«Իրանում գերակշռողը հայամետ հրապարակումներն են». բարեկամ երկիրը երկու խնդրի շուրջ անհանգստություն ունի

Past.am

Իրանական լրատվական դաշտում գերակշռում են կա՛մ չեզոք, կամ հայամետ դիրքորոշումները: Արցախի շուրջ տիրող իրավիճակի հենց առաջին օրվանից  տարածվեցին  ՀՀ ՊՆ-ի կողմից հրապարակված թվերը, տեսանյութերը և այլն, իսկ սոցիալական հարթակներում գերակշռում են հայամետ դիրքորոշումները: Փորձագիտավերլուծական շրջանակներում ևս գերակշռողը հայամետ հրապարակումներն են: Past.am-ի հետ զրույցում այս մասին հայտնեց իրանագետ, ԵՊՀ դասախոս Գարիկ Միսակյանը: Նրա խոսքով, Իրանի պետական կառույցներին կից սոցիալական մեդիայում ադրբեջանական կորուստների վերաբերյալ հենց ՀՀ-ի հրապարակած թվերն են տարածվում, թեպետ Ադրբեջանի կողմից դրանք չեն ընդունվում:

«Իրանում բազմաթիվ են հայտարարությունները պատերազմը դադարեցնելու և բանակցային սեղանին վերադառնալու վերաբերյալ: Ինչ վերաբերում է Իրանի պաշտոնական դիրքորոշմանը, ապա հայտարարեցին, որ Իրանի պաշտոնական դիրքորոշումը չի փոփոխել՝ կողմ են Արցախի հարցի խաղաղ կարգավորմանը և դատապարտում են ցանկացած ակտիվացում: Բացի այդ, Իրանի կողմից չափազանց բացասական վերաբերմունք կա ինչպես հակամարտությունում թուրքական գործոնի մեծացման, այնպես էլ ահաբեկիչների՝ Ադրբեջանի տարածքում և Թուրքիայի հյուսիսային սահմանների մոտ հայտնվելու առումով: Դրանց մասին որոշ կոշտ հայտարարություններ են եղել և՛ մամուլում, և՛ վերլուծական դաշտում, և՛ պետական մակարդակով»,-ասաց իրանագետը՝ նշելով, որ  Իրանում վերոնշյալ հանգամանքի վերաբերյալ խիստ անհանգստություն են հայտնում ու այն վտանգավոր համարում հենց Իրանի համար:

«Ահաբեկչական խմբավորումների ներկայացուցիչները, որոնք ծայրահեղ ջիհադականներ են, կռվել են Սիրիայում, Լիբիայում: Դրանց ներկայությունն Ադրբեջանի հարավում, մասնավորապես՝ շիաբնակ հատվածներում թալիշների ու մնացած տեղաբնիկ ժողովուրդների շրջանում անհանգստություն է առաջացնում: Անհանգստության պատճառն այն է, որ նրանք կարող են մշտապես մնալ այս տարածաշրջանում ու հայկական հաղթանակից հետո չհեռանալ Ադրբեջանի տարածքից՝ գլխացավանք դառնալով ինչպես Ադրբեջանի, այնպես էլ այդ շրջանում բնակվող շիա բնակչության համար. այդ ծայրահեղ ջիհադիստական իսլամիստները թշնամաբար են վերաբերվում նաև շիաական մահմեդականներին: ԻՀՀ-ի հետ գործող ուժերն այս խմբավորումների դեմ կռվել են Սիրիայում և թշնամի են համարում նրանց»,-եզրափակեց Գ. Միսակյանը: