Հանդիպում նախագահի հետ կարող է լինել այն դեպքում, եթե գոնե սառեցվի թանկացման որոշումը. կինոռեժիսոր

Կինոռեժիսոր Էդգար Բաղդասարյանը հիացած է ընդդեմ էլեկտրաէներգիայի թանկացման պայքարի դուրս եկած երիտասարդներով:

Խոսելով ոստիկանների գործողությունների մասին՝ արվեստագետը Past.am-ին ասաց.

«Այնպիսի տպավորություն է, որ Ադրբեջան ենք դառնում կամաց-կամաց, բայց չեմ ուզում շատ էմոցիոնալ գնահատականներ տալ: Կարծում եմ, որ նույնիսկ իրենց տեսանկյունից, կոպիտ սխալ են թույլ տվել ոստիկանները: Ի տարբերություն Տեր-Պետրոսյանի հանրահավաքների, այստեղ մեծ մասը երիտասարդներ էին և շատ ակտիվ երիտասարդներ: Տեղի ունեցածը շատ սարսափելի է, անգամ կարելի է քրեական գործ հարուցել Ոստիկանության այս գործողությունների վրա, որովհետև…

Մի խոսքով՝ շատ տխուր է, բայց և ամեն տխուր բանի մեջ կա ուրախալի մի փաստ. ես շատ լուրջ ազդակներ եմ տեսնում, որոնք նոր փոփոխություններ կբերեն, ու դա կանեն հենց երիտասարդները: Արդեն զզվանք է առաջացնում այս վիճակը. Բենթլիներ առնեն, կորպորատիվներ անեն, հետո էդ փողերը ժողովուրդը փակի: Ու ես կարծում եմ, որ ոչ թե թանկացման կասեցում պետք է պահանջել, այլ՝ էժանացում: Եթե դուք գիտեք, մեր էլեկտրաէներգիան ամենաէժանն է ինքնարժեքով ԱՊՀ տարածքում, բայց վաճառվում է ամենաթանկ գնով»:

Մեկնաբանելով նախագահի հետ բանակցելու առաջարկի մերժումը ակտիվիստների կողմից՝ Էդգար Բաղդասարյանն ասաց. «Շատ խելացի բան արեցին, որ չգնացին նախագահի հետ հանդիպման: Ի՞նչ հանդիպում, ի՞նչ թեմայով: Հանդիպում կարող է լինել այն դեպքում, եթե գոնե սառեցվի թանկացման որոշումը:Ես ուզում լսել նաև հոգևորականների, կաթողիկոսի քաղաքական կուսակցությունների ձայնը: Ինչո՞ւ ձայն չեն հանում: Նրանց ձե՞ռք է տալիս այս իրավիճակը: Ասեմ, որ ինձ վերապահումով կարելի է միջին խավին դասել և ինձ համար էլ է ահավոր ծանր էլեկտրաէներգիայի վարձերը մուծելը՝ անգամ թանկանալուց առաջ: Ես պատկերացնում եմ, թե ինչքան դժվար է լինելու ժողովրդի, թոշակառուների համար: Ամեն բան չափ ու սահման ունի: Եթե սա էլ պետք է մարսեն, ապա մենք ավելի վատին ենք արժանի: Սրա համար պետք է պատժվեն:Մենեջմենթ չեն կարողանում ապահովել: Երկրի ղեկավարից մինչև ներքև մենեջեր չեն:

Լևոն Փանոսյան