ոլորտներից մեկը զբոսաշրջությունն է: Նախորդ տարիներին դրական շարժը նկատելի էր՝ Հայաստան այցելող զբոսաշրջիկների թվի աճի առումով: Ճիշտ է, կային խնդիրներ, որոնց մասին «Փաստը» ևս բարձրաձայնում էր: Բայց այս տարվա մարտից մենք ողջ աշխարհում լիովին այլ իրավիճակ ունենք:

Այս տարի համաճարակը, հիմա արդեն նաև պատերազմն Արցախում, ցավոք, ունեցան և կունենան իրենց բացասական ազդեցությունը ոլորտի զարգացման և եղած ձեռքբերումները պահելու առումով: Այստեղ պետք է լինի պետության հստակ աջակցությունը ոլորտում աշխատող անհատներին ու կազմակերպություններին: Եվ այսպիսով՝ ՀՀ էկոնոմիկայի նախարարության զբոսաշրջության կոմիտեն ներկայացրել է Հայաստանի զբոսաշրջության զարգացման 2021-2030 թվականների ռազմավարությունը:

Նախագծի հիմնավորման մեջ նշվում է, որ նոր մարտահրավերների պայմաններում Հայաստանի և հայկական զբոսաշրջային արդյունքի շարունակական զարգացման, համաշխարհային զբոսաշրջային շուկայում ճանաչելիության բարձրացման, մրցունակության ամրապնդման ու բարձրացման անհրաժեշտությունից ելնելով, այդ թվում` նպաստելով ակտիվ մարքեթինգային քաղաքականության իրականացմանը, հայկական զբոսաշրջային արդյունքի դիվերսիֆիկացմանը, համայնքներում զբոսաշրջության զարգացմանը, համաչափ տարածքային տնտեսական զարգացմանը, մարդկային ռեսուրսների զարգացմանը, միջազգային համագործակցության ակտիվացմանն, առաջացել է զբոսաշրջության ոլորտի նոր ռազմավարության մշակման անհրաժեշտություն:

Ներկայումս համաշխարհային համաճարակի հետևանքով առաջացել է նոր մոտեցումների և միջոցառումների անհրաժեշտություն՝ ուղղված նաև ներքին զբոսաշրջության զարգացմանը։ Հայաստանի զբոսաշրջության զարգացման 2021-2030 թվականների ռազմավարությամբ նախատեսվում է բարձրացնել զբոսաշրջության ոլորտում պետական քաղաքականության իրականացման արդյունավետությունը՝ ներգրավելով նաև այլ շահագրգիռ կողմերի։ Ռազմավարությամբ առանձնացվել են Հայաստանում առավել ներուժ ունեցող զբոսաշրջության ձևերը, սահմանվել են ոլորտի զարգացման գոտիները և կլաստերները, հետագա աճի հնարավորությունները մինչև 2030 թվականը։

Նշվում է, որ զբոսաշրջության զարգացման այս փաստաթղթի նպատակն է ձևավորել զարգացման ուղղությունները և գործողությունների ծրագիրը, որը սահմանում է առաջնային և երկրորդական զարգացման ձևերը և դրա իրականացման միջոցառումները՝ նպաստելով գրավիչ և մրցունակ զբոսաշրջության առաջարկի կայացմանը: Ռազմավարությունն իր առջև մի քանի խնդիր է դնում: Նախ՝ Հայաստան այցելուների թվի ավելացում և ներքին զբոսաշրջության խթանում, զբոսաշրջային առաջարկների բազմազանություն, Հայաստանում զբոսաշրջիկների գտնվելու ժամանակահատվածի երկարաձգում և ծախսի հնարավորությունների ընդլայնում, ենթակառուցվածքների և մատուցվող ծառայությունների որակի բարելավում, համաշխարհային զբոսաշրջային քարտեզում Հայաստանի դիրքի բարելավում, զբոսաշրջության ոլորտի կրթության և մասնագիտական որակավորման համակարգի ամրապնդում։

Մինչև 2030 թվականը ռազմավարության իրատեսական սցենարի իրականացման արդյունքում ընդհանուր տարեկան աճի տեմպի պահպանման պայմաններում ակնկալվում է հասնել զբոսաշրջության հետևյալ ցուցանիշներին՝ 4,3 մլն միջազգային զբոսաշրջային այցելություններ, 3,4 մլրդ ԱՄՆ դոլար զբոսաշրջային ծախսեր և 5000 մշտական աշխատատեղի ստեղծում:

Մանրամասները՝ «Փաստ» օրաթերթի այսօրվա համարում