«Ղրիմը մեր տարածքն է, ու մենք կվերադարձնենք այն». Զելենսկի

Ուկրաինայի նախագահ Վլադիմիր Զելենսկին Euronews հեռուստաալիքին տված հարցազրույցի ընթացքում հայտարարել է, որ անցած վեց տարում Ղրիմի դեօկուպացիայի հարցով բանակցային որևէ հարթակ չի ստեղծվել, և խոստացել է շտկել իրավիճակը, գրում է korrespondent.net կայքը՝ հղում տալով նախագահի մամուլի ծառայության հայտարարությանը։

«Նորմանդական բանակցային գործընթացի շրջանակում Ռուսաստանը չի ցանկանում Ղրիմի Ինքնավար Հանրապետության դեօկուպացման հարցը քննարկել, իսկ վեց տարվա մեջ որևէ արդյունավետ բանակցային հարթակ, որը կարող էր թերակղզին ուկրաինական վերահսկողության տակ վերադարձնել, չի ստեղծվել։ Սակայն ուկրաինական գործող իշխանություններն աշխատելու են դրա փոփոխման ուղղությամբ»,- հայտարարել է Զելենսկին։ 

Նախագահը հավելել է, որ Ղրիմի հետ կապված իրավիճակը շատ ավելի բարդ է, քան Դոնբասինը, և ընդգծել է, որ նորմանդական ձևաչափով բանակցությունների ընթացքում նա բարձրացրել է «ղրիմյան հարցը», սակայն Ռուսաստանը հրաժարվել է քննարկմանը մասնակցել։ 

«Ղրիմը մեր տարածքն է, ու մենք կվերադարձնենք այն»,- նշել է նախագահը, ինչպես նաև շնորհակալություն հայտնել դաշնակիցներին՝ ԱՄՆ-ին, եվրոպական և մի շարք այլ երկրների ցուցաբերած աջակցության համար։

Զելենսկին ընդգծել է, որ Ղրիմի դեօկուպացիան նույնչափ առաջնային է իր համար, որքան Դոնբասինը։ 

«Այս երկու հարցերի միջև տարբերություն չեմ տեսնում։ Միակն այն է, որ արևելքում մարդիկ են զոհվում, այդ պատճառով էլ հենց այդ մարդկային գործոնը հաշվի առնելով՝ ինձ համար անձամբ սա առաջին տեղում է։ Սակայն երկու տարածքներն էլ մերն են, ու պետք է վերադարձվեն»,-նշել է նախագահը: