Նոր չափանիշներ բուքմեյքերական գրասենյակների և խաղասրահների տեղակայման նկատմամբ

Past.am

Ֆինանսների նախարարությունը հանրային քննարկման է ներկայացրել «Վիճակախաղի կամ անմիջականորեն տոտալիզատորի յուրաքանչյուր կազմակերպչի բուքմեյքերական գրասենյակի կամ անմիջականորեն (խաղասրահի) միջոցով տոտալիզատորի կազմակերպման գործունեության իրականացման վայրի նկատմամբ ներկայացվող պահանջները և չափանիշները հաստատելու մասին» նախագիծը, որի ընդունումը պայմանավորված է 2020 թ.-ի նոյեմբերի 1-ից ուժի մեջ մտնող «Վիճակախաղերի մասին» օրենքում լրացումներ և փոփոխություն կատա¬րելու մասին» 2019 թ.-ի հոկտեմբերի 3-ի ՀՕ-186-Ն օրենքով, որի համաձայն այս տարվա նոյեմբերի 1-ից բուքմեյքե¬րական գրասենյակի կամ խաղասրահի միջո¬ցով տոտալիզատոր կազմակերպման  գործունեություն կարող է իրականացվել կրթական և պատմամշակութային օջախներից, պետական հիմնարկներից, հիվանդանոցներից կառավարության կողմից սահմանված որոշակի հեռավորության վրա գտնվող տարածքներում, ինչպես նաև այդ տարածքների նկատմամբ կիրառվող չափանիշների համաձայն: Մինչ այս փոփոխության ընդունումը նման չափանիշներ սահմանված չէին:

Նախագծի հիմնավորման մեջ նշվում է, որ միջազգային փորձի ուսումնասիրությունը ցույց է տվել, որ առաջատար երկրներում կարգավորումների առումով կան որոշ տարբերություններ, այնուամենայնիվ, գործունեության իրականացման վայրի նկատմամբ տարածքային սահմանափակումների սկզբունքների առումով ունեն նաև նույնատիպ մոտեցումներ: Օրինակ՝ որոշ պետությունների օրենսդրությունը պարունակում է խաղային հաստատությունների որոշակի օբյեկտների մոտ տեղադրման արգելք՝ մանկական, բժշկական և ուսհաստատություններում, երկրպագության վայրերում, մանկական առողջարաններում, գրադարաններում և թանգարաններում, պետական և տեղական ինքնակառավարման մարմինների վարչական շենքերում, ինչպես նաև տեղական իշխանությունների որոշմամբ արգելված վայրերում: Բացի դա, մի շարք առաջատար երկրներում սահմանմանափակումները կիրառվում են կախված բնակչության թվաքանակից, խտությունից և այլն:

Ուսումնասիրելով այդ կարգավորումները, նախագծի մշակման համար հիմք են ընդունվել մեր երկրի առանձնահատկությունները և ոլորտում իրականացվող քաղաքականության սկզբունքները՝ զերծ պահել հասարակության խոցելի խմբերը վիճակախաղերով հրապուրվելու վտանգից, ելնելով տարածքային համաչափ զարգացման ռազմավարությունից և շահումով խաղերի, ինտերնետ շահումով խաղերի և խաղատների մասին օրենքով կիրառված տարածքային սահմանափակումներից՝ խաղային ոլորտում մեկ միասնական մոտեցում ձևավորելու նպատակով:      

Ներկայումս վիճակախաղի կազմակերպումն իրականացվում է ՀՀ ողջ տարածքում, ընդ որում՝ դրանց գերակշիռ մասը տեղակայված է բնակավայրերի մարդաշատ վայրերում: Այս փաստը բացասական ազդեցություն է թողնում հասարակության վրա`վիճակախաղերով հրապուրվելու վտանգ ստեղծելով: Այսպիսով նախագծով առաջարկվում է սահմանել հետևյալ հեռավորությունները.

1) Երևանի վարչական շրջաններում՝ ուղիղ գծով առնվազն 150 մետր,

2) Կոտայքի մարզկենտրոնում և Ծաղկաձորի համայնքում, Գեղարքունիքի,  Արարատի, Արմավիրի, Արագածոտնի, Լոռու և Շիրակի մարզերի մարզկենտրոններոււմ`ուղիղ գծով առնվազն 100 մետր,

3) Վայոց ձորի մարզկենտրոնում և Ջերմուկ համայնքում, Սյունիքի մարզկենտրոնում և Մեղրի համայնքում և Տավուշի մարզկենտրոնում`ուղիղ գծով առնվազն 50 մետր հեռու կրթական և պատմամշակութային հաստատություններից, պետական և տեղական ինքնակառավարման մարմինների վարչական շենքերից, հիվանդանոցների տարածքներից:

Լուսինե Առաքելյան