Ռուս-ամերիկյան պրոֆեսիոնալ փորձագիտական երկխոսությունը պետք է ընթացք ստանա․ Վլադիմիր Պուտին

Past.am

Ինչպես   հաղորդում է ՏԱՍՍ լրատվական  գործակալությունը  ՌԴ նախագահ Վլադիմիր Պուտինը համայն աշխարհին, այդ թվում՝ Միացյալ Նահանգներին կիբերանվտանգության ոլորտում համագործակցության կոչ է արել՝ հրապարակելով մի շարք առաջարկներ և ընդգծելով, որ թվային ոլորտում զանգվածային առճակատման մեծ ռիսկ կա:

ՌԴ նախագահն  ասել է, որ ժամանակակից աշխարհի գլխավոր ռազմավարական մարտահրավերներից մեկը թվային ոլորտում մասշտաբային առճակատման առաջացման ռիսկն է:

«Դրա կանխման առանձնահատուկ պատասխանատվությունը կրում են միջազգային տեղեկատվական անվատանգության ոլորտի առանցքային խաղացողները»,-հայտարարել է Պուտինը:

ՌԴ նախագահն ընդգծել է, որ ցանկանում է ևս մեկ անգամ դիմել ԱՄՆ-ին՝ տեղեկատվահաղորդակցային տեխնոլոգիաների կիրառման ոլորտում Ռուսաստանի հետ հարաբերությունների վերագործարկման համար համալիր քայլերի փաթեթին հավանություն տալու առաջարկով:

Պուտինն առաջարկել է վերականգնել միջազգային կիբերանվտանգության ապահովման հարցերով բարձր մակարդակով լիամասշտաբ երկկողմ կանոնավոր միջգերատեսչական երկխոսությունը:

Բացի այդ, երկրի ղեկավարը Վաշինգտոնին կոչ է արել փոխընդունելի ձևաչափով փոխանակվել տեղեկատվական տեխնոլոգիաների միջոցով մեկը մյուսի ներքին գործերին, այդ թվում՝ ընտրական գործընթացներին չմիջամտելու երաշխիքներով:

Պուտինը շեշտել է, որ ռուս-ամերիկյան պրոֆեսիոնալ փորձագիտական երկխոսությունը պետք է ընթացք ստանա՝  չդառնալով երկու երկրների քաղաքական տարաձայնությունների գերին:

«Այս քայլերն ուղղված են մեր պետությունների միջև վստահության մակարդակի բարձրացմանը, մեր ժողովուրդների անվտանգության ապահովմանն ու բարգավաճմանը: Դրանք էական ներդրում կլինեն տեղեկատվական ոլորտում համաշխարհային խաղաղության կառուցման հարցում»,-ասել է ՌԴ նախագահը:

Դիմելով բոլոր երկրներին, այդ թվում՝ ԱՄՆ-ին՝ Պուտինն առաջարկել է համաշխարհային համաձայնագիր ընդունել առ այն, որ  պետությունները պարտավորվում են տեղեկատվական տեխնոլոգիաների կիրառմամբ իրար առաջինը հարված չհասցնել: