Վարակային ո՞ր հիվանդությունների թիվն է աճել և որո՞նք են նվազել. ջրծաղիկը կրկին առաջին տեղում է․ «Փաստ»

«Փաստ» թերթը գրում է․ 

Հայաստանում արձանագրված հիվանդությունների բացարձակ և հարաբերական ցուցանիշների համաձայն՝ նախորդ տարվա 11 ամիսների տվյալներով գրանցվել է ջրծաղիկի 12 441 դեպք։ 

Այս մասին տեղեկանում ենք վիճակագրական կոմիտեի՝ 2019 թվականի հունվար-նոյեմբերի սոցիալ-տնտեսական վիճակը բնութագրող տվյալներից, որոնք հիմնված են առողջապահության նախարարության ամփոփ տեղեկատվության վրա։ Վիճակագրական կոմիտեի հրապարակած ցուցակում ներկայացված են վարակային հիվանդությունների ու թունավորումների դեպքերը։ 

Նկատենք, որ ջրծաղիկի դեպքերը թվային առումով գերազանցել են սանդղակում առկա մյուս բոլոր հիվանդություններին։ Նկատենք, սակայն, որ 2018թ. հունվար-նոյեմբերին ջրծաղիկի ավելի շատ դեպքեր են գրանցվել՝ կազմելով 12 710։ 

Նշենք, որ 2019 թ. 11 ամիսների տվյալներով գրանցվել է կարմրուկի 7, իսկ կապույտ հազի 42 դեպք, մինչդեռ 2018թ.-ի նույն ժամանակահատվածում թե՛ կարմրուկի, թե՛ կապույտ հազի ավելի շատ դեպքեր էին արձանագրվել՝ համապատասխանաբար կազմելով 18 և 158 դեպք։

 2019 թվականին չճշտված հարուցիչով թոքաբորբի 7 841 դեպք է գրանցվել՝ 2140-ով ավելի շատ, քան 2018թ. 11 ամիսներին։ 2019-ի նշված հատվածում հարուցված այլ նույնականացրած գրիպի վիրուսով 293 դեպք է գրանցվել, իսկ թոքաբորբով կամ նույնականացրած գրիպի այլ վիրուսով՝ 9 դեպք։

 2018թ. հարուցված այլ նույնականացրած գրիպի վիրուսով հիվանդությունների թիվն ավելի շատ է եղել՝ կազմելով 417 դեպք։

 Մանրէային սննդային թունավորումների դեպքերը 2019թ. նշված ժամանակահատվածում եղել են 77-ը, մինչդեռ 2018թ.-ին 45 դեպք է գրանցվել։ Կենդանիների կողմից տուժելու դեպքերը 2019թ. 11 ամիսների տվյալներով 4 421-ն են եղել, իսկ 2018թ.-ին՝ 3494-ը։

 Ի տարբերություն 2018թ.-ի, 2019-ի 11 ամիսներին վիրուսային հեպատիտներով վարակների ավելի քիչ դեպք է գրանցվել։ 2018թ.-ին այդ թիվը կազմել էր 87, իսկ 2019թ.-ին՝ 53։ 

2019թ.-ին վերաբերող նշված թվից «սուր հեպատիտ A» տեսակի 5 դեպք է գրանցվել, «սուր հեպատիտ B»-ի՝ 23, իսկ «սուր հեպատիտ C»-ի՝ 18 դեպք։

 Նշված թվից չճշտված 7 դեպք կա։ 2019թ. նշված ժամանակահատվածում չճշտված և ենթադրյալ աղիքային վարակների` 5 377, իսկ մանրէային աղիքային վարակների 3 518 դեպք է գրանցվել։ 

Նախորդ տարի ՄԻԱՎ-ի 375 դեպք է գրանցվել, իսկ 2018թ. 11 ամիսների տվյալներով՝ 392, այսինքն՝ 2018թ. ցուցանիշից 17 դեպքով ավելի քիչ։

Մանրամասները՝ «Փաստ» թերթի այսօրվա համարում։