Գերմանիային է մոտենում «Զաբինե» հզոր փոթորիկը

 

Գերմանիային է մոտենում «Զաբինե» հզոր փոթորիկը, հաղորդում է DW-ը:

 

«Վտանգավոր է լինելու»,- զգուշացրել է մետեորոլոգ Անդրեաս Ֆրիդրիխը գերմանական մետեոծառայությունից (DWD):

 

Սպասվում է քամու ուժգնացում՝ 100-175 կմ/ժ:

 

Սպասվում է նաեւ, որ հասարակական տրանսպորտի լուրջ խափանումներ կլինեն: Deutsche Bahn երկաթուղային կոնցեռնը ուղեւորներին խորհուրդ է տվել ծրագրված ուղեւորությունները հետաձգել:

 

Բաց տարածքում շատ միջոցառումներ չեղարկվել են: Հյուսիսային Ռեյն-Վեստֆալիա դաշնային հողի կրթության նախարարությունը ուսումնական հաստատությունների տնօրեններին եւ ծնողներին թույլ է տվել ինքնուրույն որոշել՝ երեխաներին տուն ուղարկել, թե ոչ:

 

Բարձր պատրաստվածության վիճակում են գերմանական մի շարք քաղաքներում փրկարար եւ հրշեջ ծառայությունները:

 

DWD-ը զգուշացրել է, որ քամու ուժգնացման հետեւանքով կարող են ծառեր տապալվել: Քյոլնի իշխանությունները հայտարարել են, որ փոթորկի ժամանակ Քյոլնի տաճարը փակ կլինի այցելուների համար:

 

Ատլանտիկայից ուղեւորվող փոթորիկը կհասնի Գերմանիայի հյուսիսարեւմտյան շրջաններ: Մետեորոլոգները ակնկալում են, որ երկրի հյուսիսային ափին քամու ուժգնությունը կհասնի մինչեւ 120 կմ/ժ:

 

Մինչեւ 175 կմ/ժ քամու ուժգնացում է կանխատեսվում երկրի լեռնային տարածքներում: Գերմանիայի մի շարք շրջաններում փոթորիկը կուղեկցվի հորդառատ անձրեւներով եւ ամպրոպով: Մետեորոլոգների խոսքով՝ ուժեղ քամին կպահպանվի մինչեւ մյուս շաբաթվա կեսերը: