Ընդդեմ կորոնավիրուսի. hոգեբաններն անվճար խորհրդատվություն կտրամադրեն

Այս օրերին աշխարհը «փոխել է իր հունը», և, կարծես թե, ապրում ենք բոլորովին այլ իրականության մեջ: Մեր առօրյա ակտիվությունը, ինչ-որ առումով նաև ազատությունը սահմանափակվել է, փոխվել է մեր կենսակերպը: Սրանք պարտադրված փոփոխություններ են, որոնց հետ որևէ բան անել չենք կարող, սակայն ակնհայտ է, որ այս իրավիճակն իր ազդեցությունն է ունենալու մարդկանց հոգեկան աշխարհի վրա:

Մեր քաղաքացիներին որոշակիորեն աջակցելու, սթրեսային իրավիճակներից դուրս բերելու համար Շողեր Աթանեսյանը հետաքրքիր և օգտակար նախաձեռնությամբ է հանդես եկել՝ «Հայ հոգեբաններն ընդդեմ COVID19»-ի: Նախագիծը ստեղծվել է քաղաքացիներին հոգեբանական անվճար խորհրդատվություն տրամադրելու նպատակով, դրանում ներգրավված են ոլորտի լավագույն մասնագետները։ Խորհրդատվությունն իրականացվում է հեռավար, գրանցումը տեղի է ունենում www.hogeban.simplybook.me կայքի միջոցով:

Շողերը նշում է՝ նման նախաձեռնությամբ հանդես գալու միտքը շատ հանկարծակի է առաջացել: «Գաղափարը հանկարծակի առաջացավ և արագ կյանքի կոչվեց: Հայտնի է, որ, ըստ առողջապահության համաշխարհային կազմակերպության, համաճարակի ընթացքում բնական հոգեվիճակ է համարվում սթրեսը, լարվածությունը, տագնապը, ընկճվածությունը, դյուրագրգիռ լինելը, անելանելիության և անորոշության զգացողությունները։ Խրոնիկ սթրեսը և հոգեկան առողջության խաթարումը կարող է հանգեցնել դեպրեսիվ վարքագծի, միջանձնային հարաբերությունների վատթարացման, անգամ բռնությունների ավելացման: 

Այս ամենը հաշվի առնելով՝ դիմեցի հոգեբաններին, որոնք պատրաստակամորեն համաձայնեցին մասնակցել այս նախաձեռնությանը: Նախագիծը լիարժեք դարձնելուն շատ օգնեց հոգեբանների խորհրդատվությունը: Նրանք նշեցին, որ պետք է, օրինակ՝ հատկապես ուշադրություն դարձնել բժիշկներին և հիվանդացածներին հոգեբանական օգնություն տրամադրելուն»,- «Փաստի» հետ զրույցում ասում է նախաձեռնության հեղինակ Շողեր Աթանեսյանը:

Նա ընդգծում է՝ խորհրդակցությունների արդյունքում որոշեցին խորհրդատվությունները բաժանել խմբերի: «Առաջին՝ խորհրդատվություն առողջապահական ոլորտի մասնագետների համար: Լինելով համաճարակի դեմ տարվող պատերազմի առաջնագծում՝ առողջապահության ոլորտի մասնագետները երբեմն դժվարությամբ են կարողանում միայնակ հաղթահարել սթրեսը: 

Երկրորդ՝ սթրեսի և անելանելիության վիճակում գտնվող մարդիկ: Այս շրջանակում այն մարդիկ են, որոնք հիվանդացել են կորոնավիրուսով, որոնց մոտ կասկածվում է հիվանդությունը, կամ մարդիկ, որոնք ռիսկային գոտում են կամ էլ մեկուսացման մեջ: Երրորդը միջանձնային հարաբերություններին վերաբերող խումբն է: 

Սթրեսներն ու ճգնաժամերը կարող են հարաբերություններում այնպիսի խնդիրներ առաջացնել, որոնք առօրյա կյանքում հնարավոր էր անտեսել և ապրել, բայց այժմ լարված իրավիճակների պատճառ են դառնում բարեկամների, ծանոթների, ընկերների հետ հարաբերությունների ժամանակ: 

Մյուս խումբն ընտանեկան խորհրդատվությունն է: Սա նախատեսված է զույգերի համար: Հնարավոր է՝ տանը մեկուսացումը դառնա լարված և կոնֆլիկտային իրավիճակների պատճառ, այս դեպքում հոգեբանն աշխատում է հենց զույգի հետ: 

Հաջորդ խումբը կանանց հանդեպ բռնությունն է: Մեկուսացումը կարող է ընտանեկան բռնության աճի պատճառ դառնալ, նույնիսկ եթե նախկինում բռնության դրսևորումներ չեն եղել: Եվ վերջին խումբը երեխաներին տրամադրվող խորհրդատվությունն է, որպեսզի նրանք հասկանան, թե ծանր ճգնաժամային իրավիճակներում ինչպես իրենց պետք է դրսևորեն:

 Նրանք ուշադրություն են դարձնում մեծահասակների վարքին: Եթե ընտանիքի անդամները, ծնողները լարված են, ապա, իհարկե, դա միանշանակ ազդում է երեխաների վրա: Այսպիսի դասակարգում արեցինք՝ թիրախային խնդիրներն առանձնացնելով»,-նշում է մեր զրուցակիցը:

Հոգեբանների օնլայն խորհրդատվությունն արդեն մի քանի օր է՝ գործում է, մի քանի տասնյակ դիմողներ կան, իսկ նրանց հետ աշխատող հոգեբանների թիվը գերազանցում է 30-ը, կազմն անընդհատ համալրվում է:

Հետաքրքրվում ենք՝ արդյոք մտադրություն կամ ցանկություն կա՞ նաև արտակարգ դրության ավարտից հետո, երբ մարդիկ վերադառնան իրենց բնականոն կյանքին, շարունակել այս նախաձեռնությունը, քանի որ մեկուսացված կյանքից մարդիկ կտրուկ վերադառնալու են իրական կյանք, և հնարավոր է այս ժամանակ առավել մեծ խնդիրների բախվեն: Շողերը նախ ընդգծում է՝ նախաձեռնությանը միացող մասնագետ-հոգեբանների թիմը գնալով համալրվում է: 

«Չեմ կարծում, որ այն օրը, երբ արտակարգ դրությունն ավարտվի և բոլորս վերադառնանք մեր բնականոն կյանքին, հոգեբանները դադարեն իրենց խորհրդատվությունը տրամադրել մեր քաղաքացիներին: 

Բոլորս էլ գիտակցում ենք, որ հետսթրեսային, հետտրավմատիկ փուլը հնարավոր է ավելի ծանր լինի մարդկանց համար հաղթահարել, քան հենց սթրեսային փուլը»,-եզրափակում է Շողեր Աթանեսյանը՝ հույս հայտնելով, որ հոգեբաններից շատերը պատրաստակամություն կհայտնեն աշխատել քաղաքացիների հետ նաև արտակարգ դրության ավարտից հետո:

ԼՈՒՍԻՆԵ ԱՌԱՔԵԼՅԱՆ