Էներգետիկ կազուս... նախարարությունում. «Փաստ»

«Փաստ» թերթը գրում է․ 

Նախորդ տարի ՀՀ մի շարք նախարարություններ միավորվեցին, քանի որ, ինչպես ներկայացվում էր գործող իշխանության կողմից, պետական համակարգը չափից շատ էր ուռճացված։

Իրականում կարելի կլիներ համաձայնել այս պնդման հետ, եթե հընթացս ականատես չլինեինք մի գործընթացի, որը փաստացի նախորդ տասը տարիների գործելաոճի փաստացի նմանակումն է. 

միավորման և «օպտիմալացման» անվան տակ իշխանություններն ազատվեցին նախկին համակարգի օրոք աշխատած և մասնագիտական խորը գիտելիքներ ունեցող պետծառայողներից, սակայն փոխարենը աշխատանքի ընդունեցին սեփական թիմակիցներին։ 

Ուռճացվածությունից ազատվել չհաջողվեց, փոխարենը հաջողվեց ազատվել «անցանկալիներից»: Հարցը վերաբերում է բոլոր նախարարություններին:

 Սակայն մասնավորաբար էներգետիկայի նախարարության փակման պարագայում ներկայումս, «Փաստ» թերթի տեղեկությունների համաձայն, բավականին լուրջ հարցեր են առաջացել։ 

Մեր աղբյուրները պնդում են, որ ներկայումս բավականին լուրջ խնդիրներ կան, քանի որ նախարարությունների միավորման հետևանքով մեծ թվով մասնագետներ «խաղից դուրս» մնացին, իսկ որոշ դեպքերում ուղղակի փակվեցին նրանց հաստիքները։ 

Ներկայումս էներգետիկայի զգայուն ոլորտը, ըստ տեղեկությունների, համակարգում են դրա հետ կապ չունեցող կամ մակերեսային կապ ունեցող մարդիկ: 

Նախարարության աշխատակիցները դժգոհում են, որ մասնագիտական հարցերի շուրջ քննարկումների ժամանակ համապատասխան որոշումներ կայացնելու լիազորություն ունեցող անձինք, որպես կանոն, այդպես էլ խորությամբ չեն ընկալում թեմաները։

Մանրամասները՝ «Փաստ» թերթի այսօրվա համարում։