«Գործ ունենք ահաբեկիչ պետությունների հետ. սա հերթական հանցագործությունն է մարդկության առաջ». Ռուբեն Մելքոնյան

ՀԱՐՑԱԶՐՈՒՅՑ 28 Սեպտեմբեր, 2020 13:14

Վերջին ժամանակներում Թուրքիայի պահվածքը, ըստ էության, կանխագուշակում էր, որ տարբեր տարածաշրջանների կոնֆլիկտներում ունեցած իր ներգրավվածությունը շարունակական է լինելու և հաջորդ թիրախը լինելու է Հարավային Կովկասը: Past.am-ի հետ զրույցումասաց թուրքագետ Ռուբեն Մելքոնյանն՝ անդրադառնալով Ադրբեջանի սանձազերծած ռազմական գործողություններին, Թուրքիայի ներգրավվածությանն ու արձագանքին:

«Մինչ այս Թուրքիան ներգրավված էր սիրիական, իրաքյան, լիբիական և այլ կոնֆլիկտներում, հետո ավելացավ նաև Միջերկրական ծովի խնդիրը: Ակնհայտ էր, որ Հարավային Կովկասը չէր կարող Թուրքիայի հետաքրքրություններից դուրս լինել: Մենք թուրքական գլոբալ քաղաքականության դրսևորումներին ենք ականատես լինում, իսկ մեր տարածաշրջանում Թուրքիայի վաղեմի նպատակը Արցախյան կոնֆլիկտի մեջ ներգրավվելն է: Սա Թուրքիայի ահաբեկչական պետական մտածողության հերթական դրսևորումն է, սա միջազգային տարատեսակ չափորոշիչների խախտման օրինակ է: Ինչ վերաբերում է կոնկրետ գործողություններին, ապա սա հերթական հանցագործությունն է մարդկության առաջ, որի շրջանակներում թուրք-ադրբեջանական համագործակցությունը հերթական դրսևորումն են ունենում: Մենք գործ ունենք ահաբեկիչ պետությունների հետ, որոնք իրենց քայլերն իրականացնելիս ակտիվորեն օգտագործում են միջազգային ահաբեկչական կառույցներին, ծայրահեղ իսլամիստներին: Նշվածն արդեն ապացուցված է հստակ օրինակներով»,-ասաց մեր զրուցակիցը:

Ռուբեն Մելքոնյանը շեշտեց՝ բավական է միայն դիտարկել Թուրքիայի պաշտոնական հայտարարությունները, պաշտոնյաների ելույթները. «Դրանք աներկբա ապացույցներ ու փաստեր են առ այն, որ մենք գործ ունենք թուրք-ադրբեջանական համագործակցության հետ, ու մեր դեմ պատերազմում է ոչ միայն Ադրբեջանը, այլև Թուրքիան: Նրանց «մեկ ազգ, երկու պետություն» հայտնի լոզունգին հիմա ավելացել է «մեկ ազգ, մեկ բանակ»-ը: Եվ, փաստորեն, մենք հիմա տեսնում ենք թուրք-ադրբեջանական համատեղ բանակի գործողություններ՝ ընդդեմ Արցախի ժողովրդի և ընդդեմ միջազգային տարբեր չափանիշների»:

Նրա խոսքով, միջազգային հանրությունը մի կողմից ծանոթ է թուրքական ձեռագրին, բայց, ըստ նպատահարմարության, շատ հաճախ լռում է:

«Միջազգային հանրությունն առիթ է ունենում ծանոթանալ թուրքական ձեռագրի ու ոճի նոր դրսևորումներին: Միջազգային հանրությունը ոչ միայն լոկ հայտարարություններով, այլ գործուն մեխանիզմներով պետք է աշխատի թուրքական սպառնալիքը կասեցնելու և չեզոքացնելու ուղղությամբ: Իսկ թուրքական սպառնալիքը ոչ միայն մեզ, Հունաստանին կամ Սիրիային, այլ ամբողջ քաղաքակիրթ աշխարհին է ուղղված: Ցավոք, թուրքական վտանգը տասնամյակների ընթացքում ավելացել է նաև այն պատճառով, որ միջազգային հանրությունը շատ հաճախ մեղսավոր լռություն է պահպանում: Մենք հիմա այդ վտանգի ահագնացած տարբերակին ենք ականատես: Այս ամենը պետք է դաս լինի միջազգային հանրության համար: Թեև շատ լավատես չեմ, որ կարողանալու են ճիշտ դասեր քաղել, բայց, այնուամենայնիվ, պետք է դաս լինի, որ ցեղասպան Թուրքիան ոչ միայն 100 տարի առաջ, այլև 21-րդ դարում է այդ մտածողության կրողն ու շարունակողը: Այդ պետությունն իրենից վտանգ է ներկայացնում ու տեղ չոունի քաղաքակիրթ աշխարհում, քաղաքակիրթ պետությունների շարքում: Թուրքիան պետք է դասվի այն աֆրիկյան ցեղերի շարքին, որոնք 21-րդ դարում շարունակում են զբաղվել մարդակերությամբ»,-հավելեց Ռ. Մելքոնյանը:

Հիշեցնենք, որ երեկ Ադրբեջանի զինուժը հարձակման է անցել արցախա-ադրբեջանական հակամարտ զորքերի շփման գծի ողջ երկայնքով, թիրախավորել նաև բնակավայրերը, ինչպես նաև մայրաքաղաք Ստեփանակերտը:Հայաստանում և Արցախում սեպտեմբերի 27-ին հայտարարվել է ռազմական դրություն։ Գործողությունների հետևանքով կան զոհեր, վիրավորներ:

Աննա Բադալյան